Sendelerani kwa Ciuta
“Yehova Wakulaŵiska mu Mtima”
KAWONEKERO kangaŵa kakupusiska. Umo munthu wakuwonekera kuwaro ndimo mtima wake uliri yayi. Ŵanthu ŵakutemwa kweruzga mwakuyana na kawonekero ka munthu. Kweni Yehova wakulaŵiska waka kawonekero ka munthu yayi. Fundo iyi yili kulembeka pa 1 Samuel 16:1-12.
Yezgelerani kuti mukuwona ivyo vikacitika. Yehova wakaŵa pafupi kusora themba liphya la Ŵaisrayeli. Ciuta wakati kwa nchimi Samuyeli: “Tindikutume kwa Jese wa ku Betelehemu, pakuti ndajiwonera themba mukati mwa ŵana ŵake.” (Vesi 1) Yehova wakayowoya yayi zina la uyo wazamuŵa themba, kweni wakati wazamuŵa yumoza wa ŵana ŵa Jese. Apo Samuyeli wakalutanga ku Betelehemu, wakwenera kuti wakajifumbanga kuti, ‘Kasi namumanya wuli uyo Yehova wamusankha pakati pa ŵana ŵa Jese?’
Samuyeli wakati wafika ku Betelehemu, wakaphalira Jese na ŵana ŵake kuti ŵize ku sembe. Eliyabu, uyo wakaŵa mwana mulara wa Jese wakati wafika, Samuyeli wakatoleka mtima na kawonekero kake. Wakaghanaghana kuti Eliyabu wali na thupi lakwenelera nadi kuŵa themba, ndipo wakati mu mtima wake: “Nadi wakuphakazgika wa Yehova wali papo, pamaso pake.”—Vesi 6.
Ndipouli, Yehova wakawona vinthu mwakupambana. Wakati kwa Samuyeli: “Ungalaŵiskanga cisko cake, panji utali wa msinkhu wake, cifukwa ndamukana.” (Vesi 7) Yehova wakatoleka mtima yayi na utali ndiposo kutowa kwa Eliyabu. Pakuti maso gha Yehova ghakulaŵiska vyose, wakawona mukati umo muli kutowa kweneko kwa munthu.
Yehova wakamuphalira Samuyeli kuti: “Pakuti Yehova ntha wakulaŵiska umo munthu wakulaŵiskira; munthu wakulaŵiska kawonekero ka kuwaro kweni Yehova wakulaŵiska mu mtima.” (Vesi 7) Enya, cakuzirwa comene kwa Yehova ni umo mtima wa munthu uliri. Ntheura, Yehova uyo “wakuyezga mitima” wakamukana Eliyabu, kweniso ŵana ŵanyake ŵankhondi na yumoza ŵa Jese awo ŵakiza kwa Samuyeli.—Zintharika 17:3.
Jese wakaŵaso na mwana msepuka uyo wakaŵa mucoko comene pa wose, zina lake Davide, uyo ‘wakaliskanga mberere.’ (Vesi 11) Ntheura, Davide wakacemeka ku uliska ndipo wakiza kwa Samuyeli. Yehova wakamuphalira Samuyeli kuti: “Wuka, umuphakazge, pakuti ndiye mweneuyu.” (Vesi 12) Mbunenesko kuti Davide “wakaŵa muswesi na wa maso kung’anima, munthu muwemi comene.” Kweni mtima wake ndiwo ukapangiska kuti wazomerezgeke na Ciuta.—1 Samuel 13:14.
Nangauli caru cikuzirwiska comene kawonekero ka munthu, kweni ise tikupembuzgika kumanya kuti Yehova Ciuta wakuyegheka na kawonekero ka kuwaro yayi. Mu maso gha Yehova, nkhanthu yayi kuŵa mutali panji kulumbika na ŵanthu kuti ndiwe wakutowa. Cakuzirwa kwa Yehova ni umo munthu waliri mukati. Asi kumanya fundo iyi kukuticiska kuti tiŵe na mikhaliro yiwemi iyo yingapangiska Yehova kuti watiwonenge kuti ndise ŵakutowa?