Sambiro 16

Kusanka Kwinu kwa Kumteŵetera Ciuta

Kasi mungacitaci kuti muŵe bwezi la Ciuta? (1, 2)

Ndi mwauli umo mukupangira kujipereka kwinu kwa Ciuta? (1)

Mpa uli apo mukwenera kubabatizika? (2)

Nkongono zakuti mukhalirire ŵakugomezgeka kwa Ciuta mungazisanga uli? (3)

1. Kuti muŵe bwezi la Ciuta, mukwenera kusanga cimanyisko ciwemi ca unenesko wa Baibolo (1 Timote 2:3, 4), kupulikana na vintu ivyo mwasambira (Ŵahebere 11:6), kuzomera zakwananga zinu (Milimo 17:30, 31), ndipo na kusinta mu ntowa yinu ya umoyo. (Milimo 3:19) Penepapo citemwa cinu kwa Ciuta cimukhuŵilizgeni kujipereka mwekha kwa iye. Ici cikung’anamura kuti mu pempero la mwaŵene, la kuudesi mukumuphalira kuti mukujipereka imwe mwaŵene kwa iye kucita khumbo lake.—Mateyu 16:24; 22:37.

2. Pamanyuma pakuti mwapanga kujipereka kwinu kwa Ciuta mukwenera kubabatizika. (Mateyu 28:19, 20) Ubabatizo ukurongora pakwelu kwa waliyose kumanya kuti mwajipereka kwa Yehova. Mwanteura ubabatizo ngwa ŵarara awo ŵangapanga cakusanka cakumteŵetera Ciuta. Para muntu wababatizika, thupi lake lose likwenera kubizgika mumaji kwa kanyengo.a—Marko 1:9, 10; Milimo 8:36.

3. Pamanyuma pakuti mwapanga kujipereka, Yehova wana cirindizga cakuwona kuti mukufiska pangano linu. (Salmo 50:14; Mupharazgi 5:4, 5) Diabolosi wayezgenge kumulekeskani kuteŵetera Yehova. (1 Petros 5:8) Kweni sendererani kwa Ciuta mu pempero. (Ŵafilipi 4:6, 7) Ŵerengani Mazgu ghake zuŵa na zuŵa. (Salmo 1:1-3) Skepelerani ku mpingo. (Ŵahebere 13:17) Mwakucita vyose ivi, muti mukhozgeke nkongono nakurutilira kuŵa ŵakugomezgeka kwa Ciuta. Ku umuyirayira wose imwe mwanteura mungacita vintu ivyo Ciuta wakukhumba kwa imwe!

[Mazgu ghamusi]