Kasi Cilipo Cisopa Ico Mungacigomezga?

Usange cisopa cinyake cili kumukhuŵazganipo, vingamusuzgani kuti mugomezge cisopa cilicose. Kweni manyani kuti cilipo cisopa ico mungacigomezga. Apo Yesu wakaŵa pa caru capasi, wakawunganya ŵalondezgi ŵake ŵakugomezgeka ndipo wakaŵasambizga kuti ŵacitenge vinthu mwakukolerana na fundo za mu Baibolo. Ŵalondezgi ŵanadi ŵa Khristu awo ŵakufwilirapo kulondezga fundo za mu Baibolo ŵacalipo. Kasi mungaŵasanga nkhu?

Esitere, uyo wazunulika mu nkhani yaciŵiri, wakati: “Nkhamba kusambira Baibolo na Ŵakaboni ŵa Yehova. Nyengo yicoko waka nkhapulikiska lemba la Yohane 8:32, ilo likuti: ‘Mumanyenge unenesko, ndipo unenesko umufwaturaninge.’”

Ray, uyo wazunulika mu nkhani yinyake kukwambilira, wakati: “Cifukwa cakuti nkhasambiranga Baibolo na Ŵakaboni ŵa Yehova, nkhamanya kuti ni Ciuta yayi uyo wakupangiska kuti ŵanthu ŵasuzgikenge. Nkhakondwa comene kumanyaso kuti nangauli Ciuta wazomerezga vinthu viheni pasono, kweni wakulayizga kuti wavimazgenge sonosono.”

Mbunenesko kuti nchakusuzga kucita ico nchiwemi apo ŵanthu ŵanandi ŵali na nkharo ziheni. Kweni nchamacitiko. Ŵanthu ŵanandi ŵakukhumba kuti yunji waŵawovwire kupulikiska Baibolo na kulondezga ivyo likusambizga. Lekani Ŵakaboni ŵa Yehova pa caru cose ŵakusambira Baibolo na ŵanthu ŵanandi kwawanangwa. Sabata yiliyose ŵanthu ŵanandi ŵakusambira Baibolo. Ntheura, ŵakuŵa paubwezi na Mlengi wawo, kweniso ŵakuŵa ŵakukondwa.a

Zuŵa linyake para mwazakakumana na Ŵakaboni ŵa Yehova, muzakaŵafumbe cifukwa ico ŵakugomezgera cisopa cawo. Sandani visambizgo vyawo na mdauko wawo. Ndipo paumaliro dumurani mwekha usange cilipo cisopa ico mungacigomezga.