Hulda Wakafiska Chilato Chake

USANGE muli kulutako ku chilwa chichoko cha Sangir Besar icho chili ku Indonesia vyaka ivyo vyajumpha, mukwenera kuti muli kuŵawonapo ŵadumbu ŵithu ŵatatu mu mphepete mwa nyanja. Iwo ŵakumanyikwa chomene pa chilwa ichi chifukwa cha ntchito yakovwira ŵanthu kupulikiska Baibolo. Kweni para ŵali ku nyanja ŵakachitangaso ntchito yinyake.

Chakwamba ŵakanjiranga mu maji na kuzuwura malibwe ghakurughakuru na kwiza nagho ku mtunda. Malibwe ghanyake ghakaŵa ghakuru nga ni bola. Kufuma apo ŵakakhalanga pa tuvitengo na kwamba kuswa malibwe na nyondo, tuchokotuchoko kuluska sumbi la nkhuku. Para ŵaswa, ŵakaghaŵikanga mu maperu na kuluta nagho kunyumba. Kufuma apo ŵakaŵikanga malibwe agha mu masaka ghakurughakuru ndipo galimoto zikizanga kuzakanyamura na kuluta nagho kuti ŵakanozgere misewu.

Yumoza wa ŵadumbu aŵa wakaŵa Hulda. Iyo wakaŵanga na nyengo yinandi yakuchitira ntchito iyi kuluska ŵadumbu ŵanyake. Kanandi ndalama zake zose wakawovwiliranga mbumba yakwake. Kweni wakakhumbangaso kuti wasungeko ndalama zinyake kuti wachitire chinthu chinyake. Wakakhumbanga kugura tabuleti iyo yinganjira JW Library^® app. Hulda wakamanyanga kuti mavidiyo kweniso vinthu vinyake ivyo vili pa JW Library vingamovwira mu uteŵeti kweniso kuti wapulikiskenge Baibolo.

Hulda wakagwiranga ntchito kwa maora ghaŵiri mulenji uliwose kwa mwezi na hafu, wakaswanga malibwe kuti wazuzge bode ya kagalimoto kachoko. Paumaliro wakazisanga ndalama zakugulira tabuleti.

Hulda wakati: “Nangauli nkhavukanga chomene kweniso nkhaŵa na vilonda chifukwa cha kuswa malibwe, kweni vyose ivi nkhaluwa mwaluŵiro nati namba kugwiliskira ntchito tabuleti yane mu uteŵeti kweniso para nkhunozgekera maungano.” Kweniso wakati tabuleti yikamovwira chomene muliri wati wamba chifukwa wakachitirangapo maungano kweniso kupharazga. Nase tikukondwa nayo lumoza Hulda chifukwa wakafiska chilato chake.