Kasi Tikwenera Kujirumba pa Viri Vyose?

KASI kujirumba kukung’anamuraci? Kasi ukumanya?— Pano pali ciyerezgero. Kasi uli kuyezgapo kucita cintu cinyake ico ukucimanya makora yayi? Panji uli kuyezgapo kutcaya bola. Mutepanji kutcaya khwapu. Kasi walipo yunji uyo wakakusekapo na kuyowoya kuti, “He-he-dee! Awonani! nga wareka waka! Ine ningacita makora kuruska iwe”?— Kuyowoya unenesko muntu uyu wakajikuzganga.

Kasi ukujipulika wuli para ŵanji ŵakucita nteura? Kasi ukukondwa?— Kasi ukughanaghana kuti ŵanji ŵakujipulika wuli para ukujirumba?— Kasi nciweme kuphalira ŵanji kuti, “Ine ningacita makora kuruska iwe”?— Kasi Yehova wakutemwa ŵantu awo ŵakucita ici?—

Msambizgi Waluso wakamanyanga ŵantu awo ŵakaghanaghananga kuti ŵakaŵa ŵaweme kuruska ŵanyawo. Ŵakajirumbanga panji kujiwona cifukwa ca ivyo ŵakacita na kuyuyura ŵanyawo. Mwanteura zuŵa linyake Yesu wakaŵaphalira ntharika iyo yikurongora uheni wakujirumba. Tiye titegherezge ntharika iyi.

Ntharika iyi nja Mufarisi na muntu uyo wakupokera ndarama za msonko. Ŵafarisi ŵakaŵa ŵasambizgi ŵa cisopo, awo kanandi ŵakacitanga vintu nga mbarunji kuruska ŵantu wose kweni ŵakaŵa ntena yayi. Yesu wakayowoya kuti Mufarisi wakaruta ku tempele la Ciuta ku Yerusalemu kukasopa.

Yesu wakayowoyaso kuti muntu uyo wakupokera ndarama za msonko nayo wakaruta ku tempele kukasopa. Kweni ŵantu ŵanandi ŵakaŵatemwanga cara ŵantu awo ŵakapokeranga ndarama za msonko. Ŵakaghanaghananga kuti ŵantu aŵa ŵakaŵabiranga. Mbunenesko nadi kuti ŵantu ŵanandi awo ŵakapokeranga ndarama za msonko nyengo zinyake ŵakibanga.

Mufarisi wakamba kuromba kwa Ciuta mu tempele, wakati: ‘Ciuta nkumuwongani cifukwa nili wakwananga nga ni ŵantu ŵanyake cara. Nkwibira ŵantu yayi panji kucita vintu viheni. Nili nga wakusonkeska msonko uyo wali apo cara. Ndine murunji. Nkuziŵizga vyakurya kaŵiri mu sabata limoza mwakuti niŵe na nyengo yinandi yakughanaghanira za imwe. Kweniso nkupatulako cakhumi ca vyose ivyo nkusanga.’ Nadi pano Mufarisi wakaghanaghananga kuti wakaŵa muntu muweme kuruska ŵanji, asi ntena?— Nakuti wakamuphaliraso Ciuta kuti wakaŵa nadi muweme.

Kweni muntu wakupokera ndarama za msonko yura wakacita nteura yayi. Wakinuska nanga ni maso ghake kucanya yayi apo wakarombanga. Wakimilira kutali uku wasindamira mutu wake pasi. Wakaŵa na citima comene cifukwa ca zakwananga zake, ndipo wakapamantanga cifuŵa cake cifukwa ca citima. Wakayezgapo cara kumuphalira Ciuta uweme wake. M’malo mwake, wakaromba wakati: “Ciuta, mundilengere lusungu nda wakwananga.”

Pakati pa ŵantu ŵaŵiri aŵa, ni njani uyo ukughanaghana kuti wakamukondweska Ciuta? Kasi ni Mufarisi, uyo wakaghanaghana kuti wakaŵa muweme? Panji wakupokera ndarama za msonko, uyo wakaŵa na citima cifukwa ca zakwananga zake?—

Yesu wakayowoya kuti wamsonko ndiyo wakamukondweska Ciuta. Cifukwa wuli? Yesu wakarongosora kuti: ‘Yose uyo wakujikuzga kuti waŵe nga ni muweme kuruska ŵanyake wazamuyuyurika. Kweni uyo ngwakujiyuyura wati wakuzgikenge.’—Luka 18:9-14.

Ni sambiro wuli ilo Yesu wakasambizganga mu ntharika yake?— Wakasambizganga kuti nciweme yayi kughanaghana kuti tiri ŵakuzirwa kuruska ŵanji. Tingayowoya cara kuti tiri ŵakuzirwa, kweni kacitiro kithu ka vintu kangarongora. Kasi uli kucitapo nteura?— Ghanaghanira ciyerezgero ca mpostole Petros.

Apo Yesu wakaphaliranga ŵapostole kuti ŵamucimbirenge para wakukoreka, Petros mwakujirumba wakati: ‘Nanga wose ŵangamucimbirani, kweni ine cara.’ Kweni Petros wakabuda. Wakajithembanga comene. Wakamureka Yesu. Ndipouli, wakawera, nga ni umo tisambilirenge mu Cipaturo 30 ca buku ili.—Mateyu 26:31-33.

Tiye tiwone ciyerezgero ca mazuŵa ghano. Mutepanji iwe na munyako uyo ukusambira nayo sukulu mukufumbika mafumbo ghanji ku sukulu. Kasi iwe ungacita wuli usange ungazgora nyengo yeneyiyo, kweni munyako watondeka kuzgora? Mbunenesko kuti ukukondwa para ukughamanya mazgoro. Kweni kasi cingaŵa ciweme kujiyaniska na munyako uyo wangutondeka kusanga zgoro?— Kasi nciweme kujirumba na kumuyuyura munyako?—

Ici ndico Mufarisi yura wakacita. Wakajikuzga kuti iye wakaŵa muweme kuruska wamsonko. Kweni Msambizgi Waluso wakayowoya kuti Mufarisi ndiyo wakabuda. Mbunenesko kuti muntu wangamanya kucita cintu cinyake ico ŵanyake ŵangacita yayi. Kweni ici cikung’anamura kuti muntu uyo ni muweme cara.

Mwanteura usange tikumanya vinandi kuruska ŵanji, kasi ici ncifukwa cakuti tijirumbenge?— Iwe ukutipo wuli? Kasi ndise tikapanga wongo withu?— Yayi, Ciuta ndiyo wakapereka wongo kwa muntu waliyose. Ndipo vintu vinandi ivyo tikumanya, tikasambira ku ŵanji. Panji tikaŵazga mu buku. Mutepanjiso yunji wakatiphalira. Para tamanya kucita cintu cinyake mwa ise tekha, kasi ncivici ico cikutovwira?— Tikugwiriskira ncito wongo uwo Ciuta wakatipa.

Para muntu wakulimbikira comene pakucita vintu, nciweme kumulimbikiska. Muphalira kuti ukukondwa comene na ivyo iye wakucita. Panji ungamovwira kuti wanyolorere. Ivi ndivyo nawe ungakondwa kuti ŵanyako ŵakucitirenge, asi ntena?—

Ŵantu ŵanyake mbankongono comene kuruska ŵanji. Wuli usange iwe uli na nkongono zinandi kuruska mbali panji mudumbu wako? Kasi cingaŵa cifukwa cakuti ujirumbire?—Yayi. Cakurya ico tikurya ndico cikutovwira kuti tikurenge makora. Ndipo Ciuta ndiyo wakupereka vula na vyose ivyo vikukhumbikwa kuti vyakurya ivyo tikupanda vikurenge makora, asi ntena?— Mwanteura, nciweme kumuwonga Ciuta usange tikukura makora.—Milimo 14:16, 17.

Tose tikukhumba cara kuŵa na ŵantu ŵakujirumba, ni ntena yayi?— Kumbukira ivyo Yesu wakayowoya: ‘Umo ukhumbira kuti ŵantu ŵakucitirenge, nawe uŵacitirenge mwakuyana waka.’ Usange ticitenge ici, tiŵenge nga ni Mufarisi yayi uyo wakajikuzganga mu ntharika iyo Msambizgi Waluso wakayowoya.—Luka 6:31.

Zuŵa linyake muntu munyake wakamuphalira Yesu kuti ni muntu muweme. Kasi Msambizgi Waluso wakazomera kuti, ‘Enya, ndine muweme’?— Cara, wakakana. M’malo mwake, wakati: ‘Palije muweme, kweni yumoza pera, Ciuta.’ (Marko 10:18) Nangauli Msambizgi Waluso wakaŵa murunji, iye wakajikuzganga yayi. M’malo mwake, wakaperekanga marumbo ghose kwa Ŵadada ŵake, Yehova.

Kasi walipo muntu uyo ise tingajikuzga cifukwa ca iye?— Enya, walipo. Tingajikuzga cifukwa ca Mlengi withu, Yehova Ciuta. Para tikuwona kutowa kwa dazi para likunjira, panji cilengiwa cakukondweska, tingamuphalira munyithu kuti ‘Ciuta withu wakuzizwiska, Yehova, ndiyo wakalenga ivi!’ Nyengo zose tikwenera kuŵa ŵakunozgekera kuphalira ŵanji vintu ivyo Yehova wacita na ivyo wazamucita muntazi.