Vinjeru Ivyo Vingamovwirani Kuti Mukondwenge mu Banja Linu
Nthengwa na ŵana ni vyawanangwa vyakuzirwa chomene vya kufuma kwa Mlengi withu. Iyo wakukhumba kuti tikondwenge mu banja lithu. Ntheura kwizira mu buku lakale lakupatulika, iyo wakutipa ulongozgi uwo ungatovwira kuti tikhalenge makora kweniso mwakukondwa mu banja lithu. Wonani ulongozgi wavinjeru wakulondezgapo uwu.
Ŵafumu, Temwani Ŵawoli Ŵinu
“Ŵafumu nawo ŵatemwenge ŵawoli ŵawo nga ni mathupi ghawo. Mwanalume uyo wakutemwa muwoli wake wakujitemwa yekha. Pakuti palije munthu uyo wakutinkha thupi lake, kweni wakulilyeska na kulipwelelera.”—ŴAEFESO 5:28, 29.
Mfumu ndiyo ni mutu wa banja. (Ŵaefeso 5:23) Kweni mfumu muwemi wakuŵa wa nkhaza yayi panji kukhumba vinandi kwa muwoli wake. Iyo wakuwona muwoli wake kuti ngwakuzirwa ndipo wakumupwelelera mwakuthupi kweniso kumovwira para wakwenjerwa. Kweniso wakuŵikapo mtima kuti muwoli wake wakondwenge ndipo nyengo zose wakudemelera ku ivyo iyo wakukhumba pera yayi. (Ŵafilipi 2:4) Wakuyowoya mwakufwatuka na kutegherezga para muwoli wake wakuyowoya. Iyo wakuŵa ‘mukali’ yayi kwa muwoli wake nesi kumutimba panji kumuyowoyera mazgu ghaheni.—Ŵakolose 3:19.
Ŵawoli, Chindikani Ŵafumu Ŵinu
“Muwoli nayo wachindikenge chomene mfumu wake.”—ŴAEFESO 5:33.
Para muwoli wakuchindika mfumu wake na kukhozgera ivyo wasankha, wakovwira kuti mu banja muŵe mtende. Iyo wakuyuyura mfumu wake yayi para wabudiska chinthu chinyake, kweni wakulutilira kuŵa wakuzika na kumuchindika. (1 Petrosi 3:4) Usange wakukhumba kumuphalira suzgo linyake, wakusankha kumuphalira pa nyengo yiwemi ndipo wakuyowoya mwantchindi kwa mfumu wake.—Mupharazgi 3:7.
Muŵe Ŵakugomezgeka kwa Munyinu wa mu Nthengwa
‘Mwanalume wabatikanenge na muwoli wake ndipo ŵaŵenge thupi limoza.’—GENIZESI 2:24.
Para mwanalume na mwanakazi ŵatorana, ŵakuŵa paubwezi wapadera. Ntheura ŵakutorana ŵakwenera kulutilira kuŵikapo mtima kuti nthengwa yawo yiŵe yakukhora. Iwo ŵakwenera kuyowoyeskana kufumira pasi pa mtima na kuchitirana tunthu twakulongora kuti ŵakutemwana. Kweniso ŵakwenera kugomezgeka kwa yumoza na munyake mwakuleka kugonana na munthu uyo ni mfumu panji muwoli wawo yayi. Vikuŵa vyakupweteka chomene usange munthu waleka kugomezgeka kwa munyake wa mu nthengwa. Ivi vikupangiska kuti ŵaleke kugomezgana kweniso kunanga nthengwa yawo.—Ŵahebere 13:4.
Ŵapapi, Musambizgenge Ŵana Ŵinu
“Lera mwana mu nthowa iyo wakwenera kwendamo, nanga wangakura wafumengemo chara.”—ZINTHARIKA 22:6, mazgu ghamusi.
Chiuta wali kuŵapa udindo ŵapapi wakusambizga ŵana ŵawo. Ivi vikusazgapo kuŵasambizga kuŵa na nkharo yiwemi kweniso kuŵalongora chiyelezgero chiwemi. (Dotoronome 6:6, 7) Para mwana walongora nkharo yiheni, mupapi wavinjeru wakukwiya mwakujumphizga yayi. Iyo ‘wakupulika luŵiro, wakuzikira pakuyowoya, ndipo wakukwiya luŵiro yayi.’ (Yakobe 1:19) Usange mupapi wawona kuti wakwenera kupeleka chilango, wakwenera kupeleka mwachitemwa, mwaukali yayi.
Mwaŵana, Pulikirani Ŵapapi Ŵinu
“Mwaŵana, pulikirani ŵapapi ŵinu . . . ‘Chindika awuso na anyoko.’”—ŴAEFESO 6:1, 2.
Ŵana ŵakwenera kupulikira ŵapapi ŵawo na kuŵachindika chomene. Para ŵana ŵakupulikira ŵapapi ŵawo, vikovwira kuti banja liŵe lakukondwa kweniso kuti panyumba paŵe mtende na umoza. Ŵana awo mbalara msinkhu ŵakulongora kuti ŵakuchindika ŵapapi ŵawo para ŵakuŵapwelelera. Ichi chingasazgapo kuŵawovwira kunozga nyumba yawo kuti yilutilire kuwoneka makora, kweniso kuŵapa wovwiri wa ndalama.—1 Timote 5:3, 4.