Kufuma pa Kuwombokwa ku Egupto Kufika pa Fumu Yakwamba ya Israyeli

Mozesi wakalongozga Ŵaisrayeli kufuma ku wuzga mu Egupto kuluta ku Phiri la Sinayi, uko Ciuta wakaŵapa malango ghake. Nyengo yikati yajumphapo, Mozesi wakatuma ŵanalume 12 kukendera caru ca Kenani. Kweni pa ŵanalume 12 aŵa, 10 ŵakawera na lumbiri luheni. Ŵakapangiska ŵanthu kukhumba kuwelera ku Egupto. Cifukwa ca kuŵavya cipulikano, Ciuta wakalanga Ŵaisrayeli mwakuŵayingiska mu mapopa vilimika 40.

Paumaliro pake, Yoswa wakasankhika kuti walongozge Ŵaisrayeli kunjira mu caru ca Kenani. Kuti waŵawovwire kupoka caru, Yehova wakacita minthondwe. Wakapangiska maji gha Mronga wa Yorodani kuleka kwenda, viliŵa vya Yeriko kuwa, na dazi kwimilira zuŵa lose. Pakati pajumpha vilimika vinkhondi na cimoza, Ŵaisrayeli ŵakapoka caru ca Ŵakenani.

Kwambira pa Yoswa, ŵeruzgi ŵakawusa Israyeli kwa vilimika 356. Tisambirenge ŵanandi ŵa iwo kusazgapo Baraki, Gidiyoni, Yefita, Samusoni na Samuyeli. Tiŵazgengeso za ŵanakazi ŵa nga ni Rahabi, Debora, Yayeli, Rute, Naomi na Delila. Cigaŵa CACITATU cili na vyakucitika ivyo vikatora vilimika 396.