Ŵakapharazga Mazgu gha Ciuta Mwacikanga

Para tikususkika, tikukhumbikwira cikanga panji kuti kukhwima mtima. Ŵakhristu ŵaunenesko ŵakulongora cikanga, nga umo tikuwonera mu buku la “Kucitira Ukaboni Mwakukwana vya Ufumu wa Ciuta” na la Jehovah’s Witnesses—Proclaimers of God’s Kingdom. Nga Mbakhristu ŵa mu nyengo ya ŵapositole, nase tikulomba Yehova kuti watipe mzimu wake uwo ukutovwira kuyowoya mazgu ghake mwacikanga.—Mil. 4:23-31.

Pakuyowoya umo mulimo withu wa kupharazga ukenderanga mu nyengo ya nkhondo yakwamba ya caru cose, mbali munyake wakalemba kuti: “Mwacikanga ŵateŵeti ŵa Ciuta ŵakagaŵiranga buku la Studies in the Scriptures, voluyumu 7, la mutu wakuti The Finished Mystery. Buku ili ndilo likagaŵika comene kuluska mabuku ghanyake. Uthenga wa Ufumu Na. 1 ukafumiskika mu 1918. Pakalondezga Uthenga wa Ufumu Na. 2 uwo ukalongosora cifukwa ico ŵamazaza ŵakakwiyira na buku la The Finished Mystery. Kufuma apo, pakaŵa Uthenga wa Ufumu Na. 3. Ŵakhristu ŵakuphakazgika ŵakafwilirapo comene kugaŵira mabuku agha. Pakakhumbikwiranga cipulikano na cikanga kuti munthu wagaŵire Uthenga wa Ufumu.”

Mazuŵa ghano, ŵapharazgi ŵaphya ŵa Ufumu ŵakusambizgika umo ŵangapharazgira, kweni kale ni nyengo zose yayi apo vikaŵanga nthena. Pakulongosora ivyo vikacitika apo wakambanga kupharazga mu 1922, mbali munyake wa ku Poland uyo wakakhalanga ku United States wakati: “Nkhakhung’uska pa ofesi ya dokotala uku nkhumanya yayi ico ningayowoya pakugaŵira mabuku, nakuti Cingelezi cikanisuzganga comene kuyowoya. Uyo wakajurako ni nesi. Nizamuluwa yayi ivyo vikacitika, nkhaŵa wakwenjerwa kweniso wawofi. Apo nkhajuranga cikwama, mabuku ghose ghakawa pa malundi gha nesi. Nkhumanya yayi ico nkhayowoya, kweni nkhamugaŵira buku nesi uyu. Apo nkhawukangapo, nkhasanga cikanga ndipo nkhawona kuti Yehova wanitumbika. Pa zuŵa ili nkhagaŵira tumabuku tunandi ku malo gha nchito agha.”

Mudumbu munyake wakati: “Ca mu 1933, ŵabali ŵanandi ŵakapharazganga uthenga wa Ufumu mwakugwiliskira nchito galimoto za vyakukuzgira mazgu.” Ulendo unyake mudumbu uyu pamoza na mbumba yinyake ŵakapharazganga ku California, U.S.A. ku cigaŵa ca mapiri. Mudumbu uyu wakati: “Mbali wakaluta na galimoto pacanya pa phiri, ndipo ise tikakhala mu tawuni. Mbali wakati wamba kulizga uthenga wakujambulika, vikaŵa nga kuti uthenga uwu ukufuma kucanya. Ŵanthu ŵa mu tawuni ŵakayezgayezga kupenja mbali uyu, kweni ŵakamuwona yayi. Uthenga uwu ukati wamara, tikamba kuŵapharazgira. Nkhateŵetapo kaŵiri na awo ŵakaŵa na galimoto za vyakukuzgira mazgu, kweni ŵanthu ŵanandi ŵakakhumbanga yayi kutegherezga uthenga. Ndipouli, ŵakaŵavya pakugwenthera cifukwa uthenga uwu ukafikanga mu nyumba zawo. Tikuwona kuti Yehova nyengo zose wakupeleka nthowa zakwenelera zakupharazgira. Pakakhumbikwiranga cikanga kupharazga mu nthowa iyi, kweni nyengo zose pakaŵanga vipambi viwemi, ndipo zina la Yehova likacindikikanga.”

M’ma 1930 na kukwambilira kwa vilimika vya m’ma 1940, ŵapharazgi ŵakagwiliskiranga nchito magiramafoni na nkhani zakujambulika pa malekodi. Mudumbu munyake wakati: “Mudumbu munyake muwukirano wakapharazganga na giramafoni ku nyumba na nyumba. Wakati wamba kulizga giramafoni pa nyumba yinyake, dada wa pa nyumba iyi wakakwiya comene mwakuti wakabafura giramafoni. Pakaŵavya lekodi ilo likasweka. Ŵanalume ŵatatu awo ŵakalyanga cakurya mu galimoto, ŵakawona ivyo vikacitika ndipo ŵakacema mudumbu uyu kuti waŵalizgire giramafoni, ndipo paumaliro wakaŵagaŵira mabuku. Ici cikabenekelera nkhaza izo dada yura wakamucitira.” Pakakhumbikwiranga cikanga kuti munthu wazizipizge masuzgo ghanthena agha.

Mudumbu uyu wakatiso: “Nkhukumbuka apo mu 1940 tikambanga kugaŵira magazini mu misewu. Pambere tindambe upharazgi uwu, ŵabali na ŵadumbu ŵakendanga mumphepete mwa msewu na viphambano. Pa viphambano ivi pakalembekanga kuti ‘Religion Is a Snare and a Racket’ (Cisopa Nchipingo Ndipo Nchakupusika) na ‘Serve God and Christ the King’ (Teŵeterani Ciuta na Khristu Themba). Pa nyengo yeneyiyi, ŵabali ŵakagaŵiranga mathirakiti. Cikanga cikakhumbikwanga pakucita mulimo uwu, kweni vikawovwira kuti ŵanthu ŵamanye Yehova na ŵateŵeti ŵake.”

Mudumbu munyake wakati: “Cikaŵa cipusu yayi kugaŵira magazini mu matawuni ghacokoghacoko. Pa nyengo iyi Ŵakaboni ŵa Yehova ŵakasuskikanga comene. . . . Pakakhumbikwiranga cikanga kuti wime pa msewu uku wakolera magazini na kuyowoya mazgu kuti ŵanthu ŵakumanye. Ndipouli, pafupifupi zuŵa lililose la Cisulo tikapharazganga. Nyengo zinyake ŵanthu ŵakatilongoranga mtima waubwezi. Kweni nyengo zinyake, genge likari likatizingilizganga ndipo kanandi mwaluŵiro tikaligwenthanga.”

Nangauli Ŵakaboni ŵa Yehova ŵakakumana na nthambuzgo mu nyengo ya Nkhondo Yaciŵiri ya Caru Cose, kweni ŵakalutilira kucita mulimo wawo mwacikanga. Pa upharazgi wapadera wa mazuŵa 43, uwo ukamba pa Disembala 1, 1940 mpaka Janyuwale 12, 1941, ŵapharazgi pafupifupi 50,000 ŵa mu United States ŵakagaŵira tumabuku pafupifupi 8 miliyoni, ndipo mu nyengo iyi pakakhumbikwiranga cikanga kuti munthu waciteko upharazgi.

Ŵacekuru ŵanandi awo ŵali mu gulu la Ciuta, ŵakukumbuka makora masuzgo agho ghakaŵapo kweniso cikanga ico cikakhumbikwanga pakupharazga. Ŵanji ŵakukumbuka kuti mzimu wa cikanga uwo ŵakalongoranga, ukuyana waka na umo munthu wangacimbizgira ŵalwani awo ŵakukhumba kunjira pa cipata. Tikumanya yayi nthowa izo tizamupharazgiranga mazgu gha Ciuta para Haramagedoni yakhala pacoko waka kuti yambe. Ndipouli, na wovwiri wa Yehova, tilutilirenge kupharazga mazgu ghake na cipulikano kweniso cikanga.

[Mazgu Ghakukhozgera pa peji 9]

Nyengo zose cikanga cikukhumbikwa pakupharazga Ufumu