Kasi Mungapharazga pa Zuŵa la Sabata?
1. Kasi tikusambirako vici ku ivyo Paulosi na ŵanyake ŵakacita mu Filipi?
1 Pakaŵa pa Sabata, zuŵa ilo Ŵayuda ŵanandi mu Filipi ŵakapumuranga. Paulosi na ŵanyake ŵakaŵa mu msumba uwu pa ulendo unyake wa umishonale. Nawo ŵakhumbenge mphanyi ŵakapumura ndipo pakaŵavya wakuŵasuska, kweni ndimo ŵakacitira yayi. Ŵakamanya kuti Ŵayuda ŵawungana kuwaro kwa msumba kuti ŵalombe, ntheura ŵakasangirapo mwaŵi kuti ŵaŵapharazgire. Paulosi na ŵanyake ŵakwenera kuti ŵakakondwa comene apo Lidiya wakategherezga ndipo ŵamunyumba yake wose ŵakababatizika. (Mil. 16:13-15) Pakuti ŵanandi ŵakupumura pa zuŵa la Sabata, nase tili na mwaŵi wa kuŵapharazgira.
2. Kasi ŵanthu ŵa Yehova ŵatonda masuzgo wuli mwakuti ŵapharazgenge pa Sabata?
2 Ŵakatonda Masuzgo Mwakuti Ŵapharazgenge pa Sabata: Mu 1927, ŵanthu ŵa Yehova ŵakaciskika kupatura nyengo pa zuŵa la Sabata kuti ŵapharazgenge. Pa cifukwa ici ŵanthu ŵakaŵawukira. Ku United States ŵanandi ŵakakakika cifukwa ŵakatenge ŵapharazgi ŵakuswa malango gha zuŵa la Sabata, ŵakutimbanizga mtende, na kuguliska malonda kwambura layisensi. Kweni ŵanthu ŵa Yehova wakathera yayi. Ca m’ma 1930, ŵakaghanaghana kuti ŵapharazgenge mu cigaŵa cikuruko. Ico ŵakacitanga nchakuti ŵapharazgi ŵa mipingo yapafupi ŵakakumananga kuti ŵapharazgire lumoza mu cigaŵa. Nyengo zinyake, ŵapharazgi ŵanandi comene ŵakakakikanga mwakuti ŵamazaza ŵakasoŵanga cakucita nawo. Kasi mukuwona umo ŵabali aŵa ŵakajipatira mwakuti tipharazgenge mwawanangwa pa Sabata?
3. Cifukwa wuli zuŵa la Sabata ndiwemi comene pa nkhani ya kupharazga?
3 Zuŵa Liwemi Comene Lakupharazgira: Pa Sabata, ŵanandi ŵakugwira nchito yayi. Kanandi ŵakuŵa ŵakutangwanika yayi. Ŵanji awo ŵakusopa ŵakuzomera kudumbiskana nawo vya Ciuta pa zuŵa ili. Usange tikuwungana pa Sabata, tinganozgekeraso kuti tikapharazge, pambere tindacite ungano panji para tafuma. Nchipusu kucita ntheura cifukwa tikuŵa kuti tavwara kale makora. Usange nchakukhumbikwa, mungayeghako kacakurya.
4. Kasi mbuwemi wuli uwo ungaŵapo para tikupharazga pa Sataba?
4 Tingapharazga pa Sabata na kusangaso nyengo yakupumulira. Ndipo pakupumura tizamuŵa ŵakukhorwa cifukwa ca candulo ico cikuŵapo para tacita uteŵeti wakupatulika. (Zinth. 19:23) Nakuti tingaŵa ŵacimwemwe cifukwa ca kusanga munthu wa nga ni Lidiya!