Usange Ŵana Ŵali na Chitima

DAMI

wakati: “Pakwamba, adada ŵakadandawura kuti mutu ukuŵinya. Kweni ŵati ŵalwara chomene, amama ŵakachemeska ambulasi. Yati yafika, ŵakaŵanyamulira ku chipatala. Nkhamanyanga yayi kuti aka kangaŵa kaumaliro kuwonana na adada. Pati pajumpha mazuŵa ghatatu, adada ŵakafwa na nthenda ya kutupa misipa mu wongo (aneurysm). Pa nyengo iyi, nkhaŵa na vyaka 6 pera.

Kwa vyaka vinandi nkhajiyimbanga mulandu chifukwa cha nyifwa ya adada. Nkhakumbukiranga ivyo vikachitika apo ambulasi yikafikanga na kuŵatora adada. Ndipo nyengo zinyake nkhajifumbanga kuti: ‘Chifukwa wuli nkhaluta yayi ku chipatala? Chifukwa wuli nkhachitapo kanthu yayi?’ Para nawona ŵachekuru, nkhajifumbanga kuti, ‘Chifukwa wuli ŵachali ŵamoyo kweni adada ŵali kufwa?’ Pamasinda, amama ŵakanipembuzganga. Kweniso pakuti ndise Ŵakaboni ŵa Yehova, mpingo ukatovwiranga chomene.

Ŵanji ŵakuti munthu wakuŵa na chitima pa nyengo ya nyifwa pera, ndipo pamasinda wakuluwa, kweni ine nkhaluwa yayi. Nkhalutilira kuŵa na chitima kwa vyaka vyakujumpha 7.

Ŵawukirano ŵanyane awo mupapi wawo wali kufwa ningaŵaphalira kuti, “Phalirani ŵanji umo mukujipulikira. Manyani kuti para mwaphalira luŵiro ŵanyinu umo mukujipulikira, vikovwira kuti muŵe na umoyo uwemi.”

Nangauli pasono vinthu vikwenda makora pa umoyo wane, kweni nkhukondwa chomene yayi pakuti adada nilije. Kweni lemba la Chivumbuzi 21:4 likunovwira chomene. Lemba ili likuti Chiuta “wazamufyura masozi ghose ku maso [ghithu], ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”

DERRICK

wakati: “Nkhukumbuka kuti ine na adada tikatemwanga kuŵeja somba na kukwera mapiri.

Adada ŵakaŵa na suzgo la mtima, ndipo nkhukumbuka kuti nkhalutanga ku chipatala apo nkhaŵa mwana kukaŵawona. Kweni nkhamanyanga makora yayi ukuru wa suzgo lawo. Paumaliro, adada ŵakafwa na nthenda iyi apo nkhaŵa na vyaka 9.

Adada ŵati ŵafwa, nkhakhaliranga waka kulira. Mtima ukapeleŵeranga ndipo nkhakhumbanga yayi kuyowoya na waliyose. Kakaŵa kakwamba kuti nijipulike nthena, ndipo nkhakhumbanga yayi kuchita chilichose. Nangauli pakwamba kagulu ka ku tchalitchi ako nkhaŵamo kakawonekanga nga kanganovwira, kweni kakanovwira yayi. Ŵanthu ŵakaniphaliranga kuti, ‘Nyengo yawo yangukwana,’ ŵanji ŵakatenge ‘Chiuta waŵachema’ apo ŵanyake ŵakatenge ‘pasono ŵali kuchanya.’ Nkhakhorwa yayi na ivyo ŵanthu aŵa ŵakayowoyanga, nangauli nkhamanyanga yayi ivyo Baibolo likusambizga pa nkhani iyi.

Amama ŵakamba kusambira Baibolo na Ŵakaboni ŵa Yehova ndipo pamasinda ine na mukuru wane nase tikamba kusambira Baibolo. Tikasambira icho chikuchitika para munthu wafwa kweniso kuti ŵakufwa ŵazamuwuka. (Yohane 5:28, 29) Kweni lemba ilo likanovwira chomene nda Yesaya 41:10. Lemba ili likuti: ‘Ungawopanga yayi, pakuti nili nawe. Ungenjerwanga chara, pakuti ndine Chiuta wako. Nikukhozgenge, enya, nikovwirenge.’ Nati namanya kuti Yehova wali nane ndipo wanovwirenge, vikanikhozga chomene apo nkhaŵa na chitima. Ndipo fundo iyi yichali kunikhozga.”

JEANNIE

wakati: “Apo nkhaŵa na vyaka 7, amama ŵakafwa na kansa. Pa zuŵa ili mutu wane ukakoranga yayi. Nkhukumbuka kuti ŵakafwira panyumba ndipo abuya na asekuru ŵakaŵa panyumba. Ŵanthu ŵakajikora ŵakati waka chete. Nkhukumbuka kuti mise tikarya waka masumbi. Vikaŵa nga nkhulota.

Kweni nkhawona kuti nkhwenera kujikhwimiska kuti munung’una wane waleke kuŵa na chitima chomene. Ntheura nkhalongoranga yayi kuti nili na chitima. Ndipo m’paka sono nichali na suzgo ili, nangauli nkhumanya kuti ntchiwemi yayi kuchita nthena.

Nkhuluwa yayi wovwiri na chitemwa icho mpingo wa Ŵakaboni ŵa Yehova ukatilongora pa nyengo yakusuzga iyi. Ŵakhristu ŵanyithu ŵakatitemwanga chomene nangauli tikaŵa kuti tamba waka kuwungana. Kwa chaka chimoza kanandi adada ŵakaphikanga viŵi yayi chakurya chifukwa Ŵakhristu ŵanyithu ŵakatipanga.

Lemba ilo likunikhozga chomene nda Salimo 25:16, 17, ilo likuti: ‘Lazgirani chisko chinu kwa ine, munilongore lusungu, pakuti nili nekha, nilije movwiri. Visuzgo vya mtima wane vyandana. Nifwaturani ku ulwilwi wane.’ Nkhupembuzgika chomene para nakumbuka kuti para nili na chitima, Chiuta wakunovwira. Baibolo lanovwira chomene ndipo nkhukhozgeka kumanya kuti Chiuta wazamuwuska ŵakufwa. Nkhulindilira kuzakawonana na amama mu paradiso apo tose tizamuŵa na umoyo uwemi.—2 Petrosi 3:13.

Kasi mungatemwa kumanya vinandi vya umo Baibolo lingamupembuzgirani pa nkhani iyi? Chitani dawunilodi kabuku kakuti “Para Uyo Mukumutemwa Wapotera.” Lutani pa www.jw.org/tum na kuwona pa MABUKU > MABUKU.