Kufuma pa Nyengo ya Cigumula Mupaka pa Kuwombokwa ku Egupto

Ŵanthu ŵankhondi na ŵatatu pera ndiwo ŵakapona pa Cigumula, kweni mukuluta kwa nyengo ŵakandana comene. Ndipo, vilimika 352 pamanyuma pa Cigumula, Abrahamu wakababika. Tisambilenge umo Ciuta wakakwaniliskira layizgano lake mwa kupeleka mwana mwanalume kwa Abrahamu, zina lake Yisake. Ndipo, pa ŵana ŵaŵiri ŵa Yisake, Yakobe ndiyo wakasankhika na Ciuta.

Yakobe wakaŵa na mbumba yikuru ya ŵana ŵanalume 12 na ŵana ŵanyake ŵanakazi. Ŵana ŵanalume khumi ŵa Yakobe ŵakatinkha munung’una wawo Yosefe ndipo ŵakamuguliska ku wuzga ku Egupto. Pamanyuma pake, Yosefe wakaŵa fumu yakuzirwa mu Egupto. Peneapo kukaŵa njara, Yosefe wakayezga ŵabali ŵake kuti wawone usange ŵasintha mitima yawo. Paumaliro pake, mbumba yose ya Yakobe, Ŵaisrayeli, yikasamukira ku Egupto. Ici cikacitika vilimika 290 pamanyuma pa kubabika kwa Abrahamu.

Ŵaisrayeli ŵakakhala mu Egupto vilimika 215 vyakulondezgapo. Yakobe wakati wafwa, ŵakaŵa ŵazga mu Egupto. Mukuluta kwa nyengo, Mozesi wakababika, ndipo Ciuta wakamugwiliskira nchito kuti wafumiske Ŵaisrayeli mu Egupto. Cigaŵa CACIŴIRI cili na vyakucitika ivyo vikatora vilimika 857.