KASI MUKUMANYA?

Kasi ŵanthu ŵakapelekanga wuli vyawanangwa mu tempele mu nyengo ya Yesu?

Mu tempele mukaŵa cipinda cakucemeka Mphara ya Ŵanakazi. Mumphepete mwa cipinda ici ndimo mukaŵa vyakuponyamo ndalama vya pa tempele. Buku linyake likuti, mukaŵa vyakuponyamo vyawanangwa vyakukwana 13.—The Temple—Its Ministry and Services.

Vyakuponyamo vyawanangwa ivi ŵakavicemanga kuti mbata, cifukwa ku mulomo vikaŵonekanga nga ni mbata, ndipo musi vikaŵanga visani. Pa mbata yiliyose ŵakalembangapo mtundu wa vyakupeleka. Mu cipinda ici ndimo Yesu wakaŵa apo ŵanthu ŵakapelekanga vyawanangwa vyawo kusazgapo cokoro cikavu.—Luka 21:1, 2.

Mbata yakwamba na yaciŵiri ŵakaponyangamo ndalama za msonkho. Yimoza za caka ico ŵalimo, ndipo yinyake za caka ico cajumpha. Yacitatu mpaka ya 7, ŵakaponyangamo ndalama izo ŵanthu ŵakapelekanga pakugura njiŵa, nkhunda, nkhuni, vyakununkhira, na vinthu vinyake vyagolide. Usange ndalama izo munthu wanguyegha ni zinandi, izo zakhalako wakaziponyanga mu mbata yinyake yiliyose. Ya nambara 8, yikaŵa yakuponyamo ndalama izo zakhalako pa kugulira sembe yakwananga. Ya nambara 9 mpaka 12, yikaŵanga ya ndalama izo zakhalako pakugura sembe za majuvyo, viyuni, sembe za Ŵanaziri, kweniso sembe izo ŵavyoni awo ŵatozgeka ŵakapelekanga. Ya nambara 13 yikaŵa ya vyakupeleka vyawanangwa.

Kasi Luka uyo wakalembako Baibolo wakaŵa wakusanda mdauko wakugomezgeka?

Luka wakalemba buku la Makani Ghawemi ilo likumanyikwa na zina lake kweniso buku la Milimo. Iyo wakati: “Nasanda vinthu vyose makoraghene.” Ndipouli, nkhwantha zinyake zikukayikira pa umo wali kulembera nkhani zinyake. (Luka 1:3) Kasi wakasanda nadi mwakupwelelera?

Ivyo Luka wakalemba ni vyaunenesko cifukwa ni vyakuti munthu wangasanga ukaboni wakusazgikira. Wakazunura za ŵalara ŵa boma ŵa ku Romu. Mwaciyelezgero wakazunura ŵeruzgi ŵa msumba, na ŵalaŵiliri. (Milimo 16:20; 17:6; 19:31) Luka wakazunura kuti Herode ni muwusi wa cigaŵa, na Seregiyo Paulosi kuti nduna. Ndimo vikaŵira nadi.—Milimo 13:1, 7.

Nchakukondweska comene kuti Luka wakazunura maudindo gha ŵalara ŵa Boma la Ŵaroma. Munthu munyake wakumanya vya Baibolo wakati: “Mu buku la Milimo muli kulembeka malo na nyengo iyo vinthu vikacitikiranga. Palije uyo wangasuska. Munthu munyake wakati Luka: “Wali kulemba mdauko mu ndonda yiwemi comene, ndipo palije uyo wakuyana nayo.”