NKHANI YA PA CHIKOPI | KASI ŴANGELO ŴALIKO NADI?

Kasi Baibolo Likuti Wuli za Ŵangelo?

Kasi ŵangelo mbanjani, ŵakafuma nkhu, ndipo ŵakugwira ntchito wuli? Palijeso kunyake uko tingasanga mazgoro gha mafumbo agha padera pa Mazgu gha Chiuta, Baibolo. (2 Timote 3:16) Tiyeni tiwone ivyo Baibolo likuyowoya.

Chiuta ni Mzimu, ndimoso ŵangelo ŵaliri. Ntheura tingaŵawona yayi. Iwo ‘ŵalije thupi na viwangwa.’ Ŵangelo awo mbakugomezgeka ŵakukhala kuchanya pamoza na Chiuta.—Luka 24:39; Mateyu 18:10; Yohane 4:24.
Nyengo zinyake ŵangelo ŵakawonekanga nga mbanthu para ŵatumika na Chiuta kuti ŵachite milimo yinyake pa charu chapasi. Para ŵamara milimo yawo, ŵakawelerangaso kuchanya.—Ŵeruzgi 6:11-23; 13:15-20.
Nangauli Baibolo likuzunura na kulongora nga kuti ŵangelo mbanalume, kweni kuchanya kulije ŵangelo ŵanalume panji ŵanakazi. Ŵangelo ŵakutora yayi. Kweniso ŵangelo ŵandakhalepo pa charu chapasi, ŵandaŵepo ŵabonda nesi ŵana. Iwo ŵakalengeka na Chiuta Yehova; lekani Baibolo likuti ŵangelo ‘mbana ŵa Chiuta.’—Yobu 1:6; Salimo 148:2, 5.
Baibolo likuyowoya za “malulimi gha ŵanthu na gha ŵangelo” kulongora kuti ŵangelo nawo ŵali na chiyowoyero ndipo ŵakuyowoya. Nangauli Yehova wakatumanga ŵangelo pa charu chapasi, kweni wakukhumba yayi kuti tiŵasopenge nesi kulomba kwa iwo.—1 Ŵakorinte 13:1; Chivumbuzi 22:8, 9.
Baibolo likuti ŵangelo ŵalipo vikwi na vikwi, kulongora kuti iwo ŵalipo mabiliyoni ghanandi chomene.a—Daniyeli 7:10; Chivumbuzi 5:11.
Ŵangelo ‘mbankhongono’ kweniso mbamahara chomene kuluska ŵanthu. Vikulongora kuti ŵangelo ŵangachimbira pa sipidi yikuru chomene kuluska chinthu chilichose pa charu chapasi.—Salimo 103:20; Daniyeli 9:20-23.
Nangauli ŵangelo ŵali na mahara kweniso nkhongono zinandi, kweni pali vinthu vinyake ivyo ŵakumanya yayi.—Mateyu 24:36; 1 Petrosi 1:12.
Mungelo waliyose wali kulengeka na wanangwa wakusankha. Ntheura, nga umo viliri na ŵanthu, ŵangelo nawo ŵali na wanangwa kusankha chiwemi panji chiheni. Chachitima ntchakuti ŵangelo ŵanyake ŵakasankha kugalukira Chiuta.—Yuda 6.

a Chikwi ni 10,000. Chikwi chimoza kwandaniska na chikwi chimoza ni 100 miliyoni. Ndipouli, buku la Chivumbuzi likuyowoya kuti ŵangelo ŵalipo “vikwi na vikwi.” Ichi chikulongora kuti ŵangelo ŵalipo mabiliyoni ghanandi chomene!

Maudindo Gha Ŵangelo

Mungelo mukuru, panji kuti Mikayeli, ni mulara wa ŵangelo chomenechomene pa nkhani ya nkhongono na mazaza. Baibolo likulongora mwakupulikikwa makora kuti Mikayeli ni zina linyake la Yesu Khristu.—1 Ŵatesalonika 4:16; Yuda 9.

Ŵaserafi ŵali na mulimo ukuru chomene kuluska ŵangelo wose pa nkhani ya ivyo ŵakuchita na ntchindi izo ŵali nazo, nakuti iwo ŵakwimilira pafupi na chizumbe cha Chiuta.—Yesaya 6:1-3.

Ŵakerubi nawo ŵali mulimo wakuzirwa na wapadera, chomenechomene pakuvikilira utuŵa na zina la Chiuta. Kanandi Baibolo likulongora kuti ŵakerubi mbalinda.—Genizesi 3:24; Ezekiyeli 9:3; 11:22.

Ŵangelo ŵanyake vikwi na vikwi ŵali na mulimo wakuteŵetera ŵanji pakufiska khumbo la Chiuta.b—Ŵahebere 1:7, 14.

b Kuti mumanye vinandi vyakukhwaskana na ŵangelo, ŵazgani mutu 10 mu buku la Kasi Baibolo Likutisambizga Vichi? Kweniso mu buku ili mungaŵazga nkhani ya mutu wakuti, “Mikayeli Mungelo Mukuru” pa Mazgu Ghakuumaliro. Buku ili ndakupharazgika na Ŵakaboni ŵa Yehova. Likusangikaso pa Intaneti pa www.jw.org.