4. Kasi Chiuta Wakatilenga Kuti Tisuzgikenge?

Chifukwa Wuli Ntchakuzirwa Kumanya?

Zgoro la fumbo ili likukhwaska umo tikuwonera vinthu pa umoyo.

Fundo Yakuti Mughanaghanirepo

Kasi ntchakupulikikwa kuti Chiuta uyo wakalenga vinthu viwemi wapangiskengeso masuzgo?

Ŵanthu awo ŵakusopa yayi, para ŵawona masuzgo ŵakujifumba chifukwa icho Chiuta wakughalaŵiskira waka, kweniso ŵanji ŵakukayika usange waliko nadi. Iwo ŵakugomezga kuti masuzgo mbukaboni wakuti (1)  Chiuta walije nkhongono zakumazgira masuzgo, (2) Chiuta wakukhumba yayi kuchitapo kanthu, panji (3) Chiuta kulije.

Kasi ivi ndivyo ni vifukwa nadi ivyo ŵanthu ŵakusuzgikira?

Ivyo Baibolo Likuyowoya

Chiuta wakatilenga kuti tisuzgikenge yayi.

Iyo wakukhumba tikondwenge na umoyo.

Baibolo likuti: “Palije kawemi kwa iwo kuluska kusekelera na kuchita uwemi pa umoyo wawo, kweniso kuti munthu waliyose warye na kumwa, wakondwe na mulimo wake wose uwo wakutokatoka nawo. Ntchawanangwa chakufuma kwa Chiuta.”—MUPHARAZGI 3:12, 13.

Ŵanthu ŵakwamba Chiuta wakaŵapa chilichose icho ŵakakhumbikwiranga.

Wakakhumbanga yayi kuti iwo panji ŵana wawo ŵasuzgikenge.

“Chiuta wakati kwa iwo: ‘Babanani, mwandane muzuzge charu chapasi na kuchithereska.’”—GENIZESI 1:28.

Ŵanthu ŵakwamba ŵakasankha kugalukira Chiuta.

Ivi vikapangiska kuti iwo na ŵana ŵawo ŵasuzgikenge.

“Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.”—ŴAROMA 5:12.a

Chiuta wakatilenga kuti tijilongozgenge tekha yayi.

Nga ni umo viliri kuti taŵanthu tingakhala yayi mu maji, ndimo viliriso kuti taŵanthu tingajilongozga yayi tekha.

“Munthu uyo wakwenda wangalongozga yayi mendero ghake.”—YEREMIYA 10:23.

Chiuta wakukhumba yayi kuti tisuzgikenge.

Iyo wakukhumba kuti tiŵikengepo mtima kugega masuzgo.

“Muŵenge kuti mwapulikira malango ghane! Mphanyi mtende winu waŵa nga ni mlonga.”—YESAYA 48:18.