Yezgani Yehova pa Nkhani ya Kujiyuyura

1. Chifukwa wuli kujiyuyura kwa Yehova nkhwapadera chomene?

PARA mukuwona ŵanthu awo ŵakulongozga mazuŵa ghano, kasi mungati mbakujiyuyura? Yayi. Kweni Yehova uyo ngwankhongonozose, ngwakujiyuyura. (Sal. 113:​5-8) Yehova ngwakujiyuyura kuluska waliyose; nakuti mwa iyo mulijirethu mukhaliro wakujikuzga. Mu nkhani iyi, tidumbiskanenge nthowa zinayi za umo Yehova wakuchitira nase vinthu na kuwona umo wakulongolera kuti ngwakujiyuyura chomene kwizira mu nthowa izi. Tiwonengeso umo Yesu wakayezgera Adada ŵake pa nkhani ya kujiyuyura. Kusanda nthowa izi, kutovwirenge kusendelera kwa Yehova kweniso kuti tiyezgenge chomene kujiyuyura kwake.

YEHOVA NGWAKUFIKIRIKA

2. Kasi lemba la Salimo 62:8 likuvumbura vichi za Yehova? (Wonaniso chithuzi.)

² Ŵanthu ŵakujikuzga mbakufikirika yayi. Chifukwa chakuti ŵakujiwona kuti iwo mbapachanya chomene, ŵakuchita vinthu mwambura lusungu, ndipo ivi vikupangiska kuti ŵanthu ŵaŵagegenge. Yehova ngwakupambana chomene na ŵanthu aŵa! Pakuti Adada ŵithu ŵakuchanya aŵa mbakujiyuyura, ŵakutipempha kuti tiŵafikirenge mu lurombo na kuŵaphalira vyose ivyo tikusuzgika navyo mu mtima. (Ŵazgani Salimo 62:8.) Nga umo Dada wachitemwa wakuŵira wakunozgeka kumutegherezga mwana wake, Yehova nayo ngwakunozgeka kutegherezga malurombo ghithu. Nakuti pali malurombo ghanandi agho wali kuzomerezga kuti ghalembeke mu Baibolo. Ivi vikulongora kuti iyo ngwakufikirika nadi. (Josh. 10:​12-14; 1 Sam. 1:​10-18) Kweni wuli usange nyengo zinyake tikujiwona kuti ndise ŵambura kwenelera kulomba kwa Yehova?

3. Chifukwa wuli mukwenera kugomezga kuti Yehova wakukhumba kuti mulombenge kwa iyo nyengo zose?

³ Tingalomba kwa Yehova nanga ni apo tikujiwona kuti ndise ŵambura kwenelera chitemwa chake. Chifukwa wuli tingayowoya nthena? Mu ntharika ya mwana wakuzgeŵa, Yesu wakayaniska Yehova na dada walusungu uyo mwana wake uyo wakapera wakajiwonanga kuti ngwambura kwenelera kupokelereka mu mbumba yakwake. Kasi dada uyu wakachita wuli mwana wake wati wawelera kunyumba? Yesu wakati, adada ŵa mwana uyu ŵati ŵamuwona waka mwana wawo wakwiza chapatali, “ŵakachimbira na kumuvumbatira na kumufyofyontha.” (Luka 15:​17-20) Yehova wali nga ni dada uyu. Para wapulika waka kuti tikumulomba chifukwa chakuti tili na chitima pa kwananga uko tachita, panji tikusuzgika maghanoghano, kujiyuyura kwake kukumuchiska kuti watitegherezge mwakupwelelera. (Chit. 3:​19, 20) Yehova wakutilengera lusungu, ndipo nga ni umo dada wa mu ntharika iyi wakachitira, nayo wakuchimbilira kwa ise na kutisimikizgira kuti wakutitemwa. (Yes. 57:15) Kasi Yehova ‘wakuchimbilira’ wuli kwa ise mazuŵa ghano? Kanandi wakuchita nthena kwizira mu ŵalara, ŵamumbumba yithu awo Mbakaboni, kweniso ŵasopi ŵanyithu. (Yak. 5:​14, 15) Yehova wakutipa wovwiri uwu chifukwa wakukhumba kuti tiŵe nayo paubwezi.

4. Kasi Yesu wakalongora wuli kuti wakaŵa wakufikirika?

⁴ Yesu wakuyezga Adada ŵake. Nga Awiske, Yesu ngwakujiyuyura. Lekani apo wakaŵa pano pa charu, ŵanthu ŵakafwatukanga kuluta kwa iyo. Ŵakawopanga yayi kumufumba mafumbo. (Mrk. 4:​10, 11) Ntheura para wafumba maghanoghano ghawo pa nkhani yinyake, ŵakamuphaliranga umo ŵakajipulikiranga nadi. (Mat. 16:​13-16) Ndipo para ŵabudiska vinthu vinyake ŵakawopanga yayi kuti Yesu waŵakalipirenge; ŵakamanyanga kuti Yesu wakaŵa walusungu, wachiwuravi, kweniso wakuzikira. (Mat. 17:​24-27) Lekani ntchakuzizika yayi kuti ŵalondezgi ŵake ŵakamumanya makora Yehova, chifukwa chakuti Yesu wakayezganga chomene Adada ŵake. (Yoh. 14:9) Ŵakasambira kuti Yehova ni mukali yayi, wakujikuzga yayi, panji wankhaza, ndipo wakupambana chomene na ŵalongozgi ŵawo ŵavisopa. M’malo mwake wakaŵa wakujiyuyura kweniso wakufikirika.

5. Kasi kujiyuyura kungatovwira wuli kuti tiŵe ŵambura kusuzga kufikirika?

⁵ Kasi tingamuyezga wuli Yehova? Para tikusambira kuŵa ŵakujiyuyura, ŵanthu ŵafwatukenge kutifikira. Kujiyuyura kutovwirenge kuti tileke kuŵa ŵasanji, ŵakujikuzga, kweniso ŵambura kugowoka—mikhaliro iyo yingapangiska ŵanji kutigega. Kweni kujiyuyura kutovwirenge kuti tiŵe ŵalusungu, ŵakuzikira, kweniso ŵakugowoka—mikhaliro iyo yingapangiska ŵanji kuti ŵatifikirenge. (Kol. 3:​12-14) Ŵalara chomene ndiwo ŵakwenera kuyezgayezga kuŵa ŵakufikirika. Kuti ŵafiske kuchita nthena, nyengo na nyengo ŵalara ŵakwenera kuŵa lumoza na ŵabali na ŵadumbu. Ivi vikung’anamura kuti ŵalara ŵakwenera kuŵikapo mtima kuchita maungano gha mpingo maso na maso, m’malo mwakuti ŵachitenge kwizira pa vidiyokonferesi pa vifukwa vyambura kupulikikwa. Kweniso kuyana na umo vinthu viliri kwa iwo, ŵakwenera kunjilira lumoza na ŵabali na ŵadumbu mu uteŵeti wa kunyumba na nyumba. Para ŵabali na ŵadumbu ŵaŵamanya makora ŵalara, chizamuŵa chipusu kuti ŵafwatukenge kuyowoya nawo nyengo yiliyose iyo ŵakukhumbikwira wovwiri.

YEHOVA NGWAKUPULIKISKA

6-7. Yowoyani viyelezgero vyakulongora kuti Yehova ngwakunozgeka kusintha para ŵateŵeti ŵake ŵamupempha.

⁶ Ŵanthu ŵanandi awo mbakujikuzga kanandi ŵakughanaghana kuti iwo ŵakumanya vyose ndipo ŵakukhumba yayi kusintha para ŵakuchita vinthu na ŵanji. Kweni pakuti Yehova ngwakujiyuyura, iyo ngwakupulikiska kweniso ngwakunozgeka kusintha nangauli ngwapachanya chomene kuluska waliyose. Ghanaghanirani umo wakachitira na Miriyamu, mudumbu wa Mozesi. Iyo pamoza na Aroni, ŵakamba kwimikana na Mozesi uyo wakaŵa mwimiliri wa Yehova. Ntheura Miriyamu wakaŵa nga kuti wakwimikana na Yehova. Ivi vikamukwiyiska Yehova ndipo wakamutimba na vyoni. Kweni apo Aroni wakamupempha Mozesi kuti wamovwire, kweniso apo Mozesi wakamuŵeyelera Yehova kuti wamuchizge mudumbu wake, kasi Chiuta wakachita wuli? Chiuta wakanonopeska mtima yayi pa chilango icho wakapeleka. Chifukwa chakuti Yehova ngwakujiyuyura, wakapulika lurombo lwa Mozesi na kumuchizga Miriyamu.—Maŵa. 12:​1-15.

⁷ Yehova wakalongoraso kujiyuyura pa umo wakachitira vinthu na Themba Hezekiya. Kwizira mu ntchimi yake Yesaya, Yehova wakaphalira themba ili kuti lifwenge. Hezekiya wakamuŵeyelera Yehova uku wakulira kuti wamuchizge. Mwalusungu, Yehova wakamusazgirako vyaka 15. (2 Mathe. 20:​1, 5, 6) Nadi, kujiyuyura ndiko kukumutuma Yehova kuti waŵe walusungu kweniso wakunozgeka kusintha.

8. Kasi ni viyelezgero wuli ivyo vikulongora kuti Yesu ngwakupulikiska? (Mariko 3:​1-6)

⁸ Yesu wakuyezga Adada ŵake. Apo wakaŵa pa charu chapasi, Yesu wakachitiranga viwemi ŵanthu palipose apo chikaŵanga chakwenelera kuchita nthena. Mwachiyelezgero, wakachizganga ŵanthu pa Sabata nangauli ŵalongozgi ŵa chisopa ŵakatenge ntchambura kwenelera kuti wachite nthena. (Ŵazgani Mariko 3:​1-6.) Yesu wakulutilira kuŵa wakupulikiska apo wakulongozga mpingo Wachikhristu mazuŵa ghano. Mwachiyelezgero, para munyake mu mpingo wachita kwananga kukuru, wakuzikira nayo na kumupa mwaŵi wakuti wasinthe.—Chivu. 2:​2-5.

9. Kasi tingachita wuli kuti tiŵenge ŵakupulikiska? (Wonaniso vithuzi.)

⁹ Kasi tingamuyezga wuli Yehova? Tikwenera kujiyuyura na kusambirako kwa Yehova pa nkhani ya kuŵa wakunozgeka kusintha. (Yak. 3:17) Mwachiyelezgero, ŵapapi awo ŵakuyezga Yehova ŵakukhazga kuti ŵana ŵawo ŵachitenge vinthu ivyo ŵangafiska yayi. Chiyelezgero chiwemi pa nkhani iyi ni Yakhobe, nga umo tikuwonera pa Genizesi 33:​12-14. Ŵapapi ŵakujiyuyura kweniso awo mbakupulikiska, ŵakwenera kugega kuyaniska ŵana ŵawo. Ŵalara Ŵachikhristu nawo ŵakwenera kuŵa ŵakupulikiska. Nthowa yimoza iyo ŵangachitira nthena, nkhuŵa ŵakunozgeka kusintha na kukolerana na ŵalara ŵanyawo para ivyo ŵakuyowoya vikuleka kuswa fundo za mu Baibolo. (1 Tim. 3:​2, 3) Ndipo tose tingayezgayezga kupulikiska umo ŵanji ŵakuwonera vinthu nanga vingaŵa kuti ise tikuwona vinthu mwakupambanako. (Rom. 14:1) Nadi, waliyose mu mpingo wakwenera kuŵikapo mtima kuti ‘mahara ghake ghamanyikwe ku ŵanthu wose.’—Fil. 4:5.

YEHOVA NGWAKUZIKIRA

10. Kasi ni nthowa wuli izo Yehova walongolera kuzikira?

¹⁰ Panji namwe muli kuwona kuti ŵanthu awo mbakujikuzga ŵakutemwa yayi kulindilira munthu pakuchita vinthu. Kujikuzga kukuŵapangiska kuti ŵaŵe ŵambura kuzikira. Umu ndimo Yehova waliri yayi. Iyo ngwakuzikira kuluska waliyose! Mwachiyelezgero, mu nyengo ya Nowa Yehova wakayowoya kuti walindilirenge vyaka 120 pambere wandaparanye ŵaheni. (Gen. 6:3) Ivi vikawovwira kuti Nowa waŵe na nyengo yakulera ŵana ŵake kweniso kuzenga chingalaŵa mwakovwirika na mbumba yake. Pamanyuma Yehova wakategherezga mwakuzikira apo Abrahamu wakafumbanga za kuparanyika kwa Sodomu na Gomora. Munthu wakujikuzga wakatenge wamuzgorenge kuti, ‘Ndiwe njani kuti unifumbenge mafumbo agha?’ Kweni pakuti Yehova ngwakujiyuyura, wakazikira nayo Abrahamu.—Gen. 18:​20-33.

11. Kuyana na lemba la 2 Petrosi 3:​9, chifukwa wuli Yehova wakuzikira mu nyengo yithu yino?

¹¹ Mwakujiyuyura Yehova wakuzikiraso mu nyengo yithu yino. Wakulindilira nyengo yake yakutemeka kuti waparanye charu ichi. Chifukwa wuli wakuzikira? Chifukwa “wakukhumba yayi kuti munyake waparanyike, kweni wakukhumba kuti wose ŵang’anamuke mtima.” (Ŵazgani 2 Petrosi 3:9.) Kasi kuzikira kwa Yehova kwawa pawaka? Yayi! Ŵanthu mamiliyoni ghanandi awo ŵali na mtima wakwenelera ŵakuŵa paubwezi na iyo. Ndipo tikugomezga kuti ŵanthu ŵanandi ŵalutilirenge kuchita nthena. Nangauli vili nthena, kweni kuzikira kwa Yehova kuli na mphaka. Yehova wakuŵatemwa ŵanthu, kweni ngwakulekelera yayi. Wazomerezgenge yayi kuti ŵanthu ŵaheni ŵaŵepo m’paka muyirayira.—Hab. 2:3.

12. Kasi Yesu wakuyezga wuli Yehova pa nkhani ya kuzikira?

¹² Yesu wakuyezga Adada ŵake. Kwa vyaka masauzandi ghanandi, Yesu wakuyezga Adada ŵake pa nkhani ya kuzikira. Yesu wawona Satana wakuthandazga mautesi ghakukhwaskana na Yehova kweniso ŵanthu awo mbakugomezgeka. (Gen. 3:​4, 5; Yobu 1:11; Chivu. 12:10) Yesu wawonaso masuzgo ghanandi agho ŵanthu ŵakusangana nagho. Wakwenera kuti wakukhumba chomene kuti “waparanye milimo ya Dyabulosi”! (1 Yoh. 3:8) Kasi ntchivichi chikupangiska Yesu kulindilira mwakuzikira kuti Yehova wamuzomerezge kuti waparanyirethu milimo ya Dyabulosi? Chifukwa chimoza ntchakuti, Yesu ngwakujiyuyura ndipo wakumanya kuti Yehova ndiyo wakumanya nyengo yakwenelera iyo umaliro wizirenge.—Mil. 1:7.

13. Kasi Yesu wakalongora wuli kuzikira ku ŵapositole ŵake, ndipo chifukwa wuli?

¹³ Apo wakaŵa pa charu chapasi, Yesu wakalongoraso kuzikira ku ŵapositole ŵake. Mwachiyelezgero, apo kaŵirikaŵiri ŵakapindananga vya uyo ni mukuru pakati pawo, Yesu wakaŵakwiyira yayi. M’malo mwake wakalutilira kuzikira nawo. (Luka 9:46; 22:​24-27) Wakagomezganga kuti panyengo yake ŵasinthenge. Kasi muli kubudiskapo chinthu chinyake mwakuwerezgawerezga? Para ni nthena, mukwenera kuti mukuwonga chomene kuti muli na Themba ilo ndakujiyuyura kweniso lakuzikira.

14. Kasi ntchivichi chingatovwira kuti tiŵe ŵakuzikira?

¹⁴ Kasi tingamuyezga wuli Yehova? Para tasambira kuŵa na “kaghanaghaniro ka Khristu” chiŵenge chipusu kughanaghana na kuchita vinthu nga ni Yehova. (1 Kor. 2:16) Kasi ntchivichi chingatovwira kuŵa na kaghanaghaniro ka Khristu? Nthowa yimoza yakuzirwa chomene, nkhuŵazga mabuku agho ghakulongosora za umoyo wa Yesu. Pamanyuma tikwenera kupatura nyengo na kughanaghanirapo pa ivyo tikuŵazga umo vikuvumbulira kaghanaghaniro ka Yesu pa vigaŵa vyakupambanapambana. Kweniso tikwenera kulomba Yehova kuti watovwire kuŵa ŵakujiyuyura kweniso ŵakuzikira nga ni Yesu. Para tamba kuŵa na kaghanaghaniro ka Khristu, chiŵenge chipusu kuyezga Chiuta pa nkhani ya kuzikira na ŵasopi ŵanyithu kweniso ise taŵene.—Mat. 18:​26-30, 35.

YEHOVA WAKUZIRWISKA ŴAKUYUYUKA

15. Kasi Yehova wakufiska wuli mazgu agho ghakusangika pa Salimo 138:6?

¹⁵ Ŵazgani Salimo 138:6. Ŵanthu awo mbakujiyuyura ŵali na mwaŵi wapadera chomene chifukwa ŵakumanyikwa na Mlengi wa chilengiwa chose. Wonani viyelezgero vichoko waka vya ŵanthu awo ŵakawonekanga ŵakuyuyuka, kweni Yehova wakaŵawonanga kuti mbakuzirwa. Ŵanji mwa iwo panji tikuŵamanya makora yayi, kweni ŵali kulembeka mu Baibolo. Mwachiyelezgero, Yehova wakakhuŵilizga Mozesi kulemba vya mwanakazi munyake zina lake Debora, uyo wakaŵa mulezi ndipo wakateŵeteranga mbumba ya Yisake na Yakhobe. Iyo wakateŵetera mwakugomezgeka kwa vyaka pafupifupi 125! Nangauli tikumanya vinandi yayi vyakukhwaskana na mwanakazi wakugomezgeka uyu, kweni Yehova wakawoneseska kuti nkhani yake yilembeke mu Baibolo, kuti walongore umo wakamutemweranga. (Gen. 24:59; 35:​8, mazgu ghamusi) Vyaka vikati vyajumphapo, Yehova wakasankha Davide uyo wakaŵa muliska, na kumwimika kuŵa themba la Israyeli. (2 Sam. 22:​1, 36) Nyengo yichoko waka Yesu wati wababika, Chiuta wakachindika ŵaliska ŵa mberere awo ŵakaŵa ŵakujiyuyura mwa kuŵatumira ŵangelo, kuti ŵaŵe ŵakwamba kumanya vya kubabika kwa Mesiya wakulayizgika mu Betelehemu. (Luka 2:​8-11) Ndipo apo Yosefe na Mariya ŵakiza na Yesu ku tempile, Yehova wakachindikaso ŵachekuru ŵaŵiri Simiyoni na Ana, pakuŵapa mwaŵi wakuwona Mwana wake. (Luka 2:​25-30, 36-38) Nadi, “nangauli Yehova ngwapachanya, kweni wakuwona ŵakujiyuyura”!

16. Kasi Yesu wakayezga wuli umo Adada ŵake ŵakuchitira vinthu na ŵanji?

¹⁶ Yesu wakuyezga Adada ŵake. Nga Mbawiske, Yesu nayo wakachindikanga ŵanthu ŵakujiyuyura. Wakasambizga ŵanthu “ŵambura kusambira ndiposo ŵanthu bweka” unenesko wakukhwaskana na Ufumu wa Chiuta. (Mil. 4:13; Mat. 11:25) Wakachizganga ŵalwari na kuchita nawo vinthu mwachitemwa kweniso mwantchindi. (Luka 5:13) Pa usiku waumaliro pambere wandafwe, Yesu wakageziska malundi gha ŵapositole ŵake, mulimo uwo ŵazga ndiwo ŵakachitanga. (Yoh. 13:5) Ndipo pambere wandakwelere kuchanya, Yesu wakapeleka ntchito yapadera chomene ku ŵalondezgi ŵake wose kusazgapo na ise wuwo mazuŵa ghano, yakovwira ŵanji kuzakasanga umoyo wamuyirayira.—Mat. 28:​19, 20.

17. Kasi tingalongora wuli kuti tikutemwa na kuchindika ŵanji? (Wonaniso chithuzi.)

¹⁷ Kasi tingamuyezga wuli Yehova? Tikulongora kuti tikutemwa na kuchindika ŵanji para tikuŵaphalirako uthenga uwemi, kwambura kutolera uko ŵakufuma, kawonekero, kweniso masambiro ghawo. Tikulongoraso kuti tikuchindika ŵabali na ŵadumbu ŵithu para tikuŵawona kuti ŵakutiluska, mwambura kupwelerako kanthu vya maluso ghithu panji maudindo agho tili nagho. (Fil. 2:3) Yehova wakukondwa nase chomene para tikujiyuyura na ‘kwamba ndise’ kulongora ntchindi ku ŵanji munthowa izi na zinyake zinandi.—Rom. 12:10; Zef. 3:12.

18. Chifukwa wuli mukukhumba kuyezga Yehova pa nkhani ya kujiyuyura?

¹⁸ Para tikuŵikapo mtima kuyezga Adada ŵithu ŵakuchanya pa nkhani ya kujiyuyura tiŵenge ŵakufikirika, ŵakupulikiska, kweniso ŵakuzikira chomene. Kweniso tichindikenge ŵanji nga umo Yehova wakuchitira. Mphanyi tayezgayezga kuchita vyose ivyo tingafiska kuti tiŵe nga ni Chiuta withu uyo ngwakujiyuyura, ndipo para tachita nthena tiŵenge ŵakuzirwa chomene mu maso ghake!—Yes. 43:4.