Kasi Yehova Wakuwona Vici mwa Ise?
1. Kasi Yehova wakukondwa para wawona vinthu wuli mu mitima ya ŵanthu?
1 Baibolo likutiphalira ivyo Yehova wakukhumba kuwona mu ŵateŵeti ŵake. Iyo wakukondwa para wakuwona nkharo yithu yiwemi, kweniso ivyo tikumucitira. Themba Davide likaphalira mwana wake Solomoni kuti “Ciuta wakupenjapenja mitima yose, ndipo wakumanyiska kaghanaghaniro kalikose.” (1 Mid. 28:9) Caru cazura na ŵanthu ŵakutemwa nkhaza na kutinkhana. Ntheura para Yehova wakusanda mitima ya ŵanthu, ndipo wasanga yumoza uyo wakutemwa mtende, unenesko na urunji, wakukondwa comene! Kasi Yehova wakujipulika wuli para wasanga munthu uyo wakumutemwa, wakukhumbisiska kusambira vya Iyo, na kuphalirako ŵanji ivyo wakusambira? Wakuti wakuŵamanya awo ŵakuphalira ŵanji vya iyo. Nakuti wali na “buku la cikumbusko” ilo wakulembamo mazina gha “awo ŵakumopa Yehova na kulanguruka na zina lake.” (Mal. 3:16) Ivi vikumukondweska comene.
2. Kasi tikucita milimo wuli yinyake iyo yikukondweska Yehova?
2 Kasi ni milimo wuli yinyake iyo Yehova wakukondwa nayo? Wakukondwa na ivyo tikucita pakulondezga Mwana wake, Yesu Khristu. (1 Pet. 2:21) Mulimo unyake uwo Ciuta wakukondwa nawo nkhupharazga makani ghawemi gha Ufumu wake. Pa Ŵaroma 10:15, tikuŵazga kuti: “Nako nkhutowa kwa malundi gha awo ŵakupharazga makani ghawemi gha vinthu viwemi!” Tingawona nga malundi ghithu ‘ngakutowa’ yayi. Kweni kutowa uko ŵakuyowoya apa ni ivyo ŵateŵeti ŵa Yehova ŵakucita pakupharazga makani ghawemi. Vyose ivyo ŵakucita ni vyakutowa na vyakuzirwa mu maso ghake.—Mat. 24:14; 28:19, 20.
3. Kasi tikumanya wuli kuti Yehova wakukondwa para tikuzizipizga masuzgo?
3 Kweniso Yehova wakukondwa comene para tikuzizipizga. (Mat. 24:13) Kuluwa yayi, Satana wakukhumba kuti timugalukire Yehova. Zuŵa lililose para mwagomezgeka kwa Yehova, ndikuti mwamovwira kuzgora Satana. (Zinth. 27:11) Nyengo zinyake cikuŵa cinonono kuzizipizga. Umoyo tingawuwona kuŵa wakusuzga cifukwa ca matenda, ukavu, maghanoghano, na masuzgo ghanyake. Kweniso tingathika lusoko cifukwa cakuti ivyo tikagomezganga vyatondeka. (Zinth. 13:12) Kweni usange tazizipizga pa nyengo ya suzgo ndipo Yehova wakukondwa comene. Lekani Davide wakalomba Yehova kuti wasunge masozgi ghake mu “supa,” kweniso wakafumba mwakusimikizga kuti: “Asi ghali mu buku linu?” (Sal. 56:8) Yehova wakukumbuka masozi ghose agho tikuthiska cifukwa ca masuzgo agho tikuzizipizga mwakuti tilutilire kugomezgeka kwa iyo. Igho ngakuzirwa kwa iyo.
4. Ni maghanoghano wuli agho ghakwendamo yayi mwa Yehova?
4 Kweni mitima yithu yikutemwa kutisuska, ndipo tingawona nga tili ŵambura kwenelera kwa Ciuta. Mtima withu ungatiphalira kuti: ‘Kuli ŵanandi awo ŵakucita makora kuluska ine. Yehova wakwenera kuti wakukhuŵara para wakuniyaniska na iwo!’ Kweni Yehova wakuyaniska ŵanthu yayi; nakuti walije maghanoghano ghantheura. (Gal. 6:4) Iyo ngwaluso pakusanda mitima yithu, ndipo wakuwonamo tuwemi, nanga tungaŵa tucoko.