Mu Cipinda ca Pacanya

SONO mpha Cinayi usiku, pajumpha mazuŵa ghaŵiri. Yesu na ŵapositole ŵake 12 ŵanjira mu cipinda cikuru ca pacanya kuzakarya Paska. Mwanalume uyo ukuwona wakufuma ni Yuda Isikariyote. Wakuluta kukaphalira ŵasofi umo ŵangakolera Yesu.

Mayiro ghake, Yuda wakaluta kukaŵafumba kuti: ‘Kasi munipengeci para namovwirani kukora Yesu?’ Iwo ŵakati: ‘ndarama 30 za siliva.’ Ntheura Yuda wakaluta kukakumana na ŵanthu aŵa mwakuti walute nawo kwa Yesu. Kasi ici nchinthu cakofya yayi?

Cakurya ca Paska cikamara. Kweni Yesu pa nyengo yeneyiyo wakambiska cakurya cinyake capadera. Wakapeleka cingwa ku ŵapositole ŵake na kuŵaphalira kuti: ‘Torani murye, pakuti ili ni thupi lane ilo lipelekekenge cifukwa ca imwe.’ Pamanyuma pake wakaŵapa nkhombo ya vinyo na kuŵaphalira kuti: ‘Mwaninge, pakuti izi ni ndopa zane izo zithikenge cifukwa ca imwe.’ Baibolo likucema ici kuti “Monesko wa Fumu,” panji ‘cakurya ca mise ca Fumu.’

Ŵaisrayeli ŵakaryanga Paska kuti ŵakumbukirenge apo mungelo wa Ciuta wakajumphilira nyumba zawo mu Egupto, kweni wakakoma ŵana ŵakwamba ŵa Ŵaegupto. Kweni pa nyengo iyi Yesu wakakhumbanga kuti ŵalondezgi ŵake ŵamukumbukirenge na umo wapelekerenge umoyo wake cifukwa ca iwo. Ndico cifukwa cake wakaŵaphalira kuti ŵacitenge ciphikiro ca cakurya capadera ici cilimika cilicose.

Ŵati ŵarya Monesko wa Fumu, Yesu wakaphalira ŵapositole ŵake kuti ŵaŵe ŵacikanga na ŵakukhora mu cipulikano. Paumaliro pake, ŵakimba sumu yakulumba Ciuta na kufuma. Ukaŵa usiku comene, nyengo yikenera kuti yikajumpha pakati pa usiku. Tiye tiwone uko ŵakaluta.

Mateyu 26:​14-30; Luka 22:​1-39; Yohane cipaturo 13 mupaka 17; 1 Ŵakorinte 11:20.