“Ŵakususka Awo Ŵakwenera Kucindikika”

MU MUWUSO wake wankhaza, Adolf Hitler wa ku Germany, wakapokera makalata ghanandi comene. Mu 1945 apo caru ca Russia cikapoka cigaŵa ca kufupi na msumba wa Berlin, ghanandi mwa makalata agha ŵakaghasamuskira ku Moscow na kughasunga. Wakusanda vya mdauko, Henrik Eberle, wali kusanda ghanandi mwa makalata agha ku Moscow mwakuti wawone awo ŵakalembera Hitler ndiposo cifukwa cake. Eberle wakalemba ivyo wakasanga mu buku lake lakuti Briefe an Hitler (Makalata ghakuya kwa Hitler).

Eberle wakalemba kuti: “Ŵasambizgi na ŵasambiri, masisitere na ŵasembe, ŵalova na mabwana, ŵasilikari ŵamaudindo na ŵasilikari bweka, wose ŵakamulemberanga Hitler makalata. Ŵanji ŵakamucindikanga Hitler kuti wakaŵa Mesiya; apo ŵanji ŵakawonanga kuti ni muheni comene.” Kasi ŵaliska ŵa machalichi ŵakamulemberapo makalata Hitler ghakususka nkhaza izo cipani ca Nazi cikacitanga? Ghakaŵapo makalata ghanthena kweni ghakaŵa ghanandi viŵi yayi.

Ndipouli, Eberle wakasanga fayelo iyo yikaŵa na makalata ghanandi ghakulembeka na Ŵakaboni ŵa Yehova kufuma mu vigaŵa vyakupambanapambana vya ku Germany, agho ghakasuskanga nkhaza za cipani ca Nazi. Ŵakaboni ŵa Yehova ŵakufuma mu vyaru 50, ŵakatumira Hitler makalata na matelegiramu pafupifupi 20,000 ghakumususka. Ŵakaboni ŵa Yehova ŵanandi ŵakakakika, ŵanji ŵakakomeka, panji kufwa cifukwa ca kuŵacitira nkhaza. Dr. Eberle wakamalizga kuti: “[Ŵakaboni awo ŵakasuzgika] ŵangawoneka ŵacoko pakuyaniska na ŵanthu ŵanyake ŵanandi awo ŵakasuzgika na muwuso wa Nazi. Kweni ŵanthu aŵa ŵakasuzgika cifukwa cakuti ŵakasuska mwankhongono muwuso wa Nazi, ndipo ŵakwenera kucindikika comene.”