Sambizgani Mwakukopa
1. Kasi kugwiliskira nchito makora Mazgu gha Ciuta kukukhumba vici?
1 Ŵapharazgi ŵaluso ŵakughanaghana nga ni mpositole Paulosi. Ŵakumanya kuti ni vinandi vikukhumbikwa kuti ‘ŵacite mwakwenelera na mazgu gha unenesko’ kuluska kuzunura waka Malemba Ghatuŵa. (2 Tim. 2:15) Kasi ‘mungakopa’ wuli ŵanthu para mukuŵasambizga Mazgu gha Ciuta?—Mil. 28:23.
2. Kasi mungacitaci kuti ŵanthu ŵazirwiskenge Mazgu gha Ciuta?
2 Muŵazgirani Mazgu gha Ciuta: Para mukukhumba kuŵazgira munthu Baibolo, cakwamba yowoyani mazgu agho ghangamupangiska kuzirwiska vinjeru vyakufuma kwa Ciuta ivyo vilimo. Mutegherezgi withu wategherezgenge comene Lemba ilo tikumuŵazgira para wawona kuti tikuzirwiska Mazgu gha Ciuta. (Heb. 4:12) Pambere tindaŵazge lemba, panji tingayowoya kuti: “Pa nkhani iyi, nasanga kuti nchakovwira kumanya maghanoghano gha Ciuta. Wonani ivyo mazgu ghake ghakuyowoya.” Ŵazgirani munthu Mazgu gha Ciuta nyengo yiliyose usange nchamacitiko.
3. Para mwaŵazga lemba, kasi mungacitaci kuti movwire mutegherezgi winu kuti wapulikiske ng’anamuro lake?
3 Caciŵiri, longosorani lemba ilo mwaŵazga. Ŵanthu ŵanandi vikuŵasuzga kupulikiska lemba usange nkhakwamba kulipulika. Kanandi nchakovwira kulongosora kukolerana uko kulipo pakati pa lemba ilo taŵazga na nkhani iyo tikudumbiskana. (Luka 24:26, 27) Longorani apo pali fundo yikuru mu lemba ilo mwaŵazga. Mungafumba fumbo kuti mumanye usange wapulikiska fundo.—Zinth. 20:5; Mil. 8:30.
4. Kuti muŵe ŵakukopa pakusambizga, nchinthu wuli caumaliro ico mukwenera kucita?
4 Dumbiskanani Malemba: Cacitatu, yezgayezgani kumucontha. Movwirani mutegherezgi winu kuti wawone umo lemba ilo likumukhwaskira. Kudumbiskana lemba na munthu kungamovwira kuti wasinthe kaghanaghaniro kake. (Mil. 17:2-4; 19:8) Mwaciyelezgero, para taŵazga lemba la Salmo 83:18 tingadumbiskana nayo kuzirwa kwa kumanya zina la munthu mwakuti tiŵe nayo paubwezi. Pamanyuma, tingafumba kuti: “Kasi mukughanaghana kuti malurombo ghinu ghangaŵa ghakupulikikwa cifukwa ca kumanya zina la Ciuta?” Munthu uyo tikumupharazgira wangazirwiska comene lemba ilo taŵazga para wangawona umo likumukhwaskira. Ŵanthu ŵa mitima yiwemi ŵangamba kusopa Ciuta waunenesko na wamoyo, Yehova, usange tingaŵasambizga Mazgu gha Ciuta mwakukopa.—Yer. 10:10.