Kasi Ŵana Ŵinu Mbakunozgeka?
1. Cifukwa wuli ŵana ŵa sukulu ŵakwenera kunozgeka?
1 Kwakhala pacoko waka kuti sukulu zambe. Masuzgo ghakupamba yayi ku sukulu. Ndipouli, ŵana ŵamuŵaso na mwaŵi wa ‘kucitira ukaboni unenesko.’ (Yoh. 18:37) Kasi mbakunozgeka?
2. Kuti ŵana ŵinu ŵaŵe ŵakunozgeka, ŵakwenera kumanya vici?
2 Kasi ŵakumanya kuti pali vinthu vinyake ivyo usange ŵangacitako ŵangalongora kuti ŵakutemweska caru cawo? Kweniso kasi ŵakumanya kuti maholide ghanyake ghakambika na ŵanthu ŵambura kusopa Ciuta? Kasi ŵakumanya uheni wa kucitako maholide agho? Kasi mbakunozgeka kuzgora para ŵanji ŵakuŵacicizga pa nkhani ya masambiro ghapacanya, vibwezi, na vyakuloŵezga? Kasi ŵamuzgora kuti ŵakukana kucita vinthu ivi cifukwa ca cisopa panji ŵamulongosora makora ivyo ŵakugomezga?—1 Pet. 3:15.
3. Pa Nyengo Yakusopera ya Mbumba, ŵapapi ŵangawovwira wuli ŵana ŵawo kuti ŵaŵe ŵakunozgeka?
3 Ŵawovwirani pa Nyengo Yakusopera ya Mbumba: Mukwenera kuti mudumbiranenge masuzgo agho ghaŵengepo pa nyengo ya sukulu. Ndipouli, kuti ŵana ŵaŵe ŵakunozgeka, nchiwemi kudumbirana nawo masuzgo agha pambere sukulu zindambe. Mungadumbiskana vinthu ivi kamoza panji kanandi waka pa Nyengo Yakusopera ya Mbumba. Kuti mumanye nkhani iyo mungadumbiskana na ŵana ŵinu, ŵafumbani ivyo ŵakwenjerwa navyo para ŵakughanaghana vya kuwelera ku sukulu. Mungaweleramo fundo zinyake izo mukadumbiskana vilimika vyakumasinda, cifukwa sono mbalarako ndipo ŵakupulikiska vinthu kuluska kale. (Sal. 119:95) Nyengo zinyake mungayezgelera kuti ndimwe msambizgi, munjirikizgi, panji mwana wa sukulu. Sambizgani ŵana umo ŵangazgolera mafumbo kufumira mu Baibolo na umo ŵangasangira wovwiri mu mabuku nga ni Kukambitsirana za m’Malemba kweniso Mayankho a Zimene Achinyamata Amafunsa. Nthowa iyi ndiyo wakacita mupapi munyake pakovwira ŵana umo ŵangayowoyera na ŵasambizgi ŵaphya na kuŵamanyiska kuti iwo Mbakaboni ŵa Yehova.
4. Kasi ŵapapi ŵavinjeru ŵacitenge wuli?
4 Mu mazuŵa ghaumaliro agha, pali vinandi ‘vyakusuzga’ ivyo vikucitikira Ŵakhristu awo mbawukirano. (2 Tim. 3:1) Ŵapapi ŵavinjeru ŵakuwonerathu masuzgo agho ŵana ŵawo ŵangakumana nagho. (Zinth. 22:3) Pambere sukulu zindambe, ŵikanipo mtima kovwira ŵana ŵinu kuti ŵaŵe ŵakunozgeka.