‘Makani Ghawemi Agha Ghazamupharazgika’
1. Kasi tikumanya wuli kuti palije ico cingatondeska mulimo wa kupharazga?
1 Palije ico cingatondeska Yehova kucita khumbo lake. (Yes. 14:24) Nangauli cikawonekanga kuti cingacitika yayi kuti Mweruzgi Gidiyoni na ŵanalume ŵake 300 ŵathereske ŵasilikari ŵa Midiyani 135,000, Yehova wakamuphalira kuti: “Uthaske Ŵaisrayeli mu woko la Ŵamidiyani; kasi ndirije kukutuma?” (Ŵeru. 6:14) Kasi ni mulimo wuli uwo Yehova wakovwira mazuŵa ghano? Yesu wakati: “Makani ghawemi agha gha ufumu, ghazamupharazgika mu caru cose.” (Mat. 24:14) Palije uyo watondeskenge mulimo uwu kucitika.
2. Cifukwa wuli tingalindizga kuti Yehova wawovwirenge waliyose payekha mu uteŵeti?
2 Yehova Wakovwira Waliyose Payekha: Tikugomezga kuti Yehova walutilirenge kovwira Ŵakaboni ŵake nga ni gulu, kweni kasi tingalindizga kuti Yehova wawovwirenge waliyose payekha? Pa nyengo iyo wakakhumbikwiranga wovwiri, mpositole Paulosi wakawona kuti Yehova wakamovwira kwizira mwa Mwana wake, Yesu. (2 Tim. 4:17) Mwakuyana waka, nase tingaŵa na cigomezgo kuti Yehova watumbikenge ivyo waliyose wakuyezgayezga kucita kuti khumbo lake lifiskike.—1 Yoh. 5:14.
3. Kasi Yehova wakutovwira para tili mu ukhaliro wuli?
3 Kasi vyenjezgo vya pa umoyo vikumupokani nkhongono zakucitira uteŵeti? Ciuta “wakupa nkhongono ŵakulopwa.” (Yes. 40:29-31) Kasi mukutambuzgika panji kususkika? “Katundu wako umuyeghiske Yehova ndipo Iye tiwakufighilire.” (Sal. 55:22) Kasi nyengo zinyake mukucita wofi? “Luta, Ine tindiŵenge na mulomo wako.” (Ex. 4:11, 12) Kasi mukutondeka kucita vinandi mu uteŵeti cifukwa ca ulwari? Yehova wakuzirwiska ivyo mukucita ndipo wangavipangiska kuti viwovwire ŵanji nanga vingaŵa vicoko.—1 Kor. 3:6, 9.
4. Kasi tikukhozgeka wuli cifukwa ca kugomezga Yehova?
4 Woko la Yehova “lanyoloskeka, kasi ndi njani tiwalikhwinyatiske?” (Yes. 14:27) Tikwenera kuŵa na cigomezgo kuti Yehova watitumbikenge apo tikucita uteŵeti. Ntheura tiyeni tilutilire kupharazga “na cikanga pakuŵa na mazaza kufuma kwa Yehova.”—Mil. 14:3.