Kasi Mukumanya?

Chifukwa wuli Yesu wakati awo ŵakaguliskanga viŵeto pa tempile ku Yerusalemu ŵakaŵa “ŵankhungu”?

BUKU la Makani Ghawemi ilo Mateyu wakalemba likuti, “Yesu wakanjira mu tempile na kuchimbizgira kuwaro wose awo ŵakaguliskanga na kugura mu tempile. Wakagadabura mathebulu gha ŵakusintha ndalama na vitengo vya ŵakuguliska nkhunda. Ndipo wakati kwa iwo: “Kuli kulembeka, ‘Nyumba yane yichemekenge nyumba yakusoperamo,’ kweni imwe mukuyizgora mphanji ya ŵankhungu.””—Mat. 21:12, 13.

Mbiri iyo yikalembeka na Ŵayuda, yikulongora kuti ŵamalonda awo ŵakaguliskanga pa tempile, ŵakatchajanga mtengo ukuru chomene. Kweni vinthu vinyake ivyo Ŵayuda ŵakalemba, vikulongora kuti pakati pajumpha vyaka 50 kufuma apo Yesu wakaŵira pa charu, mtengo wa njiŵa ziŵiri ukakwera chomene. Ukakwananga dinari limoza. Kuti munthu mukavu wasange ndalama iyi, wakeneranga kugwira ganyu mazuŵa 25. Ŵakavu ŵakazomerezgekanga kupeleka njiŵa panji nkhunda kuŵa sembe. Kweni mtengo wa vinthu ivi ukakwera chomene mwakuti ŵakatondekanga kufiska. (Lev. 1:14; 5:7; 12:6-8) Rabi Simoni ben Gamaliyeli, wakakwiya chomene na ivyo ŵanthu aŵa ŵakachitanga ndipo wakachepeskako sembe izo ŵanthu ŵakeneranga kupeleka. Kweniso wakakhizgako mtengo wa njiŵa ziŵiri.

Nga umo tawonera mu nkhani iyi, chikaŵa chakwenelera nadi kuti Yesu wayowoye kuti ŵamalonda aŵa ŵakaŵa “ŵankhungu,” chifukwa ŵakalyeranga ŵanthu masuku pa mutu kweniso ŵakaŵa ŵaryezi.