Kalata Yakufuma ku Wupu Wakulongozga
Ŵakutemweka Ŵakaboni Ŵanyithu:
Tili na mwaŵi kuti tikumanyikwa na zina la Yehova, uyo ni Muwusi wa Cilengiwa Cose. Zina la Yehova ndamuyirayira, lizamufwapo yayi, ndipo tingaliyaniska yayi na zina linyake lililose. Yehova ndiyo wali kutipa zina lapadera ili, ndipo tikamba kumanyikwa nalo mu cilimika ca 1931. (Yes. 43:10) Tikunotha kuti ndise Ŵakaboni ŵa Yehova.
Dyabulosi wakuyezgayezga kuti wasisite zina la Ciuta, ndipo wakuthera yayi. Ndiyo wakupangiska kuti ŵanthu ŵakanenge zina la Yehova. Babuloni Mukuru, uyo ni ufumu wa caru cose wa cisopa cautesi, wakutinkha zina la Ciuta, ndipo waliwuskamo mu Mabaibolo ghanandi. Kweni Yesu wakazirwiskanga comene zina la Ŵawiske. Ndilo wakaliŵika pakwamba apo wakasambizganga ŵasambiri ŵake kulomba. Wakati: “Mukwenera kulomba mu nthowa iyi: ‘Ŵadada ŵithu imwe muli kucanya, zina linu lituŵiskike.’” (Mat. 6:9) Nyengo yinyake apo wakalombanga kwa Ŵawiske, Yesu wakati: “Navumbura zina linu ku ŵanthu awo mukanipa kufuma mu caru.” (Yoh. 17:6) Pakuti tikukhumba kulondezga Yesu, tikufwilirapo comene kupharazga mwamwamphu zina la Yehova pa caru cose.
Lemba la cilimika ca 2009 likaŵa lakuti, “Kupanikizgira Ivangeli.” Likaticiska kuti ticite mwakukwana uteŵeti withu. (Mil. 20:24) Tikukayika yayi kuti Yehova wakatitumbika comene mu cilimika camara ca uteŵeti. Tikapharazga comene pa caru cose mwakuti zina la Yehova likapika ucindami. Ŵapharazgi ŵakukwana 7,313,173 ŵakacita mulimo wa kupharazga ndiposo wa kusambizga ŵanthu ŵawemi mtima awo ŵakukhumba kumanya umo masuzgo ghawo ghazamumalira. Ŵanthu ŵakukwana 18,168,323 ŵakiza pa Cikumbusko ca Nyifwa ya Khristu. Ici cikulongora kuti pali ŵanthu ŵanandi awo ŵangacema pa zina la Yehova pambere mgonezi uwu undamare.
Para Yehova wazomerezga, tilutilirenge kupharazga makani ghawemi gha Ufumu mwamwamphu, ndipo tiyezgenge nthowa yiliyose kuti tifikire ŵanthu ŵanandi mu vigaŵa vithu. (Mat. 24:14; Mrk. 13:10) Kwali tikupharazga ku nyumba na nyumba, mu misewu, pa kalata na pa telefoni, panji mwamwaŵi, mphanyi tayezgayezga kumanyiska ŵanthu ŵanandi zina la Yehova ndiposo cilato cake.
Tikugomezga kuti sonosono apa Yehova wacitengepo kanthu kuti watuŵiske zina lake. (Ezek. 36:23) Nyengo yakhala yicoko yakuti wose awo ŵakunyoza zina la Yehova ŵaparanyike. Lizamuŵa zuŵa lakukondweska comene kwa ŵateŵeti ŵakugomezgeka ŵa Yehova, awo ŵapharazganga zina la Yehova ndiposo kukhozgera muwuso wake.
Pa nyengo ya Maungano gha Cigaŵa ndiposo gha Mitundu Yose gha mutu wakuti “Muŵenge Maso!” agho ghakacitika pa caru cose mu cilimika ca 2009, Yehova wakalongora kuti wakupwelelera ŵanthu ŵake. Maungano agha ghakaŵa ghapadera comene, ndipo ghakaticiska kuti tiŵe maso comene cifukwa zuŵa la Yehova lili pafupi.—Mrk. 13:37; 1 Tes. 5:1, 2, 4.
Yehova wakuticitira vinthu viwemi, ndipo wakuzuzga mitima yithu na cimwemwe. Wakutipangiska kuti tigone mu maluhari ghakutikitira na kutilongozgera ku maji ghakudama.—Sal. 23:1, 2; 100:2, 5.
Tikugomezga kuti Yehova walutilirenge kumutumbikani apo mukulutilira kumuteŵetera mu myezi yakulondezgapo.
Tikumutemwani comene ndipo pokerani monire withu Wacikhristu,
Ndise ŵabali ŵinu,
Wupu Wakulongozga wa Ŵakaboni ŵa Yehova