Lembani Lipoti Launenesko la Uteŵeti wa m’Munda na Kupeleka Luŵiro
1. Kasi tikujipulika wuli para tapulika viwemi ivyo vikucitika mu uteŵeti wa m’munda?
1 Tose tikukondwa para tapulika vinthu viwemi ivyo vyacitika mu nchito ya kupharazga uthenga Waufumu. (Wonani Zintharika 25:25.) Pamanyuma pa nkhani yakukondweska iyo Petrosi wakayowoya pa Pentekoste, “ŵanthu pafupifupi vikwi vitatu ŵakasazgikako.” (Mil. 2:41) Ndipo pakati pajumpha nyengo yicoko waka, ciŵelengero cikakwana “pafupifupi vikwi vinkhondi.” (Mil. 4:4) Naco nchimwemwe ico Ŵakhristu ŵanyithu ŵakaŵa naco pakupulika ivyo vikacitika! Mazuŵa ghano, nase tikukondwa na malipoti ghawemi.
2. Nchivici cikukhumbikwa kuti tiŵe na lipoti launenesko?
2 Tikukondwa kupulika kuti mulimo wa kupharazga uwo ŵabali ŵithu ŵakucita pa caru cose capasi ukwenda makora. Pakuti mwezi wa Ogasiti ukuŵa waumaliro mu cilimika ca uteŵeti, pakukhumbikwa nyengo yakukwana kuti lipoti lisazgike pamoza. Ntheura, cikuŵa cakovwira usange ŵapharazgi wose ŵapeleka malipoti mwaluŵiro. Kasi mukuŵikapo mtima kupeleka lipoti mwaluŵiro mwezi uliwose?
3. Kasi malipoti ghaunenesko ngakovwira wuli kwa ise kweniso ku gulu la Yehova?
3 Malipoti ghakuyowoya vya kusazgikira kwa mulimo withu ghakuŵa ghakukondweska. Kweniso malipoti ghakovwira gulu kuti limanye umo nchito yikwendera pa caru cose. Ghakovwiraso kuti gulu limanye wovwiri uwo ungapelekeka panji mtundu na unandi wa mabuku agho ghakwenera kusindikizgika. Ŵalara pa mpingo ŵakovwirika na malipoti para ŵakukhumba kumanya ivyo mpingo ukutondeka mwakuti ŵawovwirepo. Malipoti ghawemi ghakuŵa ghakukhozga, ghakovwira waliyose kuti wasande uteŵeti wake na kusintha apo mphakukhumbikwa.
4. Kasi pali ndondomeko wuli mu mpingo yakuti ŵapharazgi panji ŵalara ŵalondezge kuti ŵatumizgenge lipoti launenesko ku ofesi ya munthavi mwezi uliwose?
4 Mwezi uliwose, ŵapharazgi ŵakwenera kumanya kuti nchakukhumbikwa kupeleka lipoti la uteŵeti wa m’munda mwaluŵiro. Ŵapharazgi ŵangaŵika malipoti ghawo mu bokosi ku Nyumba ya Ufumu para ŵakhumba panji usange ŵatondeka kupeleka kwa mulaŵiliri wa gulu. Mulembi wa mpingo wakwenera kuwuskamo malipoti mu bokosi mwezi uliwose. Mulaŵiliri wa gulu wakwenera kupokera malipoti ghose gha gulu lake na kuwoneseska kuti ghapelekeka kwa mulembi mwaluŵiro mwakuti ghasazgike pamoza na ghanyake. Mupharazgi panji mupayiniya waliyose pa mpingo wakwenera kupeleka lipoti lake mwaluŵiro mwezi uliwose. Pakuti ŵalaŵiliri ŵa magulu ŵakovwira nakale awo ŵakunjira viŵi yayi mu uteŵeti wa m’munda, ipo ŵakwenera kukumbuska ŵapharazgi vya malipoti pa nyengo yakunozgekera uteŵeti paumaliro wa mwezi.
5. Kasi mupharazgi waliyose wangawovwira wuli kuti lipoti liŵe launenesko, ndipo fomu ya Lipoti la Uteŵeti wa m’Munda (S-4) njakovwira wuli?
5 Kasi Ŵapharazgi Ŵangawovwira Wuli Kuti Lipoti Liŵenge Launenesko? Kuti lipoti liŵe launenesko, maora ghamsuma ndigho ghakwenera kupelekeka ku mpingo. Kweni mupharazgi uyo ni mulwari mwakuti wangakwaniska yayi ora limoza, wangapeleka maminiti 15 mwakuzomerezgeka na Komiti ya Uteŵeti ya Mpingo. Nyengo iyo yindakwane ora, mupharazgi wakwenera kusunga na kusazga pa lipoti la mwezi wakulondezgapo. Nchiwemi kulemba pamphepete nyengo iyo tamalira mu uteŵeti, mabuku agho tagaŵira, na unandi wa maulendo ghakuwelerako. Para mwezi wamara, tikusazga waka unandi wa vinthu ivi, kuluska kughanaghanira waka. Fomu ya Lipoti la Uteŵeti wa m’Munda (S-4) iyo tikutora ku mpingo njakovwira pa nkhani iyi.
6. (a) Kasi mphawuli apo tingapenda ulendo wakuwelerako?
6 Mphawuli Apo Tingapenda Ulendo Wakuwelerako? Kuti tipende ulendo wakuwelerako, tikwenera kulutaso kwa munthu uyo tikamupharazgira kale. Tingamba kupenda nyengo iyo tamalira mu uteŵeti kweniso maulendo ghakuwelerako para tagaŵira magazini ku ŵanthu awo ŵakupokera magazini ghithu nyengo zose, para tikupharazgira munthu kaciŵiri pa foni, na para tikulembera kalata munthu uyo tikamupharazgirapo. Nyengo yiliyose para tikucitiska sambiro la Baibolo, tikwenera kupenda ulendo wakuwelerako. Unandi wa masambiro gha Baibolo agho ghacitika mukati mwa mwezi ghakwenera kulembeka musi pa kabokosi cakumalyero kwa fomu ya Lipoti la Uteŵeti wa m’Munda (S-4).
7. Kasi tikwandula wuli para tikulondezga ulongozgi uwo gulu likutiphalira?
7 Mupharazgi waliyose uyo wakulondezga ulongozgi uwu, uwo gulu lapeleka, wazamuŵa wakukondwa kuti wawovwira kupeleka lipoti launenesko la mulimo uwo Ŵakaboni ŵa Yehova ŵakucita pa caru cose. (Yelezgerani na Ezekiel 9:11.) Mphanyi tose tapeleka lipoti launenesko la uteŵeti wa m’munda mwaluŵiro!