Citatata Cikukhumbikwa
NYENGO Yakusopera ya Mbumba njakuzirwa comene para tikukhumba kuti ŵana ŵakure “mu kulanga na kuŵasambizga maghanoghano gha Yehova.” (Efe. 6:4) Usange ndimwe mupapi, mukumanya ivyo ŵana ŵakucita pa nyengo ya sambiro. Kweni kasi mungacita wuli kuti ŵanwekenge na ivyo mukusambira? Wonani ivyo ŵapapi ŵanyake ŵakucita.
George, wa ku California U.S.A., wakati: “Apo ŵana ŵithu ŵakaŵa ŵanici, ine na muwoli wane tikayezgayezganga kuti Nyengo Yakusopera ya Mbumba yiŵenge yakukondweska. Nyengo zinyake tikavwaranga nga ni ŵanthu awo ŵakuzunulika mu Baibolo ndipo tikacitanga seŵero pa nkhani iyo tikuŵazga mu Buku Lane la Nkhani za mu Baibolo. Tikapanga vinthu nga ni malupanga, ndodo, vidunga, na vinyake vyantheura. Tikacitangaso seŵero mwakukora mazgu gha munthu munyake agho ghali kulembeka mu Baibolo na kufumbana kuti ‘ndine njani?’ Kweniso tikafumbananga mafumbo kufuma mu Baibolo ndipo ghanyake ghakaŵanga ghanonono. Tikajamburanga vinthu vinyake nga cingalaŵa ca Nowa panji kulemba nyengo iyo vinthu vinyake ivyo vikuzunulika mu Baibolo vikacitikira. Nyengo zinyake tikajamburanga ŵanthu awo ŵakuzunulika mu Baibolo na kuŵalongosora. Pasono, tikujambura vyankhondo vyauzimu ivyo vikuyowoyeka pa Ŵaefeso 6:11-17 na kulongosora ivyo cankhondo cilicose cikwimira. Nthowa izi zatovwira kuti tisangwenge na Nyengo Yakusopera ya Mbumba.”
Debi, wa ku Michigan U.S.A, wakati: “Ine na mfumu wane tikamanyanga yayi umo tingamufikira pa mtima mwana withu apo wakaŵa pafupi kukwaniska vilimika vitatu. Ntheura, zuŵa linyake apo tikaŵazganga nkhani ya Yisake na Rabeka mu Buku lane la Nkhani za mu Baibolo, nkhatora vidoli viŵiri na kuviyelezgera nga ni Yisake na Rabeka. Wakamba kutegherezga lizgu lililose. Mu myezi yakulondezgapo, vidoli ivi tikaviyelezgeranga na ŵanthu ŵanandi awo ŵakuzunulika mu Baibolo. Para taŵazga nkhani yiliyose, mwana withu wakapenjanga vidoli panji cinthu cilicose mu nyumba cakuti tiyezgelere. Wakaŵa nga wakupenja cuma. Bokosi ilo tikusungamo skapato tikakakako kacingwe kaswesi ndipo tikalitoranga kuti ni nyumba ya Rahabi. Tili na cidoli ico cili nga ni njoka (utali wake mamita 1.5), ico tikacipomba ku ciphyelero ndipo cikimiranga njoka ya mkuŵa iyo yikuyowoyeka pa Maŵazgo 21:4-9. Vinthu ivi tikuvisunga mu cithumba. Kanandi mwana withu wakutoramo vinthu vyakuti wayezgelerenge. Para tikuwona nthena tikuŵa ŵakukondwa comene!”
Nchipusu yayi kulera ŵana, ndipo pakukhumbikwa vinandi padera pakuŵasambizga sabata yiliyose kuti ŵaŵe na khumbo la kuteŵetera Yehova. Kweni pa Nyengo Yakusopera ya Mbumba mungaŵasambizga vinthu vinandi vyauzimu. Tikukayika yayi kuti citatata nchakukhumbikwa.