Cigaŵa 1
Kasi Ciuta Wakutipwelelera Nadi?
1, 2. Ni fumbo wuli ilo ŵanthu ŵakufumba pakuyowoya za Ciuta, ndipo cifukwa wuli?
MUTEPANJI muli kufumbapo kuti: ‘Usange Ciuta waliko ndipo wakutipwelelera nadi, cifukwa wuli wakuzomerezga kuti tisuzgikenge?’ Waliyose wa ise wali kusuzgikapo panji wakumanya yunji uyo wakusuzgika.
2 Ndipo nadi, kwambira kale, ŵanthu ŵakusuzgika na nkhondo, nkhaza, kuswa malango, kutemwera, ukavu, matenda, ndiposo nyifwa ya ŵakutemweka ŵawo. Mu vilimika vya mu ma 1900 pera, ŵanthu ŵakujumpha 100 miliyoni ŵali kukomeka na nkhondo. Ŵanyake ŵali kupwetekeka panji nyumba na katundu wawo vili kuparanyika. Vinthu vinandi viheni vikucitika lero, kupangiska ŵanthu ŵanandi kuŵa ŵacitima ndiposo ŵambura cilindizga cilicose.
3, 4. Kasi ŵanthu ŵanandi ŵayowoyaci pa fundo yakuti Ciuta wazomerezga masuzgo kuti ghaŵepo?
3 Ŵanyake ŵakukwiya ndipo ŵakughanaghana kuti usange Ciuta waliko nadi, ndikuti wakughanaghanako yayi za ise. Mutepanji ŵakughanaghanaso kuti Ciuta kulije. Mwaciyelezgero, mwanalume uyo ŵabwezi ŵake na ŵabali ŵake ŵakakomeka mu Nkhondo Yakwamba ya Caru Cose wakafumba kuti: “Kasi Ciuta wakaŵa nkhu apo tikamukhumbanga?” Mwanalume munyake uyo wakapona peneapo ŵasilikari wa Nazi ŵakakomanga ŵanthu mu nyengo ya Nkhondo Yaciŵiri ya Caru Cose, wakaŵa na citima comene cifukwa ca ivyo wakawona, ndipo wakati: “Nkhapwetekeka comene mu mtima.”
4 Mwantheura, ŵanthu ŵanandi ŵakupulikiska yayi cifukwa ico Ciuta wakulekelera waka vinthu viheni kuti vicitikenge. Ŵakufumba usange Ciuta wakutighanaghanira panji usange waliko nadi. Ndipo ŵanyake ŵakughanaghana kuti masuzgo ghazamumara yayi.
Kulekapo kwekha usange talongora Baibolo linyake Malemba gha burosha lino ghafuma mu Tumbuka Bible. Ndipouli, Citumbuka ici tacilemba mwakulondezga malango ghasono gha kalembero. Apo talongora NW cikulongora kuti lemba lafuma mu Baibolo la Cingelezi la New World Translation of the Holy Scriptures—With References
[Cithuzithuzi pa peji 2, 3]
Kasi caru ciphya cambura masuzgo cili pafupi?