Sambiro 7

Kusenderera kwa Ciuta mu Pempero

Cifukwa ncici ncakuzirwa kupempera rutaluta? (1)

Nkwa njani uko tikwenela kupempera, ndipo mwauli? (2, 3)

Kasi fundo za kwenerera kupempa mupempero ndi nzi? (4)

Mpambuni apo mukwenera kupempera? (5, 6)

Kasi Ciuta wakupulika mapempero ghose? (7)

1. Pempero ndiko kuyowoya kwa Ciuta mwa kujicefya. Mukwenera kupempera kwa Ciuta lutaluta. Mwanteura ndimo mungajipangira kuŵa kufupi na iye ngati ndi bwezi lakutemweka. Yehova ndi mukuru kweniso wankongono zose, ndipouli wakupulika malurombo ghithu! Kasi mukupempera kwa Ciuta rutaluta?—Salmo 65:2; 1 Ŵatesalonika 5:17.

2. Pempero ncigaŵa ca kusopa kwithu. Mwanteura, tikwenera kudunjika mapempero ghithu kwekha kwa Ciuta, Yehova. Apo Yesu wakaŵa pa caru capasi wakapempera nyengo zose ku Ŵawiske, kuti kwa m’nyake waliyose cara. Tikwenera kucita mwanteura. (Mateyu 4:10; 6:9) Ndipouli, mapempero ghithu ghose ghakwenera kuyowoyeka mu zina la Yesu. Ici cikurongora kuti tikutumbika malo gha Yesu nakuti tinacigomezgo mu sembe yake yakuwombola ŵantu.—Yohane 14:6; 1 Yohane 2:1, 2.

3. Para tikupempera tikwenela kuyowoya kwa Ciuta kufumira pasi pa mtima. Tingapemperanga mapempero ghithu mwakucita kusunga pamtima nesi kucita kuŵazga mu buku la mapempero cara. (Mateyu 6:7, 8) Tingapempera muntowa yiliyose yancindi, pa nyengo yiliyose, na pamalo ghalighose. Ciuta wangamanya kupulika nanga kwali pempero lithu lingaŵa lacisisi, mu mtima withu. (1 Samuel 1:12, 13) Nciwemi kusanga malo uko kulije ciwawa, kutali na ŵantu ŵanji kuti tiyowoye mapempero gha ise taŵene.—Marko 1:35.

4. Kasi ni fundo uli izo mungapempera? Zirizose izo mtepanji zingakhwafya ubwezi winu na iye. (Ŵafilipi 4:6, 7) Pempero laciyezgerero likurongora kuti tikwenera kupemperera zina la Yehova na khumbo lake. Tingapempaso vyakusoŵa vithu vyakuthupi kuti watipe, kugowokereka zakwananga zithu, na covwiro kuti titonde viyezgo. (Mateyu 6:9-13) Mapempero ghithu ghangaŵanga gha kujighanaghanira taŵeneco pera yayi. Tikwenera kupempelera kwekha vintu vyakuyana na khumbo la Ciuta.—1 Yohane 5:14.

5. Mungapempera nyengo yiliyose apo mtima wamukhuŵirizgani kupereka viwongo na kucindika Ciuta. (1 Midauko 29:10-13) Pemperani usange muna masuzgo ndipo cigomezgo cinu cikuyezgeka. (Salmo 55:22; 120:1) Ncakwenerera kupempera pambere mundarye cakurya cinu. (Mateyu 14:19) Yehova wakuticema kuti tipemperenge “nyengo zose.”—Ŵaefeso 6:18.

6. Ise comene-comene tikwenera kupempera usange tanjizgika mkwananga kukuru. Panyengo ya nteura iyi tikwenera kuŵeyerera cisungusungu ca Yehova na cigowokero. Usange tazomerezga zakwananga zithu kwa iye na kuyezga kucita ciricose kuzireka, Ciuta “watigowokerenge.”—Salmo 86:5; Zintharika 28:13.

7. Yehova wakutegherezga ku mapempero gha ŵarunji pera. Kuti mapempero ghinu ghapulikikwe na Ciuta, mukwenera kuŵa ŵakuŵikapo mtima kuyezga kukhala na umoyo mwakukorereranako na marango ghake. (Zintharika 15:29; 28:9) Mukwenera kuŵa ŵakujicefya para mukupempera. (Luka 18:9-14) Mukwenera kuyezgayezga kucita mwakulingana na kupempa kwinu. Mwanteura muti mujisimikizgire kuti munacipulikano nakuteso ivyo mukupempa vina ng’anamulo. Ndi kwekha mwanteura ndipo Yehova wazgorenge mapempero ghinu.—Ŵahebere 11:6.