Pharazgani Makani Ghawemi pa M’pata Uliwose
1. Kasi tingasambirako vichi kwa Davide?
1 Davide wakagongowanga yayi para ivyo wakakhumbanga kuchita vyatondeka. Mwachiyelezgero, Davide wakakhumbanga kumuzengera nyumba Yehova. Kweni wati wakanizgika, Davide wakasintha ivyo wakakhumbanga kuchita ndipo wakanozga waka vinthu vyakuti mwana wake Solomoni wazakazengere tempile. (1 Mathe. 8:17-19; 1 Mid. 29:3-9) M’malo mwakughanaghanira ivyo wangachita yayi, Davide wakaŵika mtima pa ivyo wangafiska. Kasi tingamuyezga wuli Davide pakupharazga makani ghawemi gha Ufumu?
2. Kasi tikwenera kughanaghanira vichi?
2 Chitani Ivyo Mungafiska: Ŵanandi ŵakusintha vinthu vinyake kuti ŵachite upayiniya wakanyengo panji wanyengozose. (Mat. 6:22) Kasi namwe mungasintha vinthu vinyake? Para mungalomba na kuwona umo vinthu viliri, musangenge kuti “mulyango ukuru wakulongozgera ku mulimo” wamujulikirani. Usange ni nthena, pharazgani pa m’pata uwo wasangika.—1 Kor. 16:8, 9.
3. Kasi tingachita vichi para tingafiska yayi kuchita upayiniya?
3 Wuli usange mungakwaniska yayi kuchita upayiniya? Mungachita ivyo mungafiska. Mwachiyelezgero, mungapharazgira awo mukugwira nawo ntchito para m’pata wasangika. Panji usange mukulwara, mungapharazgira awo ŵakumovwirani para Mbakaboni yayi. Kumbukani kuti awo ŵangakwaniska yayi kwenda chifukwa cha uchekuru panji ulwari, ŵangapeleka maminiti 15. Para mukulemba lipoti paumaliro wa mwezi, kuluwa yayi kusazgapo nyengo iyo mukapharazga mwamwaŵi. Kweniso mulembe mabuku na mathirakiti agho mukapeleka na tumapepara twakuchemera ŵanthu ku chikumbusko na ku ungano. Nangauli mungawona nga nyengo iyi njichoko, kweni para mwasazga pamoza, yikuŵa yinandi.
4. Kasi mwaŵikapo mtima kuchita vichi?
4 Tiyeni tipharazge makani ghawemi pa m’pata uliwose. Para tichitenge nthena, tiŵenge ŵakukondwa pakumanya kuti tachita vyose ivyo tingafiska kuti tipharazge makani ghawemi.—Mrk. 14:8; Luka 21:2-4.