Ungibanga Yayi!

KASI muntu munyake wali kukwibirapo cintu?— Kasi ukajipulika wuli wati wakwibira?— Waliyose uyo wakakubira ni munkhungu, ndipo palije uyo wakutemwa munkhungu. Kasi ukughanaghana kuti muntu wakuŵa wuli munkhungu? Kasi wakubabika kuti ni munkhungu kale?—

Tiri kusambira kuti ŵantu ŵakubabika ŵakwananga. Nteura tose ndise ŵakwananga. Kweni palije muntu uyo wakubabika munkhungu. Muntu munkhungu wangafumira mu mbumba yiweme. Ŵapapi ŵake, ŵakuru panji ŵanung’una ŵake, na ŵadumbu ŵake ŵangaŵa ŵaweme. Kweni khumbiro la muntu la kupenja ndarama na ivyo ndarama zingagula ndilo lingamupangiska kuti waŵe munkhungu.

Kasi ukughanaghana kuti ni njani uyo wakaŵa munkhungu wakwamba?— Tiye tighanaghanirepo pa fumbo ili. Msambizgi Waluso wakamumanya muntu uyu apo wakaŵa kucanya. Munkhungu uyu wakaŵa mungelo. Kweni cifukwa cakuti ŵangelo wose awo Ciuta wakalenga ŵakaŵa ŵarunji, kasi ni mwauli umo mungelo uyu wakaŵira munkhungu?— Nga ni umo tikasambilira mu Cipaturo 8 ca buku lino, iye wakakhumbanga cintu cinyake ico cikaŵa cake cara. Kasi cintu ici ukucikumbuka?—

Ciuta wakati walenga mwanarumi na mwanakazi wakwamba, mungelo uyu wakakhumbanga kuti iwo ŵamusopenge. Iye wakaŵavye wenelero wakuti ŵamusopenge. Iwo ŵakeneranga kusopa Ciuta pera mbwenu. Kweni iye wakiba kusopa uku! Mwakupangiska Adamu na Heva kusopa iye, mungelo uyu wakazgoka munkhungu. Wakazgoka Satana Dyabulosi.

Kasi ncivici ico cikupangiska muntu kuti waŵe munkhungu?— Kupenja cintu ico ncake yayi. Khumbiro ili lingaŵa lankongono comene mwakuti lingapangiska nanga ŵangaŵa ŵantu ŵaweme kucita vintu viheni. Nyengo zinyake ŵantu awo ŵakuŵa ŵankhungu ŵakusinta yayi kuti ŵambeso kucita viweme. Yumoza wa iwo wakaŵa mpostole wa Yesu. Zina lake likaŵa Yuda Iskariote.

Yuda wakamanyanga kuti kwiba nkuheni cifukwa wakasambizgika Dango la Ciuta kufumira pa wanici. Wakamanyanga kuti nyengo yinyake Ciuta wakayowoya kufuma kucanya kuphalira ŵantu ŵake kuti: ‘Mungibanga cara.’ (Exodus 20:15) Yuda wakati wakura, wakakumana na Msambizgi Waluso ndipo wakaŵa yumoza wa ŵasambiri ŵake. Mukuruta kwa nyengo, Yesu wakasanka Yuda kuŵa yumoza wa ŵapostole ŵake 12.

Yesu na ŵapostole ŵake ŵakenderanga lumoza. Ŵakaryeranga pamoza cakurya. Ndipo ndarama zose izo gulu lawo likaŵa nazo ŵakasunganga mu bokosi. Yesu wakapereka bokosi ili kwa Yuda kuti ndiyo wasungenge. Kweni ndarama izi kuti zikaŵa za Yuda yayi. Kweni kasi ukumanya ico Yuda wakamba kucita mukuruta kwa nyengo?—

Yuda wakamba kutora ndarama mu bokosi, cintu ico wakeneranga yayi kucita. Iye wakatoranga para ŵanyake ŵakureka kulaŵiskako, ndipo wakayezganga kusanga ntowa zakuti watolere zinandi. Wakamba kughanaghana za ndarama pera nyengo zose. Tiye tiwone ico khumbiro liheni ili likamurongozgera kucita pati pajumpa mazuŵa ghacoko waka Msambizgi Waluso wakati wakomeka.

Mariya, mudumbu wa Lazaro, uyo wakaŵa bwezi la Yesu, wakatora mafuta ghaweme comene na kupungulira pa marundi gha Yesu. Kweni Yuda wakadandaula. Kasi ukumanya cifukwa cake.— Iye wakati mafuta ghara mpanyi ghakaguliskika na kugaŵira ŵantu ŵakavu ndarama zake. Kweni unenesko ukaŵa wakuti wakakhumbanga kuti mu bokosi muŵe ndarama zinandi mwakuti watore.— Yohane 12:1-6.

Yesu wakaphalira Yuda kuti wareke kusuzga Mariya, uyo wakacita cintu ciweme comene. Yuda wakakondwa yayi na ivyo Yesu wakamuphalira, anteura wakaruta ku ŵasofi ŵarara, awo ŵakaŵa ŵarwani ŵa Yesu. Iwo ŵakakhumbanga kumukora Yesu, kweni ŵakakhumbanga kucita ici na usiku mwakuti ŵantu ŵareke kuŵawona.

Yuda wakaphalira ŵasofi kuti: ‘Nimuphalireninge umo mungakolera Yesu usange munganipa ndarama. Kasi mundipenge ndarama zilinga?’

Ŵasofi ŵakamuzgora kuti: ‘Tikupenge ndarama 30 za siliva.’—Mateyu 26:14-16.

Yuda wakatora ndarama zira. Cikaŵa nga ni kuti iye wakaguliskanga Msambizgi Waluso kwa iwo! Kasi ukughanaghana kuti ni muntu njuni uyo wangacita cintu ciheni ca nga ni ici?— Ici ndico cikucitika para muntu waŵa munkhungu na kwamba kwiba ndarama. Wakutemwa comene ndarama kuruska ŵantu panji Ciuta.

Nyengo zinyake iwe ungayowoya kuti, ‘Ningacita yayi kuti nitemwe comene vintu kuruska Yehova Ciuta.’ Mbuweme kughanaghana ntena. Yesu wati wasanka Yuda kuti waŵe mpostole wake, iye mwambura kukayika ndimo wakaghanaghaniranga ntena. Ŵanyake awo ŵakazgoka ŵankhungu nawo ŵakwenera kuti ŵakaghanaghananga ntena. Tiye tidumbiskane za ŵanji ŵa iwo.

Yumoza wakaŵa muteŵeti wa Ciuta zina lake Akani, uyo wakaŵako kale comene pambere Msambizgi Waluso wandababike. Akani wakawona munjirira uweme, golide, na siliva. Vikaŵa vyake yayi. Baibolo likuyowoya kuti vintu ivi vikaŵa vya Yehova cifukwa vikatoreka ku ŵarwani ŵa ŵantu ŵa Ciuta. Kweni Akani wakavikhumbisiska comene mwakuti wakiba.—Joshua 6:19; 7:11, 20-22.

Tiye tiwone ciyerezgero cinyake. Virimika vinandi ivyo vyajumpa, Yehova wakasanka Davide kuti waŵe themba la Ŵaisrayeli. Zuŵa linyake, Davide wakamba kulaŵiska mwanakazi munyake wakutowa zina lake Batisheba. Wakarutirizga kulaŵiska Batisheba mupaka wakamba kughanaghana kumutolera ku nyumba yake kuti waŵe muwoli wake. Kweni, Batisheba wakaŵa muwoli wa Uriya. Kasi Davide wakeneranga kucitaci?—

Davide wakeneranga kureka kughanaghana za Batisheba. Kweni ndimo wakacitira yayi. Nteura Davide wakamutolera ku nyumba yake. Ndipo pamanyuma pake wakapanga manozgero ghakuti Uriya wakomeke. Ncifukwa wuli Davide wakacita vintu viheni ivi?— Cifukwa wakarutirizga kudokera mwanakazi uyo wakaŵa wamwene.—2 Samuel 11:2-27.

Pakuti Davide wakacita citima na ivyo wakacita, Yehova wakamugowokera. Kweni kufumira pa nyengo iyo kuya muntazi, Davide wakaŵa na masuzgo ghanandi. Abisalomu mwana wake wakakhumba kutora malo gha Davide gha uthemba. Nteura para ŵantu ŵiza kuti ŵazakakumane na Davide, Abisalomu wakaŵakumbatiranga na kuŵafyofyonta. Baibolo likuti: Abisalomu ‘ŵakibanga [kukopa] mitima ya Ŵaisrayeli.’ Wakapangiska ŵantu ŵara kukhumba kumuvwarika uthemba m’malo mwa Davide.—2 Samuel 15:1-12.

Kasi wuli kukhumbisiskapo comene cintu nga ni umo Akani, Davide, na Abisalomu ŵakacitira?— Usange cintu ncamwene, kutora kwambura kuphalirika mbunkhungu. Kasi ukukumbuka cintu ico munkhungu wakwamba, Satana, wakakhumbanga?— Wakakhumbanga kuti ŵantu ŵasopenge iye m’malo mwa Ciuta. Nteura Satana wakibanga apo wakanyengeleranga Adamu na Heva kuti ŵapulikirenge iye.

Usange muntu wali na cintu, iye wali na wenelero wakuyowoya uyo wangacigwiriskira ncito. Mwaciyerezgero, iwe ungaruta kukaseŵera na ŵanyako ku nyumba kwawo. Kasi cingaŵa ciweme kutorako cintu cinyake kwenekura na kuruta naco ku nyumba kwako?— Yayi. Ungatora pekha usange waphalirika na dada panji mama wa ku nyumba uko wanguruta. Usange ungatorako cintu cinyake kwambura kupempa, mbunkhungu.

Kasi ncifukwa wuli iwe unganyengeka kuti wibe?— Cifukwa ca kukhumba cintu ico ncako yayi. Nanga kungaŵa kuti palije muntu uyo wakukuwona, kasi ni njani uyo wakukuwona?— Yehova Ciuta. Ndipo tikwenera kukumbuka kuti Ciuta wakutinka kwiba. Nteura kutemwa Ciuta na ŵanyithu kutovwirenge kuti tireke kwiba.