Sambirani Kufuma mu Mazgu gha Ciuta

Kasi Cizamucitika Nchivici pa Zuŵa la Ceruzgo?

Nkhani iyi yili na mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵaŵenge ŵakukondwa kudumbiskana namwe mazgoro ghake.

1. Kasi Zuŵa la Ceruzgo ni vici?

Nga umo cithuzithuzi ico cili kumalyero uku cikulongolera, ŵanthu ŵanandi ŵakughanaghana kuti pa Zuŵa la Ceruzgo ŵanthu mabiliyoni ghanandi ŵazamutolekera panthazi pa mpando wa Ciuta kuti ŵeruzgike cifukwa ca ivyo ŵakacita kumasinda. Ndipo ŵanji ŵazamupokera njombe ya umoyo kucanya apo ŵanji ŵazamuyuzgika mu moto wamuyirayira. Kweni Baibolo likulongora kuti cilato ca Zuŵa la Ceruzgo nkhuponoska ŵanthu ku vinthu vyambura urunji. (Salmo 96:13) Ciuta wali kusora Yesu kuŵa Mweruzgi ndipo wazamuwezgerapo urunji.​—Ŵazgani Yesaya 11:1-5; Milimo 17:31.

2. Kasi Zuŵa la Ceruzgo lizamuwezgerapo wuli urunji?

Munthu wakwamba Adamu wakati wagalukira dala Ciuta, wakanjizga ŵana ŵake wose mu kwananga, masuzgo, na nyifwa. (Ŵaroma 5:12) Kuti wazakawuskepo kuwura urunji uku, Yesu wazamuwuska ŵanthu mabiliyoni ghanandi awo ŵali kufwa. Buku la Uvumbuzi likuvumbura kuti ivi vizamucitika pa nyengo ya muwuso wa Khristu wa vilimika 1000.​—Ŵazgani Uvumbuzi 20:4, 11, 12.

Ŵanthu awo ŵazamuwuskika ŵazamweruzgika cifukwa ca zakwananga izo ŵakacitanga pambere ŵandafwe yayi. Kweni ŵazamweruzgika pa ivyo vizamulembeka mu “mipukutu” iyo yikuzunulika mu Uvumbuzi cipaturo 20. (Ŵaroma 6:7) Mpositole Paulosi wakati awo ŵazamuwuskika na kupika mwaŵi wa kusambira vya Ciuta mbanthu “ŵarunji na ŵambura urunji wuwo.”​—Ŵazgani Milimo 24:15.

3. Kasi Zuŵa la Ceruzgo lizamufiska vici?

Awo ŵakafwa kwambura kumanya Ciuta kuti ŵamuteŵetere, ŵazamupika mwaŵi kuti ŵasinthe nakwamba kucita viwemi. Para ŵacita nthena ndikuti kuwuka kwawo kuzamuŵa kuwukira “ku umoyo.” Ndipouli, ŵanji awo ŵazamuwuskika ŵazamukhumba yayi kusambira vya Yehova. Ntheura tingati “ŵazamuwukira ku ceruzgo.”​—Ŵazgani Yohane 5:28, 29; Yesaya 26:10; 65:20.

Para vyaka 1000 vya Zuŵa la Yehova vyamara, Yehova wazamuzgora ŵanthu kuŵaso ŵarunji nga umo ŵakaŵira pakwamba. (1 Ŵakorinte 15:24-28) Ici nchilindizga ciwemi comene ku ŵanthu wose ŵakugomezgeka. Pa ciyezgo caumaliro, Ciuta wazamufumiska Satana Dyabulosi mu cizongwe, umo wazamuŵa kuti wakhalamo vyaka 1000. Satana wazamuyezgaso kupatuska ŵanthu kwa Yehova, kweni awo ŵazamukana ŵazamusangwa na umoyo pa caru capasi kwamuyirayira.​—Ŵazgani Yesaya 25:8; Uvumbuzi 20:7-9.

4. Kasi ni zuŵaso ndi la ceruzgo ilo ŵanthu ŵazamusanga nalo candulo?

Baibolo likuzunuraso mazgu ghakuti “zuŵa la ceruzgo” pakuyowoya za ivyo vizamucitika pakuwuskapo mgonezi uheni uwu. Zuŵa la ceruzgo ili lizamwiza mwamabuci nga umo vikaŵira na Ciwowota ca mu nyengo ya Nowa ico cikaparanya muwiro uheni wose. Kweni cakukondweska nchakuti pharanyiko la “ŵanthu ŵambura kopa Ciuta” ilo lizenge sonosono apa, lizamujura nthowa ya caru ciphya ico “muzamukhala urunji.”​—Ŵazgani 2 Petrosi 3:6, 7, 13.

Kuti mumanye vinandi wonani peji 213-215 mu buku ili, Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Cithuzithuzi pa peji 16]

“Ceruzgo Caumaliro,” Cakujambulika na Gustave Doré, 1832-1883

[Kulongosora Cithuzithuzi]

Engravings by Doré

[Cithuzithuzi pa peji 16]

[Cithuzithuzi pa peji 17]

[Cithuzithuzi pa peji 17]