Longorani Chitemwa

Suzgo

Sankho likumara luŵiro yayi mumtima. Nga umo vikuŵira kuti pakutora nyengo kweniso pakukhumbikwa kuyezgayezga kuti munthu wachire ku matenda agho ghakwambika na vayirasi, mwakuyana waka, pakutora nyengo kweniso pakukhumbikwa kuyezgayezga kuti sankho limalirethu mu mtima. Kasi mungachita wuli kuti mumazge sankho?

Fundo ya mu Baibolo

Chithuzi: 1. Mwanalume wa ku Asia wakumujulirako chijaro mwanalume mufipa uyo wanyamura makapu agho muli khofi. 2. Mwanalume mufipa mweneyuyu wakugaŵana khofi na ŵanyake ŵa ku ntchito, kusazgapo mwanakazi wa ku Indian uyo tangumuzunura pakwamba.

“Vwarani chitemwa, pakuti chitemwa chikukakilira ŵanthu pamoza.”—ŴAKOLOSE 3:14.

Kasi fundo iyi yikung’anamurachi? Kuchitira viwemi ŵanji kukovwira kuti ŵanthu ŵaŵe ŵakukolerana. Para mukuŵikapo mtima kulongora chitemwa ŵanyinu, vimovwiraninge kuti muchepeske sankho. Usange mukuŵatemwa chomene ŵanyinu, muŵatinkhenge yayi.

Ivyo Mungachita

Ghanaghanirani umo mungalongolera chitemwa ku ŵanthu ŵa mtundu uwo mukuwuwona kuti ngwapasi. Mungalongora kuti mukuŵatemwa mwakuŵachitira vinthu viwemi nanga vingaŵa vichokovichoko. Yezgani kuchita chimoza panji vinandi mwa vinthu vyakulondezgapo ivi:

Para mungalongora chitemwa nanga mungaŵa mu tunthu tuchokotuchoko, vimovwiraninge kuti mumazge sankho

Chithuzi: 1. Mwanakazi muzungu wakovwirika na mwanakazi mu India kukwera masitepu uku wamunyamulira vinthu ivyo wagura. 2. Mwanakazi muzungu wakupeleka mabisiketi ku mwanalume wa ku Asia uyo tangumuzunura kale uyo ni mzengezgani wake.

Longorani kuti mukuŵaghanaghanira mwakukorako chijaro kuti chileke kujalika kuti ŵajumphe makora, panji mungaŵapa mpando winu mu basi kuti ŵakhalepo.
Yezgani kuyowoya nawo pachoko waka nanga ni para mukuyowoya makora yayi chiyowoyero chawo.
Zikirani para ŵakuchita vinthu ivyo mukuvipulikiska yayi.
Ŵani na chitima para ŵakumuphalirani vya masuzgo ghawo.

Vinthu Ivyo Vikachitika Nadi: Nazaré (Guinea-Bissau)

“Nyengo yinyake nkhaŵa na sankho ku ŵanthu awo ŵiza kufuma mu vyaru vinyake. Nkhaphalirika kuti ŵanthu ŵanandi ŵakufuma mu vyaru vinyake ŵakuyowoya utesi ku boma na chilato chakuti ŵapoke ndalama panji wovwiri, kweniso kuti ŵanandi mwa ŵanthu aŵa ŵakuŵa vigeŵenga. Ivi vikanipangiska kuti chiniŵire chakusuzga kuŵapokelera. Kweni nkhawonanga kuti nili na sankho yayi chifukwa ŵanthu ŵanandi ndimo ŵakaŵawoneranga ŵanthu awo ŵafuma mu vyaru vinyake.

“Kweni nyengo yikati yajumphapo, nkhamanya kuti nkhaŵa na sankho lekani nkhaŵawonanga mwambura kwenelera ŵanthu aŵa. Fundo za vinjeru za mu Baibolo zikanovwira kuti niŵatemwenge ŵanthu aŵa. Sono nkhuŵagega yayi ŵanthu aŵa. M’malo mwake, nkhuŵatawuzga na kuyowoya nawo. Nkhuŵikapo mtima kuti niŵamanye makora waliyose payekha. Pasono nkhuŵawona mwakwenelera, ndipo nkhufwatuka nawo.”