Kulindilira mu Yerusalemu

ŴANTHU aŵa ŵali apa mbasambiri ŵa Yesu. Ŵakamupulikira na kulindilira mu Yerusalemu kwambura kufumamo. Ndipo peneapo wose ŵakalindiliranga, mu nyumba mukaŵa congo cikuru. Cikaŵa nga ni mphepo yankhongono. Ndipo malulimi gha moto ghakawoneka pa mitu ya ŵasambiri wose. Kasi ukuwuwona moto pa mutu wa waliyose wa iwo? Kasi ivi vikung’anamuraci?

Nchinthu cakuziziswa! Yesu wakafika kucanya kwa awiske, ndipo wakapungulira mzimu utuŵa wa Ciuta pa ŵasambiri ŵake. Kasi ukumanya ico mzimu uwu ukaŵapangiska kucita? Wose ŵakayamba kuyowoya viyowoyero vyakupambanapambana.

Ŵanthu ŵanandi mu Yerusalemu ŵakapulika congo ico cikapulikikwa nga ni mphepo yankhongono, ndipo ŵakaluta kuti ŵakawone ico cikacitikanga. Ŵanthu ŵanyake ŵakafumira ku vyaru vinyake, ŵakizira ciphikiro ca Pentekoste ico Ŵaisrayeli ŵakacitanga. Mwee, naco nchinthu cakuziziswa ico ŵalendo ŵakawona! Iwo ŵakapulika ŵasambiri ŵakuyowoya mu viyowoyero vyawo vinthu vyakuziziswa ivyo Ciuta wacita.

‘Ŵanthu aŵa wose mba ku Galileya,’ ŵakayowoya mwantheura. ‘Ŵakuyowoya wuli mu viyowoyero vyakupambanapambana vya mu vyaru ivyo ise tikufumira?’

Pa nyengo iyi, Petrosi wakimilira kuti waŵalongosolere. Wakayowoya mwa kukwezga na kuphalira ŵanthu umo Yesu wakakomekera ndiposo kuti Yehova wakamuwuska ku ŵakufwa. ‘Sono Yesu wali kucanya ku woko lamalyero la Ciuta,’ wakati ntheura Petrosi. ‘Ndipo wapungulira mzimu utuŵa uwo wakalayizga. Ndico cifukwa cake mukuwona na kupulika vinthu vyakuziziswa ivi.’

Petrosi wakati wayowoya vinthu ivi, ŵanthu ŵanandi ŵakacita citima comene na ivyo vikacitikira Yesu. ‘Kasi ticiteci,’ iwo ŵakafumba ntheura. Petrosi wakaŵaphalira kuti: ‘Mukwenera kusintha umoyo winu na kubapatizika.’ Mwantheura pa zuŵa lenelira ŵanthu pafupifupi 3,000 ŵakabapatizika na kuŵa ŵasambiri ŵa Yesu.