Cifukwa Ico Mozesi Wakacimbilira

WONA Mozesi wakucimbira kufuma mu Egupto. Kasi waŵawona ŵanalume awo ŵakumucimbizga? Kasi ukumanya cifukwa ico ŵakukhumbira kukoma Mozesi? Tiye tiwone usange tingasanga cifukwa cake.

Mozesi wakakulira mu nyumba ya Faro, fumu ya Egupto. Wakaŵa munthu wamahara ndiposo wakuzirwa comene. Mozesi wakamanyanga kuti wakaŵa Muegupto yayi, kweni kuti ŵapapi ŵake ŵakaŵa ŵazga Ŵaciisrayeli.

Zuŵa linyake, apo wakaŵa na vilimika 40, Mozesi wakaghanaghana za kuluta kukawona umo ŵanthu ŵakwawo ŵakaŵira. Wakawona kuti Ŵaegupto ŵakaŵacitilanga nkhaza comene. Wakawona Muegupto wakatimbanga Muisirayeli. Mozesi wakalaŵiska uku na uku, ndipo wakati wawona kuti palije munthu waliyose uyo wakumuwona, wakatimba Muegupto ndipo Muegupto wakafwa. Mozesi wakawundira citanda cake pa mcenga.

Zuŵa lakulondezgapo Mozesi wakalutaso kuti wakawone ŵanthu ŵakwawo. Wakaghanaghana kuti panyake wangaŵawovwira kuti ŵaleke kuŵa ŵazga. Kweni wakawona ŵanalume ŵaŵiri Ŵaciisrayeli ŵakutimbana, antheura Mozesi wakati kwa uyo wakabuda: ‘Kasi ukumutimbilaci mbali wako?’

Mwanalume yura wakati: ‘Ninjani wakwimika kuŵa fumu panji mweruzgi withu? Kasi ukukhumba kunikoma nga ni umo ukakomera Muegupto yura?’

Mozesi wakayamba kopa. Wakamanya kuti ŵanthu ŵamanya ico wakacitira Muegupto. Nanga ni Faro nayo wakapulika, ndipo wakatuma ŵanalume kuti ŵakome Mozesi. Ndico cifukwa cake Mozesi wakacimbira mu caru ca Egupto.

Mozesi wakati wafuma mu Egupto, wakaluta kutali ku caru ca Midiyani. Ku Midiyani wakakumana na mbumba ya Yetiro, ndipo wakatora yumoza wa ŵana ŵake zina lake Zipora. Mozesi wakaŵa muliska wa mberere za Yetiro. Wakakhala mu Midiyani vilimika 40. Yikafika nyengo apo wakaŵa na vilimika 80. Zuŵa linyake, apo Mozesi wakaliskanga mberere za Yetiro, cinthu cinyake cakuziziswa cikacitika ico cikasintha umoyo wose wa Mozesi. Jula peji lakulondezgapo, ndipo tiwone cinthu cakuziziswa ici.