Bokosi la Fumbo

◼ Kasi ni vici ivyo tikwenera kumanya para tikukhumba kuti gulu la Yehova lizakatore katundu withu munyake para tafwa?

Para munthu wafwa, wakuŵavya mazaza pa katundu wake. (Muph. 9:5, 6) Ndico cifukwa cake ŵanandi ŵakulemberathu awo ŵazamutora katundu wawo para ŵafwa. Ŵakulemba pa pepara ilo mu Cingelezi ŵakulicema kuti ‘will.’ (2 Mathe. 20:1) Para mukulemba awo mukukhumba kuti ŵazakatore katundu para mwafwa, mukweneraso kulembapo munthu uyo mwamupa mazaza gha kugaŵa katundu. Mu vyaru vinandi, boma ndilo likugaŵa katundu para munthu wandalemberethu awo ŵazamutora katundu wake. Ntheura, usange muli na katundu munyake uyo mukukhumba kuti gulu la Yehova lizakatore para mwafwa, nchakuzirwa kulemberathu. Mukweneraso kusora mwamahara munthu uyo mukukhumba kuti wazakagaŵe katundu.

Munthu uyo musorenge wali na mulimo ukuru comene. Kuyana na unandi wa katundu winu, wakwenera kuwunganya pamoza katundu yose na kumugaŵa kwa awo mukalemba. Kucita vyose ivi kukutora nyengo. Kweniso pakuŵaso malango gha boma agho wakwenera kulondezga pakugaŵa katundu. Ni waliyose yayi mu mpingo uyo mungamupa mulimo uwu na kumugomezga kuti wangafiska pakuti ni mubali. Munthu uyo musankhenge wakwenera kuŵa uyo mukumanya kuti wangacita makora, ngwakugomezgeka, kweniso wakukhumbisiska kulondezga ivyo imwe mukalemba. Wonani nkhani ya mutu wakuti “Kasi Mukusanga Cimwemwe Cifukwa ca ‘Kupeleka Mwalusungu’”? mu Gongwe la Mulinda la Novembala 15, 2011.

Usange Mwapempheka Kuti Muzakagaŵe Katundu: Usange mwapempheka kuti muzakagaŵe katundu para mweneco wafwa, cakwamba mukwenera kupendesera mtengo na kuwona usange mungakwaniska. (Luka 14:28-32) Usange mweneco wa katundu wafwa, mukwenera kuzakamanyiska wose awo wakalemba kuti ŵazakapoke katundu. Kwali katundu ni munandi panji ni mucoko, uyo wapika mulimo uwu wakwenera kumanya kuti walije mazaza gha kusintha ivyo vikalembeka. Cawanangwa cilicose ico capika ku Watch Tower Society, panji wupu uliwose wa Ŵakaboni ŵa Yehova, ndikuti ncha gulu la Yehova.—Luka 16:10; 21:1-4.