Njuchi Zili na Luso Pakudeka

NJUCHI zingadeka makora pa chinthu kufuma ku chigaŵa chilichose. Kasi zikuchita wuli pakudeka?

Wonani fundo iyi: Kuti njuchi yideke makora yikwenera kuchepeska sipidi m’paka pa zero pambere yindafike pa chinthu icho yidekengepo. Kuti njuchi yichite ichi yikwenera kupima mtunda apo yikuluta, na kumanya sipidi iyo yikukhumbikwa. Ndipo paumaliro yikuchepeska sipidi mwakwenelera. Ndipouli, tuvibenene tunyake tungakwaniska yayi kuchita ivi chifukwa maso ghawo ghakuŵa waka panthazi dodoli, ntheura tukutondeka kupima makora mtunda.

Maso gha njuchi ghakupambana chomene na gha munthu chifukwa gha munthu ghakuwona patali, apo njuchi yikuwona makora chinthu para yafika pafupi na chinthu icho. Nakuti para njuchi yikusendelera kufupi na chinthu icho yamudekapo, chinthu icho ndipo chikuwoneka chikuru. Kafukufuku uyo wakachitika pa Yunivesite yinyake (Australian National University) wakalongora kuti njuchi yikuchepeska sipidi para yakhala pachoko kudeka kuti sayizi ya chinthu icho yidekengepo yileke kusintha. Para yafika pa chinthu ichi yikuŵa kuti yachepeskerathu sipidi m’paka pa zero. Ntheura ivi vikovwira kuti yideke makora chomene.

Magazini yinyake yikati: ‘Ivyo njuchi zikuchita para zikudeka . . . vyapangiska ŵasayansi kuwona kuti ŵangafiska kupanga maroboti ghamumlengalenga agho ghangachita vinthu nga umo njuchi zikuchitira.’—Proceedings of the National Academy of Sciences.

Kasi mukuti wuli? Kasi njuchi izi zikaŵako zekha, panji pali munyake uyo wakazilenga?