Kasungwana Ako Kali na Mzimu wa Kupa

SONOSONO apa, kasungwana ka vilimika 9 ka ku Brazil kakagaŵa paŵiri ndalama izo kakasunganga. Kakatora madola 18 na kuŵika mu bokosi la ndalama mu Nyumba ya Ufumu mwakuti zovwire pa mpingo. Ndipo kakatuma madola 25 ku ofesi ya Ŵakaboni ŵa Yehova lumoza na kalata yifupi. Mu kalata iyi kakalembamo kuti: “Nkhupeleka cawanangwa ici kuti covwire pa mulimo wa pa caru cose. Nkhukhumba kovwira ŵabali na ŵadumbu pa caru cose pa mulimo wa kupharazga makani ghawemi. Nkhupeleka na mtima wose cifukwa cakuti nkhutemwa Yehova.”

Kasungwana aka kali kusambizgika na ŵapapi ŵake kuzirwa kwa kukhozgera mulimo wa kupharazga Ufumu. Kweniso kali kusambizgika kuti nchakuzirwa comene ‘kucindika Yehova na mphango zake’ panji kuti vinthu vyake. (Zinth. 3:9) Nga nkhasungwana aka, mphanyi waliyose wa ise wakhozgera Ufumu mwamwamphu pa mpingo kweniso pa caru cose.