Kasi Tekinoloje Yikukhwaska Wuli Kaghanaghaniro Kinu?
Tekinoloje yikovwira ŵanthu kuti ŵalutilire kusambira vyakukhwaskana na sukulu, ntchito na vinyake. Nakuti ivi vindachitikepo mu muwiro wose wa ŵanthu kumanyuma kose uku kuti ŵanthu ŵasange uthenga uwo ŵakukhumba kwambura kuwukapo panyumba panji pa mpando uwo ŵakhala.
Ndipouli, ŵanthu awo ŵakugwiliskira chomene ntchito tekinoloje ŵakusanga kuti . . .
vikuŵasuzga kuti ŵaŵikengeko mahara para ŵakuŵerenga.
vikuŵasuzga kuti ŵalutilire kuŵikapo mahara ghawo ghose pa ntchito iyo ŵakuchita.
ŵakuchedwa yayi kuchita phukwa para ŵali ŵekha.
IVYO MUKWENERA KUMANYA
KUŴERENGA
Kanandi ŵanthu awo ŵakugwiliskira ntchito vinthu vya tekinoloje pakuŵerenga, ŵakuŵerenga waka patalipatali nkhani kuti ŵamanye waka fundo yikuru.
Kuŵazga mwapatalipatali nkhuwemi waka usange mukukhumba kusanga zgoro mwaluŵiro pa fumbo ilo lilipo. Ndipouli, iyi ni nthowa yiwemi yayi usange mukukhumba kuti muyipulikiske makora nkhani iyo mukuŵazga.
FUNDO YAKUTI MUGHANAGHANIREPO: Kasi mukuchita wuli para nkhani iyo mukuŵazga njitali? Chifukwa wuli mungapulikiska makora nkhani para mukuŵazga mwakupwelelera?—ZINTHARIKA 18:15.
KUŴIKA MTIMA PA CHINTHU CHIMOZA
Ŵanthu ŵanyake ŵakuti tekinoloje yikuŵawovwira kuti ŵachitenge vinthu viŵiri panyengo yimoza. Mwachiyelezgero, ŵangalembera ŵabwezi ŵawo mameseji uku ŵakuŵerenga. Kweni para panyengo yimoza maghanoghano ghali kuŵiri, ŵangachita makora yayi vyose viŵiri, chomene usange vyose vikukhumba kughanaghanirapo.
Munthu wakwenera kujikora kuti walutilire kuŵikapo mtima pa chinthu chimoza icho wakuchita, ndipo ntchakuzirwa chomene kuchita nthena. Grace uyo wali na vyaka 14 wakuti: “Para wamunthu ukuŵikapo mahara ghose pa ivyo ukuchita, ukubudiska vinandi yayi kweniso ukwenjerwa viŵi yayi. Ine nasambira kuti ntchiwemi kuti panyengo yimoza wamunthu utangwanikenge na chinthu chimoza kuluska kuchitaso vinyake.”
FUNDO YAKUTI MUGHANAGHANIREPO: Kasi tekinoloje yikumupangiskani kuti mutondekenge kuŵika mtima pa chinthu chimoza icho mukuchita panji kutondeka kukumbuka ivyo mwaŵerenganga?—ZINTHARIKA 17:24.
PHUKWA
Ŵanthu ŵanyake vikuŵasuzga para ŵali ŵekha pa malo, ntheura ŵakuwona kuti tekinoloje yikuŵawovwira kumazga phukwa. Mwachiyelezgero, mwanakazi munyake zina lake Olivia wakuti: “Vikunisuzga kuti nikhale waka kwa maminiti 15 kwambura kuwona pa foni, pa tabuleti panji kujura TV.”
Kweni para wamunthu uli wekha ndiyo ni nyengo yiwemi chomene ya kughanaghanirapo pa ivyo ukusambira. Fundo iyi yikugwira ntchito kosekose, ku ŵachinyamata na ŵalara wuwo.
FUNDO YAKUTI MUGHANAGHANIREPO: Kasi para muli mwekha, mukugwiliskira ntchito nyengo iyi kughanaghanirapo ivyo mwasambiranga?—1 TIMOTE 4:15.
IVYO MUNGACHITA
SANDANI UMO MUKUGWILISKIRA NTCHITO VINTHU VYA TEKINOLOJE
Kasi mungagwiliskira wuli ntchito tekinoloje kuti yimovwirani kusambira vinandi? Kasi tekinoloje yingamutimbanizgani wuli pa nkhani ya kusambira kweniso kuleka kuŵikapo mtima pa icho mukuchita?
FUNDO YA MU BAIBOLO: “Sungilira vinjeru na kaghanaghaniro kawemi.”—ZINTHARIKA 3:21.