Wonani Zina mu Cidikha

KASI zina lakuti ST. MORITZ muli kulipulikapo? Ni malo ghakumanyikwa comene agho ghali mu cidikha ca Engadine ku Switzerland. Cidikha ici cili pakati pa mapiri gha ku Switzerland pafupi na mphaka ya Italy. St. Moritz ngamoza mwa malo ghakutowa comene agho ŵanthu ŵanandi ŵakukondweskeka nagho. Mu cidikha ici muli malo ghakusungirako vinyama gha Swiss National Park, uko vilengiwa vikulumba Yehova, Mlengi withu Mukuru. (Sal. 148:7-10) Kuliso vinthu vinyake vya mu vilimika vya m’ma 1600 ivyoso vikulumba Yehova.

Mutepanji mungatoleka mtima na mazgu agho ghali kulembeka pa nyumba zinandi mu cidikha ici. Nchacilendo yayi kuwona zina la Ciuta lalembeka pa viliŵa vya nyumba comenecomene pacanya pa mulyango. Ŵanthu ŵa ku malo agha ŵakatemwanga kudoŵa nyumba zawo na mazgu mu nthowa zakupambanapambana. Pasi apa pali cithuzithuzi ca nyumba yinyake mu muzi wa Bever ico cikulongora vinyake ivyo ŵakalembanga. Malemba agha ghakung’anamulika kuti: “Mu 1715. Yehova ndiyo jando, ndipo Yehova ndiyo umaliro. Ciuta wangacita vyose, ndipo palije ico cingamutonda.” Pa ciliŵa ici pali malo ghaŵiri apo pakusangika zina la Ciuta.

Mungawonaso mazgu ghanyake agho ghali pa ciliŵa ca nyumba yinyake mu muzi wa Madulain. Mazgu agha ghakuti: “Salmo 127. Kwambura kuti Yehova wakuzenga nyumba awo ŵakuyizenga ŵakutokatoka waka. Lucius Rumedius. Mu 1654.”

Cifukwa wuli mu cidikha ici ŵanthu ŵanandi ŵakalembanga zina la Ciuta pa nyumba zawo? Mu vilimika vya m’ma 1500, Baibolo likang’anamulika mu Romansh, ciyowoyero ico ŵakuyowoya ŵanthu ŵa ku Engadine. Nakuti likaŵa buku lakwamba kung’anamulika mu ciyowoyero ici. Cifukwa ca ivyo ŵakaŵazganga mu Baibolo, ŵanandi ŵakalembanga mazina ghawo pa viliŵa vya nyumba zawo ndiposo mazgu gha mu Baibolo agho ghakaŵanga na zina la Ciuta.

Malemba agha ghacali kupharazga na kulumba zina la Yehova, nangauli pajumpha vilimika vinandi kufuma apo ŵakaghalembera. Ŵalendo ndiposo ŵeneko cikaya mu cidikha ici, ŵakucemeka kuti ŵakasambire vinandi vya Yehova Ciuta, mwa kuluta ku nyumba iyo yili na zina lake. Nyumba iyi yili ku Bever ndipo yikumanyikwa na zina lakuti Nyumba ya Ufumu ya Ŵakaboni ŵa Yehova.

[Kulongosora Cithuzithuzi pa peji 7]

© Stähli Rolf A/age fotostock