Msambizgi Waluso Wakateŵeteranga Ŵanji

KASI ukukondwa para muntu wakucitira cintu ciweme?— Ŵantu ŵanyake nawo ŵakukondwa para yunji waŵacitira cintu ciweme. Tose tikukondwa. Msambizgi Waluso wakamanya za ici, ndipo nyengo zose wakateŵeteranga ŵantu. Iye wakati: ‘Nkizira kuteŵetereka yayi, kweni kuteŵetera.’—Mateyu 20:28.

Nteura usange tikukhumba kuŵa nga ni Msambizgi Waluso, kasi tikwenera kucitaci?— Tikwenera kuteŵetera ŵanji. Tikwenera kuŵacitira vintu viweme. Mbunenesko kuti ŵantu ŵanandi ŵakucita nteura yayi. Mu malo mwake, ŵakukhumba kuti ŵanyawo ndiwo ŵaŵateŵeterenge. Pa nyengo yinyake nanga mbasambiri ŵa Yesu nawo ŵakaghanaghananga nteura. Waliyose wa iwo wakakhumbanga kuŵa murara panji muntu wakuzirwa kuruska ŵanyake.

Zuŵa linyake Yesu wakendanga na ŵasambiri ŵake. Ŵakati ŵafika mu msumba wa Kaperenahumu, pafupi na Nyanja ya Galileya, wose ŵakanjira mu nyumba. Mwenemura, Yesu wakaŵafumba, wakati: ‘Kasi mwapindanangaci mu ntowa?’ Ŵakakhala cete cifukwa mu ntowa ŵakapindananga za uyo ni murara.—Marko 9:33, 34.

Yesu wakamanya kuti mbuweme yayi kuti munyake wa iwo ŵaghanaghanenge kuti ni murara kuruska ŵanyake. Mwanteura, nga ni umo tikasambilira mu cipaturo cakwamba ca buku ili, Yesu wakimika mwanici pakati pawo na kuŵaphalira kuti ŵakwenera kuŵa ŵakujiyuyura nga ni mwanici yura. Kweni ŵakatorapo sambiro ni pera yayi. Nteura kukati kwakhala pacoko waka kuti wafwe, Yesu wakaŵapa sambiro lakuti ŵangaruwa yayi. Kasi wakacitaci?—

Peneapo wose ŵakaryanga cakurya, Yesu wakawuka apo wakakhala, wakatora thaulo na kuvwara mu ciuno. Pamanyuma pake wakatora beseni na kupunguliramo maji. Ŵasambiri ŵake ŵakwenera kuti ŵakazizwa na ivyo wakakhumbanga kucita na maji ghara. Uku ŵasambiri ŵake ŵakuwona, Yesu wakajikama na kwamba kugeziska marundi ghawo. Wakati wamara, wakapuputa marundi ghawo na thaulo ilo wakavwara mu ciuno. Aghanaghanira waka za ici! Wuli usange iwe ukaŵapo? Kasi ukatenge ucitenge wuli?—

Ŵasambiri ŵake ŵakawona kuti cikaŵa ciweme yayi kuti Msambizgi wawo waŵateŵetere mu ntowa iyi. Ŵakacita soni. Ndipo Petros wakakana kuti Yesu wacitire iye uteŵeti wakuyuyurika uwu. Kweni Yesu wakati cikaŵa cakukhumbikwa kuti iye wacite uteŵeti uwu.

Mazuŵa ghano tikugeziska marundi gha ŵanyithu yayi. Kweni ici cikacitikanga apo Yesu wakaŵa pa caru capasi. Kasi ukumanya cifukwa cake?— Mu caru ico Yesu na ŵasambiri ŵake ŵakakhalanga, ŵantu ŵakavwaranga nkhwato. Nteura para ŵenda mu ntowa za fuvu, marundi ghawo ghakabinkanga. Nteura lukaŵa lusungu kugeziska marundi gha muntu uyo wiza pa nyumba.

Kweni pa nyengo iyi pakaŵavya nanga njumoza wa ŵasambiri ŵa Yesu uyo wakajipereka kuti wageziske marundi gha ŵanyake. Ndico cifukwa cake Yesu wakacita yekha. Mwakucita nteura, Yesu wakasambizga ŵasambiri ŵake sambiro liweme comene. Ŵakeneranga kusambira sambiro ili. Ndipo ni sambiro ilo ise lero tikwenera kusambira.

Kasi sambiro lake ukulimanya?— Yesu wati wakhalaso pasi wakati: ‘Kasi mukumanya ico ndamucitirani? Imwe mukundicema ine kuti, Msambizgi na Fumu: ndipo mukuyowoya makora; cifukwa ndimo ndiriri. Nteura usange ine, nda Fumu na Msambizgi, ndageziska marundi ghinu, namweso mukwenera kugeziska marundi gha ŵanyinu.’—Yohane 13:2-14.

Apa Msambizgi Waluso wakarongora kuti wakakhumbanga kuti ŵasambiri ŵake ŵateŵeteranenge. Wakakhumbanga yayi kuti ŵaghanaghanirenge vya iwo ŵekha pera. Wakakhumbanga yayi kuti ŵaghanaghanenge kuti mbakuzirwa comene mwakuti ŵanji ŵakwenera kuŵateŵetera nyengo zose. Wakakhumbanga kuti ŵaŵenge ŵakunweka kuteŵetera ŵanji.

Kasi ili likaŵa sambiro liweme yayi?— Kasi iwe uŵenge nga ni Msambizgi Waluso kuti uteŵetere ŵanji?— Tose tingateŵetera ŵanji. Ici ciŵakondweskenge. Kuruska vyose, cikondweskenge Yesu na Ŵawiske kucanya.

Ncintu cakusuzga yayi kuteŵetera ŵanji. Usange ungalaŵiskiska, uwonenge kuti pali vintu vinandi ivyo ungacitira ŵanji. Sono khala phee na kughanaghana: kasi pali cintu cilicose ico ungacitira ŵamama ŵako? Ukumanya kuti iwo ŵakucitira iwe na mbumba yose vintu vinandi. Kasi ungaŵawovwira wuli?— Walekeraci kuŵafumba?

Nyengo zinyake ungaruta kukatora cakurya ku khicini na kuciŵika pa malo ghakuryera. Panji ungatora mbale para mwamara kurya. Ŵana ŵanyake ŵakukateka maji zuŵa lirilose kovwira ŵamama ŵawo. Cilicose ico ungacita, mbwenu uteŵeterenge ŵanji nga ni umo Yesu wakacitira.

Kasi uli na ŵanung’una panji ŵadumbu ŵako awo ungaŵateŵetera? Kumbukira kuti Yesu, Msambizgi Waluso, wakateŵetera ŵasambiri ŵake. Mwakuteŵetera ŵanung’una na ŵadumbu ŵako, urondezgenge Yesu. Kasi ungaŵacitiraci?— Mutepanji ungaŵasambizga umo ŵangagezera makora. Panji umo ŵangavwalira malaya. Panji ungaŵawovwira para ŵakukhumba kukagona. Kasi ungaghanaghanira vintu vinyake ivyo ungaŵacitira?— Ŵakutemwenge comene para uŵacitirenge vintu ivi, nga ni umo ŵasambiri ŵa Yesu ŵakamutemwera.

Ku sukulu nako ungateŵetera ŵanji. Ungateŵetera ŵana ŵa sukulu ŵanyako panji asambizgi ŵako. Usange muntu munyake wawiska mabuku ghake, ukarongora lusungu mwa kumutorerako. Ungajipereka kusisita pa bulakibodi panji kucitira asambizgi ŵako cintu cinyake cilicose. Nanga kungaŵa kujulira cijaro muntu nako ni lusungu.

Nyengo zinyake, tingawona kuti ŵantu ŵakutiwonga yayi cifukwa ca uteŵeti uwo taŵacitira. Kasi ukughanaghana kuti ici cikwenera kutipangiska kuleka kucita vintu viweme?— Yayi! Ŵantu ŵanandi ŵakamuwonganga yayi Yesu para waŵacitira viweme. Kweni ici kuti cikamupangiska kureka kucita viweme yayi.

Nteura tingalekanga yayi kuteŵetera ŵanji. Tiyeni tikumbukire Msambizgi Waluso, Yesu, ndipo nyengo zose tiyezge-yezge kurondezga ciyerezgero cake.