Yehoshafati Wakagomezga Yehova

KASI ŵanalume aŵa ukuŵamanya, ndiposo ivyo ŵakucita? Ŵakuluta ku nkhondo, ndipo ŵanalume awo ŵali panthazi ŵakwimba sumu. Kweni ungafumba kuti: ‘Nchifukwa wuli awo ŵakwimba sumu ŵalije virwero vya nkhondo?’ Tiye tiwone cifukwa cake.

Yehoshafati wakaŵa fumu ya ufumu wa mafuko ghaŵiri gha Israyeli. Wakaŵako pa nyengo yakuyana waka na Yezebeli na Ahabu, Fumu ya ufumu wa kumpoto wa mafuko 10. Kweni Yehoshafati wakaŵa fumu yiwemi, nga ni umo wakaŵira Asa, awiske. Pa cifukwa ici, ufumu wa kumwera wa mafuko ghaŵiri ukasangwa na umoyo uwemi kwa vilimika vinandi.

Kweni pakacitika cinthu cinyake ico cikapangiska ŵanthu kucita wofi. Mathenga ghakaphalira Yehoshafati kuti: ‘Kukwiza ŵasilikari ŵanandi kufumira ku vyaru vya Moabu, Amoni na Phiri la Seiri kuti ŵatimbane namwe.’ Ŵaisrayeli ŵanandi ŵakawungana mu Yerusalemu kuti ŵalombe wovwiri kwa Yehova. Ŵakaluta ku tempele uko Yehoshafati wakalomba kuti: ‘Mbaya mwe Yehova Ciuta withu, tikumanya yayi ico tingacita. Tilije nkhongono za kutimbirana na ŵasilikari ŵanandi aŵa. Tikuthemba wovwiri winu.’

Yehova wakapulika, ndipo wakatuma yumoza wa ŵateŵeti ŵake kuphalira ŵanthu kuti: ‘Nkhondo njinu cara, nja Ciuta. Mwamukhumbikwira kurwa nkhondo yayi. Mwimilire waka cete na kuwona ciponosko ca Yehova.’

Antheura namulenji Yehoshafati wakaphalira ŵanthu kuti: ‘Gomezgani mwa Yehova!’ Wakaŵika ŵanthu awo ŵakayimbanga sumu panthazi pa ŵasilikari, ndipo peneapo ŵakendanga ŵakimbangaso sumu zakulumba Yehova. Kasi ukumanya ico cikacitika ŵakati ŵafika kufupi ku nkhondo? Yehova wakapangiska ŵalwani ŵawo kutimbana ŵekhaŵekha. Ndipo Ŵaisrayeli ŵati ŵafika, ŵakasanga kuti ŵalwani wose ŵafwa!

Kasi Yehoshafati wakacita cinthu camahara yayi kugomezga mwa Yehova? Ise nase tiŵenge ŵamahara usange timukugomezga.