UMOYO WACHIKHRISTU
Khozgani Chipulikano Chinu mu Mazgu gha Chiuta
Baibolo lingasintha umoyo withu. (Heb 4:12) Kuti tisange chandulo na ulongozgi wake, tikwenera kukhorwa kuti ni “mazgu gha Chiuta.” (1Te 2:13) Kasi tingakhozga wuli chipulikano chithu mu mazgu gha Chiuta Baibolo?
Zuŵa lililose muŵazgenge Baibolo. Apo mukuŵazga, sangani ukaboni wakulongora kuti Yehova ndiyo ni Mweneko wa Baibolo. Mwachiyelezgero, wonani umo ulongozgi uwo wuli mu buku la Zintharika ukutovwilira pa umoyo withu nangauli ukalembeka kale chomene.—Zi 13:20; 14:30.
Ŵani na chilato chakuti muŵazge Baibolo lose. Manyani maukaboni agho ghakulongora kuti Baibolo ndakupelekeka na Chiuta. Mu Buku Lakupenjera Nkhani la Ŵakaboni ŵa Yehova, wonani apo palembeka “Baibolo” kufuma apo, wonani apo palembeka kuti “Ndakufuma kwa Chiuta.” Mungakhozga chipulikano chinu kuti uthenga wa Baibolo undasinthe, para mungaŵazga Vyakusazgirapo A3 mu Baibolo la Mang’anamuliro gha Charu Chiphya.
WONELERANI VIDIYO YA MUTU WAKUTI, CHIFUKWA WULI TIKWENERA KUŴA NA CHIPULIKANO . . . MU MAZGU GHA CHIUTA?, NDIPO PAMANYUMA ZGORANI MAFUMBO GHAKULONDEZGAPO AGHA:
Kasi chiliŵa cha tempile icho ŵali kusanga ku Karnak, Egypt, chikusimikizgira wuli kuti Mazgu gha Chiuta ghakuneneska?
Kasi tikumanya wuli kuti uthenga wa mu Baibolo undasinthe?
Kasi umo Baibolo lasungikira m’paka sono vikusimikizgira wuli fundo yakuti ni Mazgu gha Chiuta?—Ŵazgani Yesaya 40:8