Chifukwa Wuli Tikusuzgika, Kuchekura, na Kufwa?

Ŵapapi Ŵithu Ŵakwambilira Ndiwo Ŵali Kupangiska Kuti Tisuzgikenge

“Kwananga kukanjira mu charu na munthu yumoza ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose.”—ŴAROMA 5:12.

Chiuta wakalenga ŵapapi ŵithu ŵakwambilira, Adamu na Eva, na mathupi ghakufikapo na mahara. Wakaŵapaso chikaya chiwemi panji kuti paradiso, munda wa Edeni. Wakaŵaphalira kuti ŵangarya chilichose kufuma mu makuni ghose gha mu munda kweni wakaŵakanizga khuni limoza. Kweni Adamu na Eva ŵakasankha kurya vipambi kufuma mu khuni ilo Chiuta wakaŵakanizga, ndipo ŵakananga. (Genizesi 2:15-17; 3:1-19) Chifukwa chakuti ŵakatondeka kupulikira, Chiuta wakaŵachimbizga mu munda wura, ndipo pamanyuma ŵakamba kusuzgika chomene. Nyengo yikati yajumphapo, ŵakamba kuŵa na ŵana, ndipo ŵana nawo ŵakamba kusuzgika. Wose Adamu na Eva, ŵakachekura na kufwa. (Genizesi 3:23; 5:5) Ntheura tikulwara, kuchekura, na kufwa chifukwa chakuti nase tili kufuma ku banja lakwambilira ili.

Tikusuzgikaso Chifukwa cha Ŵangelo Ŵaheni Awo Ŵakagaluka

“Charu chose chikugona mu nkhongono za muheni.”—1 YOHANE 5:19.

Satana ndiyo “muheni” uyo wakuzunulika apa. Iyo ni mungelo uyo wali kugalukira Chiuta, ndipo ngwakuti tingamuwona yayi pakuti nayo ntchilengiwa chauzimu. (Yohane 8:44; Chivumbuzi 12:9) Pamanyuma, ŵangelo ŵanyake nawo ŵakamulondezga. Ŵangelo aŵa ŵakuchemeka kuti “viŵanda.” Ŵangelo aŵa ŵakupusika ŵanthu kuti ŵafumeko kwa Mlengi wawo. Iwo ŵakupangiska ŵanthu ŵanandi kuti ŵachitenge vinthu viheni. (Salimo 106:35-38; 1 Timote 4:1) Satana na viŵanda ŵakukondwa kupangiska ŵanthu kuti ŵasuzgikenge.

Nyengo Zinyake Tikusuzgika Chifukwa cha Kubudiska Tekha

“Icho munthu wakuseŵa, ndicho wazamuvuna.”—ŴAGALATIYA 6:7.

Munthowa zinandi, tose tikusuzgika chifukwa tili kuhara kwananga kweniso chifukwa cha Satana uyo wakupangiska masuzgo pa charu. Kweni nyengo zinyake ŵanthu ŵakusuzgika chifukwa cha iwo ŵekha. Para ŵakuchita viheni panji kusankha uheni vinthu, ŵakuvuna viheni. Kweni para ŵakuchita viwemi, ŵakuvuna viwemi. Mwachiyelezgero, mfumu panji dada uyo wakuchita vinthu mwakugomezgeka, wakulimbikira ntchito, na kutemwa banja lake, wavunenge vinthu vinandi viwemi ndipo banja lake liŵenge lakukondwa. Kweni uyo wakuchita njuga, wakumwa chomene moŵa, panji mukata wangajinjizga mu ukavu iyomwene pamoza na banja lake. Ntheura tingalongora kuti tili na vinjeru para tikutegherezga kwa Mlengi withu. Iyo wakukhumba kuti tivunenge vinthu vinandi viwemi kusazgapo “mtende ukuru.”—Salimo 119:165.

Tili mu “Mazuŵa Ghaumaliro”

“Mu mazuŵa ghaumaliro . . . , ŵanthu ŵazamuŵa ŵakujitemwa, ŵakutemwa ndalama, . . . ŵambura kupulikira ŵapapi, . . . ŵambura kujikora, ŵakofya, ŵambura kutemwa uwemi.”—2 TIMOTE 3:1-5.

Mazuŵa ghano ŵanthu ŵakulongora nkharo izi nga umo Baibolo likayowoyerathu. Ivyo ŵanthu ŵakuchita vikulongolerathu kuti tili mu “mazuŵa ghaumaliro” gha charu ichi. Malemba ghakayowoyerathu kuti mu mazuŵa ghaumaliro kuzamuŵa nkhondo, kuchepa kwa chakurya, vindindindi, na matenda. (Mateyu 24:3, 7, 8; Luka 21:10, 11) Vinthu ivi vyapangiska masuzgo ghanandi na nyifwa.