Mizimu Yindakhalepo na Umoyo na Kufwa Pano Pasi
Mizimu yiliko! Mu malo ghambura kuwoneka na maso, muli mizimu yiweme na yiheni. Kasi iyo ni ŵantu awo ŵakakhala na umoyo na kufwa pano pasi?
Yayi. Para muntu wafwa wakuruta ku malo gha mizimu cara, nga ni umo ŵantu ŵanandi ŵakughanaghanira. Tikumanya wuli za ici? Cifukwa Baibolo ndimo likuyowoyera. Baibolo ni buku la unenesko wakufuma kwa Ciuta waunenesko yekha, uyo zina lake ni Yehova. Yehova ndiyo wakalenga ŵantu; ndipo wakumanya makora ico cikucitika para ŵantu ŵafwa.—Salmo 83:18; 2 Timothy 3:16.
Baibolo likuyowoya kuti Ciuta wakalenga Adamu, mwanarumi wakwamba “na dongo la pasi.” (Genesis 2:7) Ciuta wakamuŵika Adamu mu Paradiso, munda wa Eden. Usange Adamu wapulikirenge dango la Yehova, mpanyi wandafwe; mpanyi wacali wamoyo pano pacaru capasi. Kweni apo Adamu wakacitira dala kuleka kupulikira dango la Ciuta, Ciuta wakati kwa iye: ‘Uwererenge ku fuvu, cifukwa ukatoreka mwenemumo; ndiwe fuvu, ndipo ku fuvu tiuwerereko.’—Genesis 3:19.
Kasi ici cikung’anamuraci? Eya, kasi Adamu wakaŵanku apo Yehova wakaŵa wandamulenge kufuma ku dongo? Kukaŵavye. Iye wakaŵa mzimu cara wambura kubabika kucanya. Wakaŵa wandalengeke. Mwanteura, apo Yehova wakayowoya kuti Adamu ‘wawererenge ku fuvu,’ wakang’anamuranga kuti Adamu wafwenge. Wakaruta ku caru ca mizimu cara. Apo Adamu wakafwa, wakamalira penepapo, wakazgoka fuvu. Nyifwa nkuleka kuŵako kwa umoyo.
Wuli pakuyowoya za ŵantu awo ŵalikufwa? Kasi nawo ndikuti ŵalije umoyo? Baibolo likuzgora kuti:
“Vyose [ŵantu na vinyama] vikuya ku malo ghamoza; vyose nvya fuvu, ndipo ku fuvu vikuweleraso vyose.”—Mupharazgi 3:20.
“Ŵakufwa kuti ŵakumanya kantu cara.”—Mupharazgi 9:5.
‘Citemwa caŵo na thinko laŵo na sanji yaŵo sono vyamara.’—Mupharazgi 9:6.
“Kulije mlimo, panji maghanoghano, panji mahara, panji vinjeru, mu malalo uko ukuya.”—Mupharazgi 9:10.
‘[Muntu] wakuwerera ku dongo; mu zuŵa leneilo pera vyose ivyo wapukwanga vikumara.’—Salmo 146:4.
Kasi ncakusuzga kwa imwe kugomezga malemba agha? Usange ni ntena, ipo aghanaghanani za ici: Mu mbumba zinandi, mwanarumi ndiyo wakupenja ndarama zakuti wavwilire mbumba yake. Para mwanarumi wafwa, mbumba yake yikuŵa pa suzgo. Nyengo zinyake muwoli wake na ŵana ŵake ŵakuŵavya ndarama zakuti ŵagulire cakurya. Panyake ŵarwani ŵa mwanarumi yura wafwa ŵangiza na kusuzga mbumba yake. Sono jifumbani kuti: ‘Usange mwanarumi yura ngwamoyo ku caru ca mizimu, ncifukwa wuli wakuleka kupwererera mbumba yake? Ncifukwa wuli wakuleka kuthaska mbumba yake ku ŵantu ŵankaza?’ Ipo malemba ghakuneneska. Mwanarumi yura walije umoyo, wangacita cilicose cara.—Salmo 115:17.
Kasi ici cikung’anamura kuti ŵakufwa ŵaŵengeso na umoyo cara? Yayi, ndico cikung’anamura cara. Tidumbiskanenge za ciwuka pamanyuma. Kweni cikung’anamura kuti ŵakufwa ŵakumanya kantu cara za ivyo imwe mukucita. Ŵangamuwonani cara, panji kumupulikani, nesi kuyowoya namwe, yayi. Lekani kuŵawopa. Ŵangamovwirani cara, ndipo ŵangamupwetekani cara.—Mupharazgi 9:4; Yesaya 26:14.
[Cithuzithuzi pa peji 4]
Adamu wakafumira ku dongo, wakawerera ku dongo
[Cithuzithuzi pa peji 5]
Ŵamoyo ŵekha ndiwo ŵangacita ncito izi
[Cithuzithuzi pa peji 6]
Ŵakufwa ŵangawovwira cara ŵantu ŵanjala panji kuthaska awo ŵakusuzgika