“Jisungilirani mu Citemwa ca Ciuta”
1. Kasi buku la “Jisungilirani mu Citemwa ca Ciuta lili kulembeka na cilato wuli?
1 Kwamba pa Seputembala 16, 2013, tizamwamba kusambira buku la “Jisungilirani mu Citemwa ca Ciuta” pa Sambiro la Baibolo la Mpingo. Kalata iyo yili pa peji 3 mu buku ili, iyo Wupu Wakulongozga uli kulembera waliyose uyo wakutemwa Yehova, yikumalizga na mazgu ghakuti: “Tili na cigomezgo cose kuti buku ili limovwiraninge kuti mulutilire kulondezga unenesko uwo mukusambira pa umoyo winu na kujisungilira ‘mu citemwa ca Ciuta . . . ico cikulongozgera ku umoyo wamuyirayira.’—Yuda 21.”
2. Kasi buku ili lizamutovwira pa nkhani zini?
2 Ivyo Tizamusambira: Kasi fundo za mu Baibolo zikutovwira wuli pa nkhani ya mendezgano, vyakusanguluska, kucindika ŵamazaza, vizgoŵi ivyo tili navyo, nthengwa, kayowoyero, ndiposo tumitheto twa ŵanthu? Njuŵi yithu yizamusambizgika makora mwakuti ticitenge vinthu kuyana na fundo zapacanya izo zili mu Mazgu gha Ciuta. (Sal. 19:7, 8) Para tamba kupulikiska maghanoghano gha Yehova, tizamukhumbisiska kuti timukondweske. Ici cizamutovwira kuti timupulikirenge pa vyose ivyo tikucita pa umoyo withu.—Zinth. 27:11; 1 Yoh. 5:3.
3. Cifukwa wuli tikwenera kuzakazgorapo sabata yiliyose?
3 Nozgekerani kuzakazgorapo: Para mukunozgekera, muzakaŵe na cilato cakuti mukalumbe Ciuta pakati pa ŵanthu ŵake. (Heb. 13:15) Pakuti tizamusambiranga ndime zicoko waka, tizakanozgekerenge makora kuti tikazgorepo ivyo tasambira. Fundo izo tanozgekera makora zizamukhuŵilizga ŵanji ku citemwa na milimo yiwemi ndiposo zizamovwira kuti sambiro lizakaŵe lacandulo na lakukhozga. (Heb. 10:24) Kweniso, tizamukondwa comene apo tizamuyowoyanga cipulikano cithu.
4. Cifukwa wuli nchakuzirwa comene kusunga malango gha Yehova?
4 Pa usiku waumaliro wa umoyo wake pa caru capasi, Yesu wakati kusunga malango gha Yehova nkhwakukhumbikwa kuti munthu wakhalilire mu citemwa ca Ciuta. (Yoh. 15:10) Buku la “Citemwa ca Ciuta” lizamutovwira comene kuti tilutilire kulondezga fundo za mu Baibolo nyengo zose ndiposo kuti ‘tijisungilire mu citemwa ca Ciuta.’—Yuda 21.