NKHANI YA PA CHIKOPI | LEKANI KUCHITA VINTHU MWACHIZGOŴI WAKA
2 Talikiranani na Ivyo Vingamutimbanizgani
Mwaŵenecho mwadumura kuti muleke kurya vyakurya vyambura kulongosoka, mbwenu mukusanga ice-cream wali pa thebulu lengalenga.
Mwaŵene mukukhumba kuleka kukhweŵa hona, mbwenu mubwezi winu wakumupani ndudu, uku wakumanya kuti imwe mukukhumba kuleka.
Mukukhumba kuti mwambe kuchimbira mulenji, kweni kuti mukasange apo pali skapato zakuchimbilira mukwenera kubungundura vinthu vinandi.
Kasi mwaliwona suzgo apa? Ukaboni ukulongora nyengo zinyake munthu wangakhumba kusintha vinthu vinyake, kweni wakutimbanizgika na ŵanthu panji vinthu ivyo wali navyo pafupi.
FUNDO YA MU BAIBOLO: “Munthu wakuchenjera wakuwona ulwani na kubisama, kweni muzeleza wakujendera bweka ndipo wakupwetekeka.”—Zintharika 22:3.
Baibolo likutiphalira kuti tilaŵiskenge patali. Para munthu wakuwona patali, wakumanyirathu vinthu ivyo vingamutimbanizga ndipo wakuyezgayezga kuvigwentha mwakuti wafiske ivyo wakukhumba. (2 Timote 2:22) Panji tiyowoye kuti, ntchamahara kukhala kutali na vinthu panji ŵanthu awo ŵangatitimbanizga.
Talikiranani na chinthu icho mukukhumba kuleka mwakuti chiŵe chinonono kuchichitaso
IVYO MUNGACHITA
Talikiranani na chinthu icho mukukhumba kuleka mwakuti chiŵe chinonono kuchichitaso. Usange mukukhumba kuleka kurya vyakurya vyambura kulongosoka, lekani kusunga vyakurya vyanthena ivi mu nyumba yinu. Uwemi wakuchita nthena ngwakuti para mwavidokera ntchakusuzga kuti muvisange luŵiro.
Muŵenge pafupi na vinthu viwemi mwakuti chiŵenge chipusu kuvichita. Usange mukukhumba kuti mulenji uliwose muchimbirenge, muŵikirengethu pakweru vyakuvwara vyakuchimbilira pambere mundagone. Ntheura chiŵenge chipusu kuti muchite ivyo mukukhumba.
Sankhani makora ŵabwezi. Kanandi tikutemwa kuyezga ivyo ŵanyithu ŵakuchita. (1 Ŵakorinte 15:33) Ntheura lekani kuchezga chomene na ŵanthu awo ŵakutemwa vinthu ivyo imwe mukukhumba kuleka. Kweni chezgani chomene na ŵanthu awo ŵangamovwirani kuti muŵe na vizgoŵi viwemi.