Kasi Mungamanya Wuli Uwo Mbunenesko?
“Kuchanya na charu chapasi vingaŵako vyekha.”—Stephen Hawking na Leonard Mlodinow, ŵanthu awo ŵakufufuza za vinthu ivyo viliko, 2010.
“Pakwamba, Chiuta wakalenga kuchanya na charu chapasi.”—Baibolo pa Genizesi 1:1.
Kasi kuchanya na charu chapasi kweniso vyamoyo vikalengeka na Chiuta panji vikaŵako waka vyekha? Ivyo ŵanthu ŵaŵiri ŵakufufuza awo ŵazunulika pachanya apa ŵakayowoya, na ivyo Baibolo likayowoyerathu pakwambilira vikupeleka mazgoro ghakupambana gha fumbo ili. Ŵanthu ŵanyake ŵakugomezga ivyo ŵanthu ŵakufufuza aŵa ŵakayowoya, apo ŵanyake ŵakugomezga ivyo Baibolo likuyowoya. Kweniso paliso ŵanthu ŵanyake awo ŵakumanya yayi. Ŵanthu ŵakususkana pa nkhani iyi mu mabuku kweniso pa TV.
Panji ŵasambizgi ŵinu ku sukulu ŵakamuphalirani mwakusimikizga kuti Chiuta kulije ndipo kuchanya na charu chapasi kweniso vyamoyo vikaŵako waka vyekha. Kweni kasi ŵasambizgi ŵinu ŵakamupani ukaboni wakuti Mlengi kulije? Kweniso mungaŵa kuti muli kupulikapo ŵalongozgi ŵa chisopa ŵakuyowoya kuti kuli Mlengi. Kasi ŵakamupani ukaboni pa ivyo ŵakuyowoya? Panji kasi ŵakamuphalirani waka kuti mukwenera kugomezga waka kuti kuli Chiuta?
Tikukayika yayi kuti muli kughanaghanirapo fumbo ili ndipo panji mukawona kuti palije uyo wangayowoya mwakusimikizga kuti kuli Mlengi panji yayi. Kweniso panji mungajifumba usange ntchakuzirwa kutangwanika na kumanya zgoro la fumbo ili.
Chakwamba, magazini iyi ya Wukani! yilongosorenge vifukwa ivyo vyapangiska ŵanthu ŵanandi kugomezga kuti kuli Mlengi. Pamanyuma yilongosorenge chifukwa icho chiliri chakuzirwa kumanya unenesko pa nkhani ya umo kuchanya na charu chapasi vikaŵirako.