“Nkhaŵanga na Nyumba Yane Kulikose”

PA NYENGO ya upharazgi wapadera wa mazuŵa 9, uwo ukacitika kuumaliro wa Ogasiti mpaka kuuyambiro wa Seputembala 1929, ŵapharazgi ŵakujumpha 10,000 ŵakapharazga mu United States mu unandi wawo. Ŵakagaŵira mabuku ghakukwana 250,000. Pa ŵapharazgi ŵa Ufumu aŵa pakaŵa makopotala 1,000. Ciŵelengero ca makopotala cikakura comene. Mu Bulletina mukalembeka kuti “cikaŵa cakuzizika” kuwona kuti ciŵelengero ca ŵapayiniya ca mu 1927 cikasazgikirako katatu mu 1929.

Kuumaliro kwa 1929, cuma cikaleka kwenda makora. Pa Ciŵiri, Okutobala 29, 1929, malonda gha masheya mu msumba wa New York ghakatimbanizgika ndipo ici cikapangiska kuti cuma ca pa caru cose capasi naco cileke kwenda makora. Mu mabanki ndalama zikamara. Ŵalimi nawo ŵakasuzgika. Mafakitare ghakajalika. Ŵanthu ŵanandi nchito zikaŵamalira. Mu 1933, ŵanthu awo ŵakapokekanga nyumba mu United States cifukwa ca kutondeka kuwezga ngongoli ŵakakwananga 1,000 pa zuŵa.

Kasi ŵapharazgi ŵanyengozose, ŵakacita wuli pa nyengo yakusuzga iyi? Cinthu cimoza ico cikaŵawovwira ni galimoto yakuŵa na nyumba yakwenda nayo. Cifukwa ca kuŵa na nyumba izi, ŵapayiniya ŵanandi ŵakalipiranga yayi lenti na msonkho, ndipo ŵakagwiliskiranga nchito ndalama zinandi yayi.b Pa nyengo ya ungano, ŵapayiniya aŵa ŵakagonanga mu nyumba izi. Mu 1934, mu Bulletin mukaŵa masacizgo ghakunozgera nyumba izi kuti ziŵe na mipopi ya maji, malo ghakuphikapo, bedi, kweniso kuti zifundenge para kwazizima.

Ŵapharazgi ŵanandi pa caru cose, nawo ŵakamba kuŵa na galimoto zakuŵa na nyumba yakwenda nayo. Victor Blackwell wakati: “Nga umo Nowa wakamanyiranga vinandi yayi vyakukhwaskana na kupanga cingalaŵa, nane nkhamanyanga vinandi yayi pa nkhani ya kupanga galimoto yakuŵa na nyumba.” Kweni Victor wakapanga nyumba iyi.

Avery na Lovenia Bristow ŵakaŵa na galimoto yakuŵa na nyumba yakwenda nayo. Avery wakati: “Nkhaŵanga na nyumba yane kulikose.” Mbumba iyi yikacitanga upayiniya lumoza na Harvey na Anne Conrow, awo nyumba yawo yakwenda nayo, yikaŵa na ciliŵa cakupangika na cipepara. Nyengo yiliyose para ŵakusama, mapepara ghakayoyokanga. Avery wakati: “Pakaŵavya galimoto yinyake yakuyana na iyi kumasinda kose, ndipo palije munyake uyo wali kupangaposo galimoto yanthena iyi.” Ndipouli, Avery wakayowoya vya Harvey na Anne Conrow pamoza na ŵana ŵawo ŵaŵiri, kuti: “Mbumba iyi, yikaŵa na cimwemwe cikuru comene.” Harvey Conrow wakalemba kuti: “Nyengo zose tikasanganga vyakukhumbikwa, ndipo tikawona kuti ndise ŵakuvikilirika pakuteŵetera Yehova.” Pakati pajumpha nyengo, Harvey na Anne Conrow pamoza na ŵana ŵawo ŵaŵiri ŵakasambira Sukulu ya Giliyadi ndipo ŵakatumika ku Peru kukacita umishonale.

Mbumba ya kwa Battaino nayo yikacitanga upayiniya. Giusto na Vincenza Battaino ŵakati ŵamanya kuti ŵaŵenge na mwana, ŵakazgora galimoto yawo yakupangika mu 1929 kuti yiŵe na nyumba yakwenda nayo, “iyo yikaŵa nga ni hotelo yiwemi” pakuyaniska na mahema agho ŵakakhalangamo pakwamba. Ŵakalutilira kucita upayiniya pamoza na mwana wawo ndipo ŵakapharazgiranga ŵanthu ŵa ku Italy awo ŵakakhalanga mu United States.

Ŵanthu ŵanandi ŵakategherezganga makani ghawemi, kweni ŵakavu na awo ŵakaŵa pa nchito yayi, ŵakatondekanga kupelekapo ndalama pa mabuku ghakulongosora Baibolo agho ŵakapokeranga. M’malo mwake, ŵakapelekanga vinthu vyakupambanapambana. Ŵapayiniya ŵaŵiri ŵakalemba vinthu vyakupambanapambana vyakukwana 64 ivyo ŵakapokera kufuma ku ŵakunweka. Vinthu ivyo ŵakalemba, ni ivyo vikusangika mukaya.

Fred Anderson wakasanga mulimi uyo wakakhumbanga mabuku ghithu ndipo wakamugaŵira, kweni iyo wakapeleka magilasi agho ŵakavwaranga anyina. Kufuma apo, Fred wakafika kwa mulimi munyake wapafupi, ndipo mulimi uyu wakanweka na mabuku ghithu kweni wakati: “Nilije magilasi ghakuŵazgira.” Ndipouli, wati wapika magilasi ghara, wakaŵazganga makora comene, ntheura mwakukondwa wakapeleka vyawanangwa cifukwa ca mabuku na magilasi wuwo.

Herbert Abbott wakayeghanga citatanga ca nkhuku mu galimoto yake. Para ŵanthu ŵamupa nkhuku zitatu panji zinayi cifukwa ca mabuku, iyo wakaguliskanga ku msika ndipo ndalama zake wakaguliranga mafuta gha galimoto. Iyo wakalemba kuti: “Nyengo zinyake ndalama zikamaranga kweni tikalekapo yayi kucita uteŵeti. Para mafuta ghalimo mu galimoto, tikalutanga ku upharazgi cifukwa tikagomezganga kuti Yehova watovwirenge.”

Kuthemba Yehova kweniso cikanga, ndivyo vikaŵawovwira comene ŵapayiniya aŵa mu nyengo yakusuzga iyi. Maxwell na Emmy Lewis, ŵakacimbiramo mwaluŵiro mu nyumba yawo yakwenda nayo na kupona apo vula yankhongono yikawiskira cikhuni cikuru pa nyumba iyi. Maxwell wakalemba kuti: “Vyakucitika vyanthena ivi vikatimbanizga yayi uteŵeti withu ndipo maghanoghano gha kuleka uteŵeti ghakizangako yayi. Pakaŵa nchito yikuru yakuti yicitike ndipo ndiyo ise tikakhumbanga kucita.” Mwakovwirika na ŵabwezi ŵawo, Maxwell na Emmy, ŵakanozga nyumba yawo.

Mazuŵa ghano nagho ngakusuzga. Ndipouli, Ŵakaboni ŵa Yehova ŵamwamphu mamiliyoni ghanandi ŵakulongora mzimu wa kujipata. Nase, nga mbapayiniya ŵakale aŵa, tasimikizga kuti tilutilirenge kupharazga mpaka apo Yehova wazamuyowoyera kuti mbwenu.