“Kakunovwira Kuti Niconthe Mitima ya Ŵanthu”

VILIMIKA ivyo vyajumpha, mu caru ca Brazil, mu msumba wa Porto Alegre mukaŵa ungano wa vyaru vyakupambanapambana. Ku ungano uwu kukiza ŵanthu ŵanandi comene awo ŵakafuma mu vyaru 135. Pa nyengo yakupumura, Ŵakaboni ŵa mu mpingo wa Porto Alegre ŵakiza pa malo agha na kwamba kupharazgira ŵalendo aŵa uthenga wa Ufumu. Kasi ŵakacita wuli kuti ŵayowoyeskane na ŵalendo aŵa?

Elizabete uyo ni mupayiniya wakati: “Tikagwiliskira nchito kabuku ka Makani Ghawemi ku Ŵanthu ŵa Mitundu Yose.” Wakatiso: “Ŵanandi mwa ŵalendo aŵa ŵakaŵa kuti ŵandapulikepo makani ghawemi gha Ufumu, kweni ŵakategherezga uthenga withu. Tikayowoya na ŵanthu ŵakufuma ku Bolivia, China, France, India, Israel, na Nigeria. Ŵanyake mwa ŵanthu aŵa tikaŵagaŵira mabuku gha mu ciyowoyero cawo, ndipo ŵakaghapokelera na cimwemwe.”

Ku Mexico, mupayiniya munyake, zina lake Raúl nayo wakupharazga na kabuku aka, ndipo vikumwendera makora. Nyengo yinyake wakakumana na dada munyake wa ku Arabia wa vilimika 80, uyo muwoli wake wakaŵa kuti watayika waka. Dada uyu wakati waŵazga kabuku aka mu ciyowoyero ca kwake, wakathiska masozi ghacimwemwe. Cifukwa wuli? Cifukwa ca kuŵazga mu ciyowoyero ca kwake layizgo la Ciuta lakuti nyifwa yizamuŵakoso yayi, ilo likusangika pa Uvumbuzi 21:3, 4. Nyengo yinyake Raúl wakakumana na mwanalume munyake uyo wakayowoyanga Ciphwitikizi. Mwanalume uyu nayo mwana wake wakaŵa kuti watayika waka. Raúl wakamuŵazgiska mwanalume uyu mu kabuku aka. Wakati waŵazga mu ciyowoyero ca kwake wakalongora kuti wakukhumba kumanya vinandi vya Baibolo, ndipo wakazomera sambiro la Baibolo.

Raúl wakupharazga na kabuku ka Makani Ghawemi ku Ŵanthu ŵa Mitundu Yose ku awo ŵakuyowoya Armenian, Chinese, English, French, German, Hindi, Korean, Mixe, Persian, Russian, na Zapotec. Iyo wakati: “Nawona kuzirwa kwa kupharazga na kabuku aka. Kakunovwira kuti niconthe mitima ya ŵanthu nangauli nkhumanya yayi ciyowoyero cawo.”

Mazuŵa ghano ŵanthu ŵanandi ŵakusamira mu vyaru vinyake, tili na mwaŵi ukuru comene wa kupharazgira ŵanthu ŵa viyowoyero vinyake. Tingaŵapharazgira uthenga wa Ufumu na kabuku ka Makani Ghawemi ku Ŵanthu ŵa Mitundu Yose. Kasi mu uteŵeti mukuyegha kabuku aka?

[Vithuzithuzi pa peji 32]

Raúl na kabuku ako kakumovwira kucontha mitima ya ŵanthu