UMOYO WACHIKHRISTU

Chigaŵa Chiphya mu Kabuku ka Maungano

Kwamba mu Janyuwale 2018, mu Uteŵeti na Umoyo Wachikhristu muŵenge chigaŵa chinyake icho chitovwirenge pakusambira. Pa chigaŵa ichi paŵenge mazgu ghakulongosora mavesi, vithuzi na tumavidiyo kufuma pa Baibolo lakusambira la pa Intaneti la New World Translation of the Holy Scriptures (nwtsty). Chigaŵa ichi chitovwirenge chomene nangauli pasono Baibolo ili tilije mu Chitumbuka. Chingaŵa ichi chitovwirenge chomene para tikunozgekera maungano. Chakuzirwa chomene, chigaŵa ichi chitovwirenge kusendelera kwa Dada withu wachitemwa, Yehova!

MAZGU GHAKULONGOSORA MAVESI

Chigaŵa ichi chilongosorenge mitheto ya ŵanthu, umo malo ghakawonekeranga, na umo mavesi ghanyake ghakalembekera mu viyowoyero vyakwambilira.

Mateyu 12:20

Chisunda chakulota: Nyali zinandi za mu nyengo yakale zikaŵanga za dongo ndipo ŵakagwiliskiranga ntchito mafuta gha olive. Chisunda chikawonkhanga mafuta, ntheura nyali yikazimwanga yayi. Lizgu la Chigiriki ilo lili kung’anamulika kuti “chisunda chakulota,” likuyowoya za chisunda icho chikufumiska josi chifukwa chakuti moto wakhala pachoko kuzimwa panji wazimwirathu. Lemba la Yesaya 42:3 likuyowoya za lusungu lwa Yesu. Iyo wakazimwirangathu yayi chipulikano cha ŵanthu ŵakuyuyulika icho chikaŵa pafupi kuzimwa.

Mateyu 26:13

Nadi: Lizgu ili mu Chigiriki lili kulembeka kuti, a·menʹ, ndipo lili kufuma ku lizgu la Chihebere lakuti ʼa·menʹ, ilo likung’anamura kuti “viŵe ntheura,” panji “ni mwenemumo.” Kanandi Yesu wakayowoyanga mazgu agha kuti wadidimizge kuti layizgo, panji uchimi uwo wakuyowoya ufiskikenge nadi. Nakuti ni Yesu pera uyo wakayowoyanga nthena. Para wawerezga mazgu agha (a·menʹ a·menʹ), nga umo viliri mu malo ghanandi mu buku la Yohane, mazgu gha Yesu agha ghakung’anamulika kuti “nadi nkhumuphalirani.”—Yoh 1:51.

VITHUZI NA TUMAVIDIYO

Pa chigaŵa ichi paŵenge vithuzi, tumavidiyo, na vinyake ivyo vitovwirenge kupulikiska makora fundo za mu Baibolo.

Betifage, Phiri la Maolive, na Yerusalemu

Kavidiyo aka kakulongora nthowa yakumafumiro gha dazi kuluta ku Yerusalemu kwendera mu muzi unyake uwo sono ukuchemeka kuti et-Tur, uwo ukwenera kuti ni Betifage uwo ukuzunulika mu Baibolo. Betaniya wali kumafumiro gha dazi kwa Betifage kufupi na Phiri la Maolive. Para ŵali ku Yerusalemu, Yesu na ŵasambiri ŵake kanandi ŵakagonanga ku Betaniya, uko sono kukuchemeka kuti el-ʽAzariyeh (El ʽEizariya.) Zina ili nda Chiarabu ndipo likung’anamura kuti “Malo gha Lazaro.” Kwambura kukayika, Yesu wakakhalangako ku nyumba kwa Marita, Mariya na Lazaro. (Mt 21:17; Mr 11:11; Lu 21:37; Yoh 11:1) Para ŵakuwelera kwawo ku Yerusalemu, Yesu wakwenera kuti wakendanga mu nthowa iyo tawona mu vidiyo iyi. Pa Nisani 9, 33 C.E., apo Yesu wakakwera mbunda kuluta ku Yerusalemu kwendera ku Phiri la Maolive, wakhumbenge mphanyi wakendera nthowa ya ku Betifage kuluta ku Yerusalemu.

Nthowa yakufuma ku Betaniya kuya ku Betifage
Betifage
Phiri la Maolive
Dambo la Kidironi
Apo pakaŵa Tempile

Muzumali pa Chitende

Chithuzi ichi chikulongora chitende cha munthu chakhomeka na muzumali uwo utali wake ukaŵa masentimita 11.5 (maintchi 4.5.) Chiwangwa ichi na muzumali wake chikasangika mu 1968, apo ŵakafukuranga vinthu vyakale ku mpoto kwa Yerusalemu. Chinthu ichi ntchakale chomene, ntchamunyengo ya Ŵaroma. Chithuzi ichi mbukaboni wakuti kale ŵakagwiliskiranga ntchito mizumali yanthena iyi pakukhomera munthu ku khuni kuti walangike. Muzumali uwu ukwenera kuti ukuyana na mizumali iyo ŵasilikari Ŵachiroma ŵakakhomera Yesu pa khuni. Muzumali uwu na chiwangwa ichi vikasangika mu bokosi la libwe umo ŵakaŵikamo viwangwa vya ŵanthu. Ichi chikulongora kuti para munthu ŵamukhoma pa khuni, ŵakamutoranga na kukamusunga.—Mt 27:35.