Chifukwa Wuli Ntchakuzirwa Kumanya Usange Mlengi Waliko?
Chifukwa wuli ntchakuzirwa kumanya usange kuli Mlengi? Usange mwakhorwa na ukaboni wakulongora kuti Mlengi waliko, mbwenu mungasanda ukaboni wakulongora kuti Baibolo ndakufuma kwa iyo. Ndipo para mungagomezga ivyo Baibolo likuyowoya, mbwenu mungasanga chandulo munthowa zakulondezgapo izi.
Mukondwenge chomene na umoyo
BAIBOLO LIKUTI: “[Chiuta] wakuchita vinthu viwemi. Wakumupani vula kufuma kuchanya na nyengo za vipambi, wakumupani vyakurya na kuzuzga mitima yinu na chimwemwe.”—Milimo 14:17.
IVYO FUNDO IYI YIKUNG’ANAMURA: Vinthu vyose ivyo mukukondwa navyo pa charu ntchawanangwa chakufuma kwa Mlengi. Mungawonga chomene vyawanangwa ivi para mwamanya kuti uyo wakumupani vyawanangwa ivi wakumutemwani.
Musangenge ulongozgi uwo ungamovwirani
BAIBOLO LIKUTI: “Umanyenge makora icho ntchaurunji, chakwenelera, na chakunyoloka, nthowa yose ya uwemi.”—Zintharika 2:9.
IVYO FUNDO IYI YIKUNG’ANAMURA: Pakuŵa Mlengi, Chiuta wakumanya ivyo mukukhumbikwira kuti muŵe ŵakukondwa. Para mungaŵerenga Baibolo mungasambira vinandi ivyo vingamovwirani.
Musangenge mazgoro gha mafumbo ghinu
BAIBOLO LIKUTI: ‘Mumumanyenge nadi Chiuta.’—Zintharika 2:5.
IVYO FUNDO IYI YIKUNG’ANAMURA: Para mwamanya kuti Mlengi waliko vingamovwirani kuti musange mazgoro gha mafumbo ghakuzirwa nga ghakuti: Chifukwa wuli tili na umoyo? Chifukwa wuli pali masuzgo ghanandi? Kasi chikuchitika ntchivichi para tafwa? Mungasanga mazgoro ghakukhorweska mu Baibolo.
Muŵenge na chigomezgo kuti munthazi vinthu viŵenge makora
BAIBOLO LIKUTI: “Yehova wakuti: ‘Pakuti nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo.’”—Yeremiya 29:11.
IVYO FUNDO IYI YIKUNG’ANAMURA: Chiuta walayizga kuti wazamumazga vinthu viheni, masuzgo kweniso nanga ni nyifwa. Para mukugomezga ivyo Chiuta walayizga, vimovwiraninge kuchita mwamahara na masuzgo agho mukukumana nagho.